Matthieu 6

Lege ti mungo ye na azo ti mawa

1 “Ala sara hange! Tongana ala sara nzoni kua ndali ti Nzapa, ala sara ni titene azo abaa ala pepe. Tongana ala yeke sara kua ni gi ndali ti le ti azo, fade Babâ ti ala so ayeke na yayu ayeke mu na ala futa ni pepe. 2Tongana mo yeke mu ye na azo ti mawa, ayeke nzoni mo dekongo na tënë ni pepe, tongana ti azo so tënë ti yanga ti ala ayeke nde na sarango ye ti ala: azo ni ayeke sara tongaso na ya ti ada ti sambelango Nzapa nga na be ti lege titene azo agonda ala. Mbi tene na ala taa-tënë: azo ni so awara ti ala futa ni awe. 3Ti mo, tongana mo yeke mu ye na azo ti mawa na maboko ti mo ti koli, sara si maboko ti mo ti wali ahinga tënë ni pepe. 4Mu ye ni na hondengo ni si Babâ ti mo so ayeke baa ye so mo yeke sara na hondengo ni amu na mo ye ti peko ni.”

Jésus afa lege ti sambela

(Luc 11.2-4)

5 “Tongana ala yeke sambela, ala sara tongana azo so tënë ti yanga ti ala ayeke nde na sarango ye ti ala so pepe: azo ni aye ti luti na nduzu ti sambela na ya ti ada ti sambelango Nzapa nga na asangbi-lege titene azo abaa ala. Mbi tene na ala taa-tënë: azo ni awara futa ti ala awe. 6Ti mo, tongana mo ye ti sambela, mo li na ya ti kubu ti mo, mo kanga yanga ti kubu ni si mo sambela Babâ ti mo so zo ayeke baa lo pepe. Fade Babâ ti mo so ayeke baa ye so mo yeke sara na hondengo ni ayeke mu na mo ye ti peko ni.

7“Tongana ala yeke sambela, ala diko gba ti atënë pepe tongana ti azo so ahinga Nzapa pepe: azo ni abaa ti ala atene, na lege ti dikongo gba ti atënë si fade Nzapa ayeke ma ala. 8Ala sara ye tongana ti azo ni so pepe. Biani, Babâ ti ala ahinga kozoni awe ye so atia ala. 9Lege so alingbi ala sambela na ni ayeke tongaso:

‘Babâ ti e so mo yeke na yayu,

ayeke nzoni azo ane iri ti mo

so ayeke nde si ayeke nzoni kue;

10ga, mo le-gbia na ndö ti azo.

Ayeke nzoni a sara na sese ye so be ti mo aye,

tongana ti so a yeke sara na yayu.

11Mu na e laso kobe so alingbi na e.

12Zi sioni ti e na li ti e tongana ti so e nga,

e yeke zi sioni na li ti azo so asara sioni na e.

13Sara si e ti na ya ti ye ti tarango be pepe,

me mo zi e na maboko ti Sioni wato.

[Mo yeke Gbia, mo yeke na ngangu si gonda ayeke ti mo kpu na kpu! Amen.’]

14“Biani, tongana ala zi sioni na li ti azo so asara sioni na ala, fade Babâ ti ala so ayeke na yayu ayeke zi nga sioni na li ti ala. 15 Me tongana ala zi sioni pepe na li ti azo so asara sioni na ala, fade Babâ ti ala ayeke zi nga sioni na li ti ala pepe.”

Tënë ti kengo kobe ti sambela

16“Tongana ala yeke ke kobe ti sambela, ala duti na vundu pepe tongana ti azo so tënë ti yanga ti ala ayeke nde na sarango ye ti ala: azo ni ayeke sara le ti ala kirikiri ti fa na azo atene, ala yeke ke kobe ti sambela. Mbi tene na ala taa-tënë: azo ni awara ti ala futa ni awe. 17Ti mo, tongana mo ye ti ke kobe ti sambela, sukula le ti mo, sua ya ti li ti mo 18si azo ahinga pepe atene, mo yeke ke kobe. Me mo sara si gi Babâ ti mo ahinga tënë ni; Babâ ti mo so ayeke daa si zo alingbi ti baa lo pepe so. Lo yeke baa ye so mo yeke sara na hondengo ni si lo yeke mu ande na mo ye ti peko ni.”

Tënë ti batango mosoro na yayu

(Luc 12.33-34)

19 “Ala bongbi mosoro na ndö ti dunia so pepe! Na ndö ti dunia so, akangi na *soko ayeke buba ni, azo ti nzi ayeke kungbi yanga ti da ti nzi ni. 20Me ala bongbi mosoro ti ala na yayu! Na yayu kâ, akangi na soko alingbi ti buba ni pepe, azo ti nzi alingbi nga ti kungbi yanga ti da ti nzi ni pepe, 21ngbanga ti so ndo so mosoro ti mo ayeke daa, be ti mo ayeke nga daa.”

Le ti zo ayeke lamba ti tere ti lo

(Luc 11.34-36)

22“Le ti zo ayeke tongana lamba ti tere ti lo. Tongaso, tongana le ti mo ayeke nzoni, tere ti mo kue ayeke na ya ti vurungo ndo. 23Me tongana le ti mo abuba, tere ti mo kue ayeke na ya ti vukongo ndo. Tongana vurungo ndo so ayeke na ya ti mo avuko awe, fade akiri avuko pitipiti!”

Ala sara kua gi na Nzapa oko

(Luc 16.13)

24“Zo oko alingbi ti sara kua na amakonzi use pepe, ngbanga ti so fade lo yeke ke mbeni oko si lo yeke ye mbeni; lo yeke ma yanga ti mbeni oko si lo yeke baa mbeni na le ti lo tongana senge zo. Ala lingbi ti sara kua na Nzapa nga na nginza legeoko pepe.”

Ala zia be ti ala na ndö ti Nzapa

(Luc 12.22-31)

25“Ndani laa mbi tene na ala: ala gi be ti ala ndali ti fini ti ala pepe wala ndali ti tere ti ala pepe, atene: ‘Fade e yeke te nyen? Fade e yeke nyon nyen? Fade e yeke wara bongo na ndo wa ti yu?’ Fini ti zo ayeke kota ahon kobe pepe? Tere ti zo ayeke kota ahon bongo pepe? 26Ala baa andeke ti nduzu si: ala yeke lu le ti kobe pepe, ala yeke ko le ti kobe ti bongbi ni na ya ti gogoro pepe; me Babâ ti ala so ayeke na yayu ayeke mu kobe na andeke so. Ala azo, ala hon andeke pepe? 27Zo wa na popo ti ala, na lege ti gingo be ti lo, lo lingbi ti zia mbeni lango oko na ndö ti alango ti fini ti lo?

28“Ngbanga ti nyen si ala yeke gi be ti ala ndali ti bongo? Ala baa lege so akongo ti ngonda ayeke kono na ni: ala yeke sara kua pepe, ala yeke leke nga bongo pepe. 29 Me mbi tene na ala: ataa Salomon so ayeke ando na amosoro mingi, pendere ti abongo so lo yu alingbi na pendere ti akongo ni oko pepe. 30Apere so ayeke laso na ya ti ngonda si kekereke a yeke tuku ni na le ti wâ so, Nzapa aleke ni pendere. Ala azo ti kete mabe, Nzapa alingbi ti sara si ala wara bongo pepe? 31Tongaso, ala gi be ti ala pepe, atene: ‘Fade e yeke te nyen? Fade e yeke nyon nyen? Fade e yeke wara bongo na ndo wa ti yu?’ 32Azo so ahinga Nzapa pepe laa ayeke gi be ti ala lakue ndali ti aye tongaso. Ti ala azo ti mbi, Babâ ti ala so ayeke na yayu ahinga atene, ayeke nzoni ala wara aye so ndali ti fini ti ala. 33Ala gi lege ti *Kodro-gbia ti Nzapa kozoni, ala sara nga ye so ayeke mbirimbiri na le ti lo; fade lo yeke mu na ala tanga ti aye kue na ndö ni. 34Tongaso, ala gi be ti ala ndali ti aye ti kekereke pepe: pasi ti kekereke ayeke pasi ti kekereke. Lango oko oko ayeke ga na pasi ti lo wani.

Currently Selected:

Matthieu 6: MNF2010

Highlight

Copy