Matthieu 4

Zabolo atara be ti Jésus

(Marc 1.12-13; Luc 4.1-13)

1 Na pekoni, Yingo ague na Jésus na benyama titene Zabolo atara be ti lo. 2Na ya ti lango baleosio na bi baleosio, lo ke kobe si na pekoni nzara asara lo. 3Zabolo aga nduru na tere ti lo si atene na lo: “Tongana mo yeke Molenge ti Nzapa, mo mu yanga na atêne so titene aga kobe!” 4 Jésus akiri tënë na lo: “Mbeti ti Nzapa atene: ‘Fade zo ayeke ngba na fini gi na lege ti kobe oko pepe, me na lege ti tënë so kue asigigi na yanga ti Nzapa.’ ”

5Na pekoni, Zabolo ague na lo na Jérusalem, gbata so ayeke nde si ayeke nzoni kue; lo zia lo na li ti kota da ti Nzapa 6 si lo tene na lo: “Tongana mo yeke Molenge ti Nzapa, mo londo na li ti da so, mo ti na sese, ngbanga ti so Mbeti ti Nzapa atene:

‘Fade Nzapa ayeke mu yanga na *a-ange ti lo ndali ti mo;

ala yeke yo mo na maboko ti ala

si mo pika gere ti mo na mbeni têne pepe.’ ”

7 Jésus akiri tënë na lo: “Mbeti ti Nzapa atene nga, atene: ‘Mo tara be ti *Kota Gbia, Nzapa ti mo pepe.’ ”

8Zabolo akiri ague na lo na li ti mbeni kota hoto, lo fa na lo akodro kue ti dunia na apendere ye ti ya ni 9si lo tene na lo: “Tongana mo kuku na gbe ti mbi si mo voro mbi, fade mbi yeke mu aye so kue na mo.” 10 Jésus atene na lo: “Hon kâ, Satan! Mbeti ti Nzapa atene: ‘Mo voro Kota Gbia, Nzapa ti mo si mo sara kua gi na lo oko!’ ” 11Tongaso Zabolo azia Jésus si a-ange aga na tere ti lo, asara na lo.

Jésus ato nda ti kua ti lo na Galile

(Marc 1.14-15; Luc 4.14-15)

12 So Jésus ama a tene, a gbu Jean si a zia lo na da ti kanga awe, lo gboto tere ti lo si lo gue na Galile. 13 Lo zia gbata ti Nazaret si lo gue, lo duti na gbata ti Kapernaum, so ayeke na tere ti kota ngu ti Galile, na sese ti Zabulon na ti Neftali. 14Lo sara tongaso titene tënë ti wayanga-Nzapa Ésaïe so aga taa-tënë:

15 “Sese ti Zabulon na ti Neftali,

so ayeke na lege ti guengo na kota ngu-ingo,

na mbage ti ngu ti Jourdain laa

ayeke Galile ti amara nde!

16Azo so aduti na ya ti vukongo ndo

abaa kota lumiere!

Ndo ahan na ndö ti azo so aduti ando

na ya ti vukongo ndo, na kodro ti akuâ.”

17 Gi na ndembe ni so, Jésus ato nda ti fa tënë, lo tene: “Ala zia ngbene lege ti sarango ye ti ala, ngbanga ti so *Kodro-gbia ti yayu aga nduru awe!”

Jésus asoro adisiple ti lo

(Marc 1.16-20; Luc 5.1-11)

18So Jésus ayeke tambula na yanga ti kota ngu ti Galile, lo baa a-ita use so ayeke azo ti gingo susu: Simon so mbeni iri ti lo ayeke Pierre, lo na ita ti lo André; ala yeke bi gbanda ti ala na ya ti kota ngu ni ti gi na asusu. 19Jésus atene na ala: “Ala ga na peko ti mbi, fade mbi yeke sara si ala ga azo ti gingo azo.” 20Gi hio tongaso, ala zia agbanda ti ala si ala mu peko ti lo. 21Jésus ahon gi kete, lo baa ambeni ita use: Jacques na ita ti lo Jean, amolenge ti Zebede; ala na babâ ti ala ayeke na ya ti ngo si ala yeke leke agbanda ti ala. Jésus airi ala. 22Gi hio tongaso, ala zia ngo ti ala na babâ ti ala kue si ala mu peko ti Jésus.

Jésus ayeke fa ye si lo yeke kai kobela na tere ti azo

23 Jésus atambula na ya ti Galile kue; lo fa ye na azo na ya ti ada ti sambelango Nzapa ti kodro ni, lo fa Nzoni Tënë ti *Kodro-gbia ti yayu, lo kai akobela kue na tere ti azo, lo sara si azo so mbage ti tere ti ala abuba, aga nzoni. 24Sango ti Jésus amu ya ti sese ti Sirii kue. Nilaa azo aga na lo azo so tere ti ala aso, ala so ayeke na akobela nde nde si ala yeke na siriri pepe: ala so ayeke na asioni yingo, ala so ayeke na kobela ti makako nga na ala so mbage ti tere ti ala abuba. Jésus akai kobela na tere ti ala kue. 25Gba ti azo amu peko ti Jésus; ambeni alondo na Galile, ambeni alondo na ya ti Agbata-Baleoko, ambeni alondo na Jérusalem, na Judée nga na kodro so ayeke na mbage ti ngu ti Jourdain si aga.

Currently Selected:

Matthieu 4: MNF2010

Highlight

Copy