Matthieu 26

Amakonzi ti azuife agi lege ti fâ Jésus

(Marc 14.1-2; Luc 22.1-2; Jean 11.45-53)

1So Jésus atene tënë so kue awe, lo tene na adisiple ti lo: 2 “Ala hinga kue, na ya ti lango use, fade *matanga ti Pake ayeke duti daa. Fade a yeke mu *Molenge ti Zo titene a fâ lo na ndö ti keke ti kroa.”

3Tongaso akota wayango-sandaga na *akangba ti azuife abongbi tere na ya ti gbagba ti kota wayango-sandaga so iri ti lo Kaife. 4Ala leke tënë ti gbu Jésus na lege ti mbeni mayere titene ala fâ lo. 5Me ala tene: “Alingbi e gbu lo na lango ti matanga pepe, ngbanga ti azo atomboka.”

Mbeni wali atuku yombo na li ti Jésus

(Marc 14.3-9; Jean 12.1-8)

6So Jésus ayeke na Betanii, na ya ti da ti Simon, zo ti buruma, 7 mbeni wali aga nduru na tere ti lo na mbeni ngbenda ti yombo so ngere ni ayeke ngangu mingi; a sara ngbenda ni na mbeni têne so iri ni albatre. Lo tuku yombo ni na li ti Jésus, na ndembe so Jésus ayeke te kobe. 8So adisiple abaa ye ni tongaso, be ti ala aso si ala tene: “Ngbanga ti nyen si lo yeke buba yombo so tongaso? 9A lingbi fade ti ka ni na ngangu ngere si amu nginza ni na azo ti mawa pepe?”

10Jésus ahinga tënë so adisiple ni ayeke tene si lo tene: “Ngbanga ti nyen si ala yeke so li ti wali so tongaso? Ye so lo sara na mbi so ayeke ye ti nzoni. 11 Biani, azo ti mawa ayeke duti lakue na popo ti ala, me ti mbi, mbi yeke duti lakue na popo ti ala pepe. 12Lo tuku yombo so na tere ti mbi ti leke mbi ti ku na ndembe so a yeke lu ande kuâ ti mbi. 13Mbi tene na ala taa-tënë: na ndo so kue a yeke fa ande Nzoni Tënë so daa, na ndö ti dunia kue, azo ayeke fa tënë ti ye so wali so asara si azo ayeke dabe ti ala na lo.”

Judas aye ti ka Jésus

(Marc 14.10-11; Luc 22.3-6)

14Tongaso, mbeni disiple oko na popo ti adisiple baleoko na use, so iri ti lo Judas Iskariote ague na ndo ti akota wayango-sandaga; 15 lo tene na ala: “Tongana mbi ka Jésus na ala, fade ala yeke mu na mbi nyen?” Akota wayango-sandaga ni adiko ale ti nginza baleota si ala mu na lo. 16Ti londo na ndembe ni so, Judas ato nda ti gi nzoni lege ti ka Jésus na ala.

Jésus na adisiple ti lo ate kobe ti Pake

(Marc 14.12-21; Luc 22.7-14,21-23; Jean 13.21-30)

17Na kozo lango ti matanga ti Mapa so a sara na mama ni pepe, adisiple aga na tere ti Jésus si ala hunda lo, atene: “Mo ye e leke na mo kobe ti *Pake na ndo wa?” 18Jésus atene na ala: “Ala gue na ya ti gbata ni na ndo ti pakara tongaso; ala tene na lo: ‘Wafango-ye atene: Ngbonga ti mbi aga nduru awe; mbi na adisiple ti mbi, e yeke sara ande matanga ti Pake na ndo ti mo.’ ” 19Adisiple asara ye ni gi tongana ti so Jésus amu yanga na ala si ala leke kobe ti Pake ni.

20Na lakui ni, Jésus na adisiple baleoko na use aduti ti te kobe. 21So ala yeke te kobe ni, Jésus atene na ala: “Mbi tene na ala taa-tënë: mbeni oko na popo ti ala ayeke ka mbi.” 22Vundu agbu be ti adisiple mingi si ala oko oko ato nda ti hunda lo, atene: “*Kota Gbia, ayeke mbi?” 23 Jésus akiri tënë na ala: “Zo so mbi na lo, e yeke yoro maboko oko na ya ti sembe, lo laa lo yeke ka mbi. 24 Fade *Molenge ti Zo ayeke kui gi tongana ti so Mbeti ti Nzapa atene tënë ni na ndö ti lo; me mawa na zo so ayeke ka ande Molenge ti Zo ni so! Ti zo ni so, tongana a du lo fade pepe, ka ayeke nzoni mingi!” 25Judas, zo ti kango Jésus amu tënë si lo tene: “Wafango-ye, ayeke mbi?” Jésus akiri tënë na lo, atene: “Tënë ni laa mo tene awe so.”

Kobe ti Kota Gbia

(Marc 14.22-26; Luc 22.15-20; 1 Kor 11.23-25)

26So ala yeke te kobe, Jésus amu mapa, lo mu singila na Nzapa; na pekoni lo fâ ya ni, lo mu na adisiple si lo tene: “Ala mu ni ate, so ayeke tere ti mbi.” 27Na pekoni, lo mu kopo ti vin, lo mu singila na Nzapa si lo mu ni na ala, lo tene: “Ala kue anyon ni, 28 ngbanga ti so ayeke mene ti mbi, mene so abongbi azo na Nzapa na ya ti *mbuki; mene so atuku ndali ti gba ti azo titene azi siokpari ti ala. 29Mbi tene na ala: fade mbi yeke kiri ti nyon ngu ti le ti *vinye pepe, ngbii asi na lango so fade mbi na ala, e yeke nyon fini vin na ya ti *Kodro-gbia ti Nzapa, Babâ ti mbi.” 30Na peko ti so ala he bia ti gondango Nzapa awe, ala mu lege ti gue na hoto ti a-olive.

Fade Pierre ayeke bere tënë ti Jésus

(Marc 14.27-31; Luc 22.31-34; Jean 13.36-38)

31 Tongaso, Jésus atene na adisiple ti lo: “Gi na bi so, fade ala kue ayeke zia mbi ti hon, ngbanga ti so Mbeti ti Nzapa atene: ‘Fade mbi yeke fâ wabatango-taba si ataba ni ayeke kangbi kirikiri.’ 32 Me tongana mbi zingo ande na kuâ, mbi yeke hon kozo ti ala na Galile.” 33Pierre atene na lo: “Tongana azo kue azia mo ahon, fade mbi yeke zia mo oko pepe.” 34Jésus akiri tënë na lo: “Mbi tene na mo taa-tënë: gi na bi so, kozo titene koli-kondo atoto, fade mo yeke bere tënë ti mbi fani ota.” 35Pierre atene na lo: “Tongana ayeke titene mbi na mo, e kui, mbi yeke bere tënë ti mo oko pepe!” Adisiple ni kue atene gi oko tënë so.

Jésus asambela na Getsemane

(Marc 14.32-42; Luc 22.39-46)

36Jésus na adisiple ti lo asi na mbeni ndo so iri ni Getsemane si lo tene na ala: “Ala duti na ndo so, mbi yeke gue kâ ti sambela.” 37Lo mu Pierre na amolenge ti Zebede use na tere ti lo si lo na ala ague. Vundu ato nda ti gbu lo si mbeto asara lo ahon ndoni. 38Tongaso lo tene na ala: “Be ti mbi ayeke na vundu mingi, mo baa mo tene, mbi ye ti kui kuingo; ala ngba na ndo so, mbi na ala, e lango pepe!” 39Lo hon yongoro kete, lo ti, lo kpo li ti lo na sese, lo sambela, lo tene: “Babâ ti mbi, tongana lege ayeke daa, ayeke nzoni kopo ti pasi so ahon yongoro na tere ti mbi. Me mbi ye pepe titene mo sara ye so be ti mbi aye, me mo sara gi ye so be ti mo aye.” 40Na pekoni, lo kiri lo ga na mbage ti adisiple si lo wara ala na lango. Lo tene na Pierre: “Ala lingbi ti ngba na le ti ala tongaso ndali ti mbi na ya ti ngbonga oko pepe? 41Ala lango pepe! Ala sambela si ala ti na ya ti ye ti tarango be pepe. Yingo ti zo ayeke na nzara ti sarango nzoni ye, me zo ni ayeke na ngangu pepe.”

42Lo kiri lo gue yongoro ti fani use ni si lo sambela, lo tene: “Babâ ti mbi, tongana kopo so alingbi ti hon yongoro na tere ti mbi pepe si mo ye mbi nyon ni, ayeke nzoni mo sara gi ye so be ti mo aye!” 43Lo kiri lo ga na mbage ti adisiple ni si lo wara ala na lango, ngbanga ti so lango ahon ndö ti ala. 44Jésus azia ala, lo kiri lo gue yongoro si lo sambela ti fani ota ni, lo tene gi oko tënë so lo tene kozoni so. 45Lo kiri lo ga na mbage ti adisiple si lo tene na ala: “Ala ngba ti lango? Ala ngba ti wu tere ti ala? Ngbonga ni aga nduru awe; a yeke mu *Molenge ti Zo ti zia lo na maboko ti azo ti siokpari. 46Ala londo e gue! Baa, zo ti kango mbi asi awe!”

Azo agbu Jésus

(Marc 14.43-50; Luc 22.47-53; Jean 18.3-12)

47So Jésus angba ti tene tënë, Judas, mbeni oko ti adisiple baleoko na use asi; lo ga na azo gbani gbani na tere ti lo. Azo ni kue amu ayongoro zeme na akeke na maboko ti ala. Akota wayango-sandaga na *akangba ti azuife laa atokua ala. 48Judas, zo ti kango Jésus, afa na azo ni ye so fade lo yeke sara; lo tene: “Zo so mbi yeke su ande ngbangba ti lo, andaa lo laa. Ala gbu lo.” 49Gi hio tongaso, Judas aga nduru na tere ti Jésus si lo tene na lo: “Wafango-ye, mbi bara mo!” Na pekoni, lo su ngbangba ti lo. 50Jésus atene na lo: “Ita, mo sara ye so mo ga ngbanga ni so!” Azo so amu peko ti Judas aga, ala zia maboko na ndö ti Jésus si ala gbu lo. 51 Mbeni disiple oko ti Jésus agboto yongoro zeme ti lo, lo de mbeni zo ti kua ti kota wayango-sandaga si lo fâ mê ti lo. 52Jésus atene na lo: “Kiri yongoro zeme ti mo na plase ni, ngbanga ti so azo so kue afâ zo na yongoro zeme, fade ala yeke kui kuâ ti yongoro zeme. 53Mo baa mo tene, mbi lingbi ti hunda na Babâ ti mbi ti mu na mbi maboko pepe? Lo lingbi ti tokua na mbi fafadeso *a-ange so wungo ti ala ahon wungo ti aturugu na ya ti akota bongbi baleoko na use. 54Tongana mbi iri a-ange ni, fade tënë ti Mbeti ti Nzapa ayeke ga taa-tënë tongana nyen? Mbeti ti Nzapa atene, fade ye ni ayeke duti tongaso.”

55 Na pekoni, Jésus atene na gba ti azo ni, atene: “Ala ga na ayongoro zeme na akeke ti gbu mbi, mo baa mo tene, mbi yeke zo ti nzi! Lakue mbi yeke duti na ya ti kota da ti Nzapa ti fa ye, me ala gbu mbi pepe! 56Me ye so kue asi tongaso si tënë ti yanga ti awayanga-Nzapa so a su na mbeti ando so aga taa-tënë.” Tongaso adisiple kue azia lo si ala kpe ahon.

Jésus na gbe ti azo ti Kota Bongbi ti Fango Ngbanga

(Marc 14.53-65; Luc 22.54-55,63-71; Jean 18.13-14,19-24)

57Azo so agbu Jésus so ague na lo na Kaife, kota wayango-sandaga. Andaa awafango-ndia na *akangba abongbi tere ti ala kâ awe. 58Pierre ague na peko ti Jésus, me lo yeke gue nduru nduru pepe; lo gue ngbii lo si na ya ti gbagba ti kota wayango-sandaga. Lo li si lo na azo ti kua ayeke duti na sese na ndo oko, lo yeke ku ti baa wala ye ni ayeke hunzi ande tongana nyen.

59Akota wayango-sandaga na azo kue ti *Kota Bongbi ti Fango Ngbanga ayeke gi lege ti wara mbeni tënë ti mvene ti bi na li ti Jésus, ti fâ ngbanga ti kuâ na li ti lo; 60me ala wara ni pepe, ataa so azo mingi aga na atënë ti mvene ti bi na li ti lo. Ti hunzi na ni, ambeni koli use aga aluti 61 si ala tene: “Koli so atene lani, atene: ‘Mbi lingbi ti kungbi kota da ti Nzapa si mbi yeke kiri ti leke ni na ya ti lango ota.’ ” 62Kota wayango-sandaga alondo si lo tene na Jésus: “Mo yeke na tënë ti kiri na ni pepe? Tënë ti nyen laa azo so ayeke tene na iri ti mo so?” 63Me Jésus azi yanga oko pepe. Kota wayango-sandaga atene na lo: “Mbi hunda na mo ti deba yanga ti mo, na iri ti Nzapa so ayeke na fini, mo tene na e: Mo yeke *Mesii, Molenge ti Nzapa?” 64 Jésus akiri tënë na lo: “Gi tënë ni laa mo tene awe so. Me mbi tene na ala so fade ala yeke baa *Molenge ti Zo aduti na tere ti Nzapa so ngangu ti lo ahon angangu kue; lo yeke duti na mbage ti maboko ti lo ti koli. Lo yeke londo na yayu, lo duti na ndö ti ambinda ti ga.” 65 Tongaso kota wayango-sandaga ni asuru ya ti bongo ti lo si lo tene: “Lo zonga Nzapa awe! E ye ti kiri ti hunda mbeni zo na tënë ngbanga ti nyen? Ala ma zonga so lo zonga na Nzapa so awe! 66Ti be ti ala, ala tene nyen?” Azo ni akiri tënë na lo: “Lo lingbi na kuâ!” 67 Na pekoni, ala tuku ngu ti yanga ti ala na le ti lo si ala kpo lo na gobo, ambeni apika ngbangba ti lo, 68ala tene: “Mo so mo yeke *Mesii so, sara tongana wayanga-Nzapa: fa na e, zo wa laa apika mo?”

Pierre abere tënë ti Jésus

(Marc 14.66-72; Luc 22.56-62; Jean 18.15-18,25-27)

69Pierre ayeke duti na gigi na ya ti gbagba ni. Mbeni wali so ayeke sara kua kâ aga nduru na tere ti lo si atene na lo: “Mo nga, mo yeke mu peko ti Jésus, zo ti Galile so!” 70Me Pierre abere na le ti azo kue, lo tene: “Mbi hinga tënë so mo ye ti tene so pepe!” 71So Pierre amu lege ti gue na yanga ti gbagba, mbeni wali nde so ayeke sara kua kâ abaa lo si atene na azo so ayeke kâ, atene: “Koli so ayeke mu nga peko ti Jésus, zo ti Nazaret!” 72Pierre akiri abere; lo deba yanga ti lo, lo tene: “Mbi hinga koli so oko pepe!”

73Kete na pekoni, azo so ayeke kâ aga nduru na Pierre si ala tene na lo: “Taa-tënë, mo nga, mo yeke mbeni zo ti Jésus! Sarango tënë ti mo aka mo awe.” 74Pierre ato nda ti deba yanga ti lo, atene: “Ayeke nzoni Nzapa afâ ngbanga na li ti mbi tongana mbi tene mvene! Mbi hinga koli so oko pepe!” Gi na pekoni, koli-kondo atoto. 75Pierre adabe ti lo na tënë so Jésus atene lani na lo, atene: “Kozo titene koli-kondo atoto, fade mo yeke bere tënë ti mbi fani ota.” Lo sigigi si lo toto ngangu mingi.

Currently Selected:

Matthieu 26: MNF2010

Highlight

Copy