Luc Kete tënë na ndö ti Nzoni Tënë so Luc asu na mbeti
Kete tënë na ndö ti Nzoni Tënë so Luc asu na mbeti
Na ya ti Mbeti ti Nzapa, Luc asu ambeti use: “Nzoni Tënë so Luc asu na mbeti” na “Aye so awatokua asara”. Na ya ti kozo mbeti ti lo, Luc atene tënë na azo ti Christ so ala yeke azuife pepe si ala yeke tene yanga ti greke. Mingi ti azo ni ahinga lege ti sarango ye ti azuife nga na lege ti dutingo ti ala nzoni pepe. Nilaa Luc afa lege ti sarango ye ti azuife na ala, lo fa nga na ala nda ti atënë so ala ma ya ni gbaa. Tongaso si awande so ayeke na ndö ti dunia kue, na ngoi kue alingbi ti hinga atene, Jésus ayeke Wasongo azo na kuâ.
Molongo ti atënë so Luc asu na mbeti ague legeoko na ti Matthieu nga na ti Marc; me tënë so awu mingi na ya ti Nzoni Tënë ti Luc ayeke tënë ti tambula ti Jésus ti londo na Galile ngbii asi na Jérusalem (9.51 – 19.28). Na ndö ti tënë ti guengo ti Jésus na Jérusalem so fade lo yeke kui ande kâ, Luc atene tënë ti ambeni ye na ti ambeni mbai so mo yeke wara ni na ya ti atanga ti Nzoni Tënë pepe. Tapande ni ayeke tënë ti guengo ti Jésus ti baa Marie na Marthe (10.38-42), toli ti nzoni zo ti Samarii (10.29-37) nga na toli ti molenge so agirisa si akiri na babâ ti lo (15.11-32).
Luc afa nga akota ye so lo baa na ya ti fango tënë ti Jésus nga na ya ti fini ti lo. Aye ni ayeke so:
– Taa azo so Jésus aye ala ayeke azo so amba ti ala abaa ala tongana ambumbuse zo: amolenge, azo ti mawa nga na awande. Nzapa ahinga atene, azo so kue ahinga lo pepe, ala girisa awe. Nilaa, lo tokua Jésus Christ ti soo azo so kue ayamba Jésus.
– Luc asu mbeti so ndali ti azo ti Christ so ayeke na mosoro. Nilaa, lo fa peko ti ambai mingi so Jésus atene na ndö ti mosoro. Tapande ni ayeke toli ti zo ti mosoro nga na toli ti sioni zo ti kua. Nzoni Tënë ti Luc atene na adisiple ti Jésus ti mu mosoro ti sara na Nzapa nga na amba ti ala.
Na ya ti akodro so azo ti Rome aduti gbia daa, azo ayeke tene lani, atene: “Kota gbia ti Rome laa ayeke Kota Gbia”; me azo ti Christ ayeke tene ti ala, atene: “Jésus Christ laa ayeke Kota Gbia”, ngbanga ti so Nzapa azingo Jésus na kuâ si lo mu na lo komandema na ndö ti aye kue. Na ya ti Nzoni Tënë ti Luc, azo ayeke iri Jésus Kota Gbia ahon ti so a yeke iri lo na ya ti atanga ti Nzoni Tënë.
Ambai so Luc asu na ya ti Nzoni Tënë ti lo ato nda ni na Jérusalem (Kota gere 1 – 2) si ako nda ni na Jérusalem (Kota gere 24). Na peko ti so Jésus azingo na kuâ, lo si na adisiple ti lo, ala baa lo, lo yeke na fini; tere ti ala anzere mingi. Kozoni si Jésus ato nda ti iri adisiple ti lo, kozoni si lo sara akua nde nde na le ti azo kue, Yingo-Vuru asi lo singo (Kota gere 3 – 4). Na ndani, adisiple ti lo awara nga Yingo-Vuru (24.49). Tongaso, ala lingbi nga ti sambela, ti he bia ti fa tënë ti nzoni be ti Nzapa tongana ti Jésus.
Currently Selected:
Luc Kete tënë na ndö ti Nzoni Tënë so Luc asu na mbeti: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010