Luc 4

Zabolo atara be ti Jésus

(Matt 4.1-11; Marc 1.12-13)

1So Jésus asi na Yingo-Vuru, lo londo na ngu ti Jourdain lo kiri, Yingo amu lo, ague na lo na benyama. 2Kâ, Zabolo atara be ti lo na ya ti lango baleosio. Na ya ti alango so kue, lo te kobe oko pepe si na pekoni, nzara asara lo. 3Tongaso Zabolo atene na lo: “Tongana mo yeke Molenge ti Nzapa, mo mu yanga na têne so titene aga kobe!” 4 Jésus akiri tënë na lo: “Mbeti ti Nzapa atene: ‘Fade zo ayeke ngba na fini gi na lege ti kobe oko pepe.’ ”

5Zabolo amu Jésus, ague na lo yongoro na nduzu si na ya ti kete ngbonga, lo fa na lo akodro ti dunia kue 6si lo tene na lo: “Fade mbi yeke mu na mo ngangu na amosoro ti dunia so kue, ngbanga ti so a mu ni kue na mbi awe; mbi lingbi ti mu ni na zo so be ti mbi aye. 7Tongana mo kuku na gbe ti mbi si mo voro mbi, fade aye so kue ayeke ga ti mo.” 8 Jésus akiri tënë na lo: “Mbeti ti Nzapa atene: ‘Mo voro *Kota Gbia, Nzapa ti mo si mo sara kua gi na lo oko!’ ”

9Zabolo akiri amu Jésus ague na lo na Jérusalem, lo zia lo na li ti kota da ti Nzapa si lo tene na lo: “Tongana mo yeke Molenge ti Nzapa, mo londo na ndo so, mo ti na sese, 10 ngbanga ti so Mbeti ti Nzapa atene: ‘Fade Nzapa ayeke mu yanga na *a-ange ti lo ndali ti mo, ti bata mo.’ 11 Mbeti ti Nzapa atene nga, atene: ‘Fade ala yeke yo mo na maboko ti ala si mo pika gere ti mo na mbeni têne pepe.’ ” 12 Jésus akiri tënë na lo: “Mbeti ti Nzapa atene: ‘Mo tara be ti *Kota Gbia, Nzapa ti mo pepe.’ ” 13So Zabolo agi lege ti tara be ti Jésus gbaa awe, lo zia lo si lo hon ti ku mbeni lango nde.

Jésus ato nda ti kua ti lo na Galile

(Matt 4.12-17; Marc 1.14-15)

14Jésus alondo akiri na Galile, ngangu ti Yingo-Vuru asi lo singo. Sango ti lo amu ya ti akodro ni kue. 15Lo yeke fa ye na ya ti ada ti sambelango Nzapa ti ala si azo ni kue ayeke gonda lo.

Azo ti Nazaret ake tënë ti Jésus

(Matt 13.53-58; Marc 6.1-6)

16Jésus akiri na gbata ti Nazaret, ndo so a bata lo daa. Na *lango ti wungo tere, lo li na ya ti da ti sambelango Nzapa tongana ti so lo yeke sara lakue. Lo londo ti diko Mbeti ti Nzapa 17si ala mu na lo mbeti ti wayanga-Nzapa Ésaïe. Lo zi ya ni si lo wara ndo so a su daa, atene:

18 “Yingo ti *Kota Gbia ayeke na ndö ti mbi,

ngbanga ti so lo tuku mafuta na li ti mbi

si lo tokua mbi ti fa Nzoni Tënë na azo ti mawa.

Lo tokua mbi ti tene na azo ti kanga so a zi ala awe,

ti tene na awaziba so le ti ala ayeke zi,

ti zi azo na ya ti pasi ti ala,

19ti tene Nzoni Tënë na azo:

na ngu so, fade Kota Gbia ayeke sara nzoni be na ala.”

20Jésus akanga mbeti ni, lo mu ni na zo so ayeke sara kua na ya ti da ti sambelango Nzapa si na pekoni, lo duti. Le ti azo so kue ayeke na ya ti da ni atuku na ndö ti lo. 21Tongaso lo to nda ti tene na ala, atene: “Laso, tënë ti Mbeti ti Nzapa so aga taa-tënë awe ndali ti ala so ama ni.” 22Ala kue ayeke gonda lo; li ti ala kue akpe ndali ti tënë ti nzoni be so ayeke sigigi na yanga ti lo. Ala hunda ndo, atene: “Molenge ti Joseph so laa pepe?” 23Lo tene na ala, lo tene: “Fade ala yeke tene na mbi *mato so: ‘Wanganga, mo kai kobela ti mo wani!’ Ala yeke tene nga na mbi, atene: ‘E ma tënë ti aye so mo sara na Kapernaum; mo sara ni nga na kodro ti mo ge ma!’ ” 24 Jésus akiri atene: “Mbi tene na ala taa-tënë: azo ayeke yamba wayanga-Nzapa pepe na gbata so a du lo daa. 25 Mbi tene na ala: na ngoi ti Élie, awali-mua ayeke mingi na Israel si na ya ti ngu ota na nze omene, ngu-Nzapa apika pepe; kota nzara ati na ya ti kodro ni. 26Me Nzapa atokua Élie na mbeni oko na popo ti ala pepe, me lo tokua lo na gbata ti Sarepta, na sese ti Sidon, na da ti mbeni wali-mua. 27 Azo ti buruma nga asi singo ando na Israel na ngoi ti wayanga-Nzapa Élisée; me buruma ti mbeni zo oko na popo ti ala ahunzi pepe, gi ti Naaman, zo ti sese ti Sirii.”

28Azo so kue ayeke na ya ti da ti sambelango Nzapa ni ama tënë so si le ti ala abe na ngonzo. 29Ala londo, ala gboto lo asigigi na lo na ya ti kodro ni si ala gue na lo na li ti hoto so ala sara gbata ti ala na ndö ni titene ala pusu lo, abi lo na gbeni ti fâ lo. 30Me lo sigigi na popo ti ala si lo hon ti lo.

Koli so sioni yingo ayeke na ya ti lo

(Marc 1.21-28)

31Jésus ague na Kapernaum, mbeni gbata ti Galile. Kâ, lo fa ye na azo na *lango ti wungo tere. 32 Azo so ama lo, li ti ala kue akpe ngbanga ti fango ye ti lo. Biani, lo yeke fa ye tongana zo ti komandema. 33Na ya ti da ti sambelango Nzapa ni, mbeni koli ayeke daa, mbeni sioni yingo ayeke na ya ti lo. Lo dekongo ngangu, atene: 34“Ti mo na e nyen, Jésus, zo ti Nazaret? Mo ga ti fâ e laa! Mbi hinga mo: mo yeke zo ti nzoni kue so Nzapa azia mo nde si lo tokua mo.” 35Jésus asuku ngangu na yingo ni, atene: “Kanga yanga ti mo! Sigigi na ya ti koli so!” Sioni yingo ni akinda koli ni na sese na le ti azo kue si lo sigigi na ya ti lo. Me lo sara ye ti sioni oko na koli ni pepe. 36Li ti azo ni kue akpe si ala tene na popo ti ala, atene: “So mara ti tënë ti nyen laa? Lo yeke mu yanga na ngangu tongana gbia na asioni yingo si ala yeke sigigi!” 37Nilaa, sango ti Jésus amu ya ti kodro ni kue.

Jésus akai kobela na tere ti gba ti azo

(Matt 8.14-17; Marc 1.29-34)

38So Jésus asigigi na da ti sambelango Nzapa ni, lo gue na da ti Simon. Tere ti mama ti wali ti Simon amu wâ mingi si azo ni ahunda na Jésus ti sara mbeni ye ndali ti lo. 39Lo dingi tere ti lo na ndö ti mama ni, lo suku na kobela ti wâ ti tere ni si kobela ni alondo na tere ti lo. Gi na pekoni, mama ni alondo si ato nda ti sara na ala.

40Na lakui ni, azo so kue ayeke na azo ti kobela nde nde na da ti ala amu ala, aga na ala na Jésus. Lo zia maboko ti lo na ndö ti ala si kobela ti ala akai. 41Asioni yingo nga asigigi na ya ti azo mingi. Ala dekongo, atene: “Mo yeke Molenge ti Nzapa.” Me Jésus asuku ngangu na ayingo ni. Lo ke na ala ti tene tënë, ngbanga ti so ala hinga atene, lo yeke Christ.

Jésus afa tënë ti Nzapa na sese ti Judée

(Marc 1.35-39)

42So ndo ahan awe, Jésus asigigi si lo gue na ndo so zo ayeke daa pepe. Gba ti azo ayeke gi lo; so ala wara lo awe, ala ye ti gbanzi lo si lo hon na tere ti ala pepe. 43Me lo tene na ala: “Ayeke nzoni mbi fa nga Nzoni Tënë na azo ti ambeni gbata nde; Nzoni Tënë ti Kodro-gbia ti Nzapa. Biani, ayeke ngbanga ni laa Nzapa atokua mbi.” 44Nilaa lo fa Nzoni Tënë na ya ti ada ti sambelango Nzapa ti Judée.

Currently Selected:

Luc 4: MNF2010

Highlight

Copy