Luc 2

Dungo Jésus

(Matt 1.18-25)

1Na ngoi ni so, Auguste, kota gbia ti Rome asigigi na mbeni mbela so ahunda na azo ti sese ti lo kue titene a diko wungo ti ala. 2Kozo dikongo wungo ti azo ni aduti na ngoi so Kirinius ayeke govoronere ti sese ti Sirii. 3Azo kue ague ti su iri ti ala na mbeti, zo oko oko na gbata ti lo wani. 4Joseph nga alondo na gbata ti Nazaret, na sese ti Galile ti gue na Judée, na Betlehem, gbata so a du gbia David daa. Biani, lo gue kâ, ngbanga ti so lo yeke mbeni *hale ti David. 5Lo gue ti su iri ti lo na mbeti, lo na Marie, wali so lo ye ti mu lo; Marie ayeke na ngo. 6So ala yeke na Betlehem, lango titene Marie adu alingbi. 7Lo du kozo molenge ti lo ti koli. Lo kanga lo na bongo si lo zia lo na ya ti mbeni sanduku so anyama ayeke te ka kobe daa, ngbanga ti so ala wara ndo ti lango daa pepe na ya ti da ti agene.

Mbeni ange asi na awabatango-taba

8Ambeni wabatango-taba ayeke lani kâ; ala yeke lango na ya ti ngonda ti bata ataba ti ala na bi. 9Mbeni *ange ti *Kota Gbia asi na ala; gonda ti Kota Gbia aza na ndö ti ala si mbeto agbu ala mingi. 10Me ange ni atene na ala: “Ala sara mbeto pepe, ngbanga ti so mbi ga ti tene mbeni nzoni tënë na ala, tënë ni ayeke zia ngia na be ti azo kue. 11Laso, na ya ti gbata ti David, a du na ala Wasongo-zo awe; lo yeke Christ, Kota Gbia. 12Ye so ala yeke hinga lo na ni ayeke so: fade ala yeke wara fini molenge so a du lo, a kanga lo na bongo si a zia lo na ya ti mbeni sanduku so anyama ayeke te ka kobe daa.”

13Mo ye ti baa, a-ange mingi mingi ti yayu aga na tere ti kozo ange ni si ala bongbi, ahe bia ti gonda Nzapa, ala tene:

14“E gonda Nzapa so ayeke na yayu kâ

na ndö ti aye kue,

siriri na ndö ti sese na popo ti azo so lo ye ala!”

Awabatango-taba ague ti baa Jésus

15So *a-ange ni azia ala si akiri na yayu awe, awabatango-taba atene na popo ti ala, atene: “E gue na Betlehem, e baa ye so asi kâ, ye so *Kota Gbia afa tënë ni na e so.” 16Ala gue na loro si ala wara Marie na Joseph na fini molenge ni so ayeke lango na ya ti sanduku so anyama ayeke te ka kobe daa. 17So awabatango-taba ni abaa lo awe, ala fa peko ti tënë so ange ni atene na ala na ndö ti molenge ni. 18Azo so kue ama tënë ti awabatango-taba ni, li ti ala kue akpe. 19Ti Marie, lo ngba ti dabe ti lo na atënë so kue si lo yeke gbu li ti lo daa. 20Na pekoni, awabatango-taba ni amu lege si ala yeke kiri. Ala yeke gonda Nzapa na lege si ala yeke he bia na lo ndali ti aye so kue ala ma si ala baa so. Biani, aye ni kue asi alingbi na ye so ange afa na ala.

A mu iri na molenge ni

21 Lango miombe na pekoni, ala fâ molenge ni na *ganza si ala di iri ti lo Jésus. So ayeke iri so *ange afa kozoni si a mu ngo ti lo.

A gue na Jésus na ya ti kota da ti Nzapa

22 Ndembe so *Ndia ti Moïse afa titene ala gue *asukula asioni ti ala alingbi awe. Tongaso Joseph na Marie ague na Jésus na Jérusalem ti ya lo na *Kota Gbia. 23 Ala sara ye ni alingbi na tënë so a su na ya ti mbeti ti Ndia ti Kota Gbia: “Molenge-koli so kue azi lege ti dungo ni na mama ti lo, fade a yeke zia lo nde ndali ti Kota Gbia.” 24 Ala mu nga *sandaga alingbi na tënë ti Ndia ti Kota Gbia: ala mu *akolokoto use wala amolenge ti *mbipa ti vuru ni use.

25Mbeni koli ayeke na Jérusalem, iri ti lo ayeke Siméon; lo yeke zo ti mbirimbiri, lo mu be ti lo kue na Nzapa, lo yeke ku zo so ayeke ga ande ti soo azo ti Israel. Yingo-Vuru ayeke na Siméon. 26Yingo-Vuru atene ando na lo atene, lo yeke kui pepe ngbii lo baa Christ, lo so Kota Gbia ayeke tokua lo so. 27Yingo apusu lo si lo gue na ya ti kota da ti Nzapa. So babâ na mama ti Jésus, kete molenge so, aga na lo ti sara ye so Ndia ahunda na ala ti sarango ni, 28Siméon ayo molenge ni na ya ti maboko ti lo, lo mu singila na Nzapa, lo tene:

29“Kota Gbia, fadeso mo sara ye

alingbi na tënë ti yanga ti mo awe:

tongaso mo zia lege na zo ti kua ti mo

ti gue na siriri.

30Biani, le ti mbi abaa awe zo ti mo

so mo tokua lo ti soo azo na kuâ;

31mo leke lege ti songo azo ni na dawa ti azo kue.

32 Lo yeke lumiere so ayeke fa mo na azo ti amara kue;

lo yeke gonda ti azo ti Israel so ayeke azo ti mo.”

Siméon atene peko ti tënë ti Nzapa

33Li ti babâ na mama ti Jésus kue akpe ndali ti tënë so Siméon ayeke tene na ndö ti lo. 34Siméon asara tufa na ndö ti ala si lo tene na Marie, mama ti molenge ni, lo tene: “Baa, ndali ti Molenge so, fade azo ti Israel mingi ayeke ti si ambeni mingi ayeke londo. Molenge so ayeke ga mbeni ye ti kite; 35tongaso si atënë ti be ti azo mingi ayeke sigigi polele. Ti mo mama ni, fade vundu ayeke so be ti mo tongana ka ti likongo.”

Anne, wali so ayeke wayanga-Nzapa

36Mbeni wali nga ayeke daa, lo yeke wayanga-Nzapa, iri ti lo Anne; lo yeke molenge ti Penuel ti wali, zo ti mara ti Aser. Ngu ti lo ahon mingi. So lo mu koli na maseka ti lo, lo na koli ni asara ngu mbarambara. 37Na pekoni, lo ga wali-mua; lo yeke na ngu balemiombe na osio, lo ngba gi na ya ti kota da ti Nzapa; bi na lâ, lo yeke sara kua ti Nzapa, lo yeke ke kobe si lo yeke sambela. 38Gi na ndembe ni so, lo ga lo mu singila na Nzapa si lo tene tënë ti molenge ni na azo so kue ayeke ku lango so fade Nzapa ayeke zi Jérusalem na gbe ti ngbaa.

Kiringo ti babâ na mama ti Jésus na Nazaret

39 So babâ na mama ti Jésus asara ye so kue *Ndia ti *Kota Gbia ahunda na ala awe, ala kiri na sese ti Galile, na Nazaret, gbata ti ala. 40Molenge ni akono, lo kpengba; ndara asi singo na lo si Nzapa ayeke sara nzoni be na lo.

Jésus ague na ya ti kota da ti Nzapa

41 Na ya ti ngu oko oko, babâ na mama ti Jésus ayeke gue na Jérusalem ndali ti *matanga ti Pake. 42So ngu ti Jésus alingbi baleoko na use awe, lo na ala ague na matanga ni tongana ti so ala yeke sara lakue. 43So matanga ni ahunzi awe, babâ na mama ti Jésus amu lege ti kiringo ni, me molenge ni angba ti lo na Jérusalem, ala hinga ye oko daa pepe. 44Ala baa ti ala atene, Jésus ayeke na popo ti amba ti ala, azo ti lege. Ala tambula ngbii asi na lakui, ala to nda ti gi lo na popo ti asongo ti ala nga na azo so ala hinga ala. 45So ala wara lo pepe, ala kiri na Jérusalem ti gi lo. 46Na lango ota ni, ala wara lo na ya ti kota da ti Nzapa; lo duti na popo ti awafango-ye, lo yeke ma ala si lo yeke hunda nga ala na atënë. 47Azo so kue ayeke ma lo, li ti ala kue akpe ndali ti hingango ye ti lo nga ndali ti atënë so lo yeke kiri na ni na ala. 48So babâ na mama ti lo abaa lo, li ti ala kue akpe si mama ni atene na lo: “Molenge ti mbi, mo sara mara ti ye tongaso na e ngbanga ti nyen? Baa, mbi na babâ ti mo, e gi mo gbaa, be ti e kue ayeke na nduzu.” 49Jésus akiri tënë na ala: “Ala gi mbi ngbanga ti nyen? Ala hinga atene, alingbi mbi duti na ya ti da ti Babâ ti mbi pepe?” 50Me ala hinga nda ti tënë so lo tene na ala so pepe.

51Na pekoni, Jésus na ala akiri na Nazaret. Lo yeke ma yanga ti ala. Mama ti lo angba ti dabe ti lo na aye so. 52 Jésus akono, lo ga kota, lo mai na ndara si lo ga nzoni na le ti Nzapa nga na le ti azo.

Currently Selected:

Luc 2: MNF2010

Highlight

Copy