Luc 11

Jésus afa lege ti sambela

(Matt 6.9-13; 7.7-11)

1Mbeni lâ, Jésus ayeke sambela na mbeni ndo. So lo hunzi ti sambela awe, mbeni disiple ti lo oko atene na lo: “*Kota Gbia, fa na e lege ti sambela tongana ti so Jean afa na adisiple ti lo.” 2Lo tene na ala: “Tongana ala yeke sambela, ala tene:

Babâ,

ayeke nzoni azo ane iri ti mo

so ayeke nde si ayeke nzoni kue;

ga, mo le-gbia na ndö ti azo.

3Mu na e na ya ti lango oko oko,

kobe so alingbi na e.

4Zi siokpari ti e na li ti e,

ngbanga ti so e nga, e yeke zi siokpari na li ti azo

so kue asara sioni na e.

Sara si e ti na ya ti ye ti tarango be pepe.”

5Jésus akiri atene na ala: “Tongana mbeni zo na popo ti ala ayeke na mba ti lo so lo ye lo si lo gue na da ti mba ti lo ni na be ti bi, lo tene: ‘Ita ti mbi, mu na mbi mapa ota, fade mbi yeke kiri ni na mo. 6Mbeni mba ti mbi so mbi ye lo mingi alondo na mbeni kodro aga na ndo ti mbi; me mbi yeke na kobe ti mu na lo pepe.’ 7Tongana mba ti lo ni angba gi na ya ti da kâ si atene na lo: ‘Zia mbi kpoo! E kanga yanga ti da awe; mbi na amolenge ti mbi, e yeke na gbogbo awe, lege titene mbi londo ti mu na mo mapa ayeke daa pepe’; 8mbi tene na ala: mba ti lo ni ayeke londo si lo yeke mu na lo ye so lo ye! Lo yeke londo pepe, ngbanga ti so ayeke mba ti lo, me lo yeke londo, ngbanga ti so mba ti lo ni angba ti so li ti lo. 9Ndani laa, mbi tene na ala: ala hunda ye si fade a yeke mu na ala; ala gi ye si fade ala yeke wara; ala pika yanga ti da si fade a yeke zi na ala. 10Zo so ahunda ye, fade a yeke mu na lo; zo so agi ye, fade lo yeke wara; zo so apika yanga ti da, fade a yeke zi na lo. 11Babâ wa na popo ti ala, tongana molenge ti lo ahunda na lo susu, lo yeke mu na lo ngbo? 12Wala tongana lo hunda na lo para-kondo, lo yeke mu na lo kparakongo? 13Ala so ayeke azo ti sioni, ala hinga ti mu anzoni ye na amolenge ti ala. Tongaso, Babâ so ayeke na yayu, alingbi ti mu ande Yingo-Vuru na azo so ahunda ni na lo pepe?”

Jésus akiri tënë na ndö ti tënë so azo abi na li ti lo

(Matt 12.22-30; Marc 3.20-27)

14Jésus atumba mbeni sioni yingo so ayeke na ya ti mbeni buburu. So sioni yingo ni asigigi awe, buburu ni ato nda ti tene tënë si li ti gba ti azo akpe kue. 15 Me ambeni atene: “Na ngangu ti Beelzebul, makonzi ti asioni yingo laa lo yeke tumba asioni yingo so!” 16 Ti ambeni zo ni, ala ye ti sara si lo ti na ya ti gbanda ti ala. Nilaa ala hunda na lo titene lo sara mbeni ye ti kpene ti fa atene, lo londo na Nzapa. 17Me lo hinga tënë ti be ti ala si lo tene na ala: “Kodro so kue azo ni akangbi si ala yeke tiri na popo ti ala, fade kodro ni ayeke buba; ada ti ya ni kue ayeke kungbi oko oko kue si ayeke tuku na ndö ti tere. 18Tongana Satan atiri na lo wani, fade komandema ti lo ayeke ngba tongana nyen? Mbi tene tongaso, ngbanga ti so ala tene, mbi yeke tumba asioni yingo na ngangu ti Beelzebul. 19Tongana mbi yeke tumba asioni yingo na ngangu ti Beelzebul, azo ti ala ayeke tumba ti ala asioni yingo ni na ngangu ti zo wa? Gi azo ti ala laa ayeke fa ande na gigi so ala yeke sara ye na legeni pepe! 20Me tongana mbi yeke tumba asioni yingo ni na ngangu ti Nzapa, andaa kodro-gbia ti Nzapa asi na ala awe.

21“Tongana ngangu koli ayeke na aye ti bira ti lo si lo yeke bata da ti lo, aye ti lo ayeke duti na siriri. 22Me tongana mbeni zo so ngangu ti lo ahon ti koli so aga si akinda lo, amu aye ti bira ti lo so kue lo zia be ti lo daa, fade lo yeke kangbi aye ti lo ni na azo.

23 “Zo so ayeke na mbage ti mbi pepe, andaa lo yeke wato ti mbi; zo so ayeke bongbi ye legeoko na mbi pepe, andaa lo yeke kangbi ya ti aye ni kirikiri.”

Kiringo ti sioni yingo na ndo so lo sigigi daa

(Matt 12.43-45)

24“Tongana sioni yingo asigigi na ya ti zo awe, yingo ni ayeke fono na ndo so ngu ayeke daa pepe ti gi mbeni ndo ti wu tere ti lo daa. So lo wara ndo ni pepe, lo tene: ‘Mbi yeke kiri na ya ti da ti mbi so mbi londo daa si mbi sigigi so.’ 25So lo kiri lo si, lo wara da ni, andaa a balee ya ni, a leke ni kue nzoni awe. 26Tongaso, lo gue, lo mu ambeni yingo mbarambara so ayeke sioni ahon lo; lo na ala aga ali na ya ti da ni si ala duti daa. Na pekoni, dutingo ti zo ni akiri aga sioni ahon ti kozoni.”

Nzoni dutingo

27So Jésus angba ti tene tënë so, mbeni wali na popo ti gba ti azo adekongo, atene: “Ti lo nzoni, wali so amu lani ngo ti mo si amu me na mo ti nyon ni so!” 28Me Jésus atene na lo: “Ti ala nzoni, azo so ama tënë ti Nzapa si ala sara ye alingbi na ni!”

Azo ahunda titene Jésus asara mbeni ye ti kpene

(Matt 12.38-42)

29 So azo ayeke bongbi gbani gbani na tere ti Jésus, lo to nda ti tene tënë na ala, lo tene: “Azo ti fadeso ayeke azo ti sioni; ala yeke hunda ti baa mbeni ye ti kpene, me fade ala yeke baa mbeni ye ti kpene oko pepe, gi ye ti kpene so asi ando na Jonas so alingbi awe. 30 Legeoko tongana ti so Jonas ayeke ando mbeni ye ti kpene ndali ti azo ti Ninive, fade *Molenge ti Zo ayeke duti mbeni ye ti kpene ndali ti azo ti fadeso. 31 Na lango ti fango ngbanga, fade gbia-wali ti kodro so ayeke na Mbongo ayeke londo ti luti na le ti azo ti fadeso ti fâ ngbanga na li ti ala, ngbanga ti so lo londo ando na nda ti sese yongoro si lo ga ti ma atënë ti ndara so Salomon ayeke tene. Mbeni zo ayeke ge so ayeke kota ahon Salomon! 32 Na lango ti fango ngbanga, fade azo ti Ninive ayeke londo ti luti na le ti azo ti fadeso ti fâ ngbanga na li ti ala, ngbanga ti so azo ti Ninive akiri na lege ti Nzapa. Na ndembe so azo ti Ninive ama tënë so Jonas afa, ala zia ngbene lege ti sarango ye ti ala. Mbeni zo ayeke ge so ayeke kota ahon Jonas!”

Toli ti wâ ti lamba

(Matt 5.15; 6.22-23)

33 “Zo ayeke zia wâ na ya ti lamba ti honde ni wala ti zia ni na gbe ti ta pepe. Me lo yeke zia ni na ndö ti mbeni ye na nduzu titene azo so ali abaa ndo na ni. 34Le ti mo ayeke tongana lamba ti tere ti mo. Tongana le ti mo ayeke nzoni, tere ti mo kue ayeke na ya ti vurungo ndo. Me tongana le ti mo abuba, tere ti mo kue ayeke na ya ti vukongo ndo. 35Mo sara hange si vurungo ndo so ayeke na ya ti mo akiri avuko pepe! 36Tongana tere ti mo kue ayeke na ya ti vurungo ndo si mbeni vukongo ndo oko ayeke daa pepe, fade tere ti mo ni kue ayeke na ya ti vurungo ndo, tongana ti so wâ ti lamba ayeke za na tere ti mo.”

Jésus asuku ngangu na afarizien nga na awafango-ndia

(Matt 23.1-36; Marc 12.38-40)

37So Jésus ayeke tene tënë, mbeni *farizien atisa lo ti te kobe na da ti lo. Lo li si lo duti ti te kobe ni. 38So farizien ni abaa Jésus ayeke te kobe, me lo sukula maboko ti lo kozoni pepe, li ti lo akpe. 39Tongaso *Kota Gbia atene na lo: “Ala afarizien, ala yeke sukula tere ti kopo na ti sembe, me nzara ti nzi na ti aye ti sioni asi singo na be ti ala. 40Ala so li ti ala ayeke daa pepe so! Nzapa so aleke tere, lo nga laa lo leke ye so ayeke na ya ni pepe? 41Ala mu na azo ti mawa ye so ayeke na ya ti akopo na asembe ti ala. Tongaso si aye kue ayeke ga ande *nzoni ndali ti ala.

42 “Mawa na ala, afarizien! Ala yeke mu na Nzapa *dime ti akugbe ti kasa ti yaka ti ala, ataa akete kete ye ti yaka ti ala. Me ala girisa taa ye so Nzapa aye: dutingo mbirimbiri na azo nga na yengo Nzapa. Baa, ye so ala lingbi fade ti sara laa, me ala girisa nga tanga ni pepe.

43“Mawa na ala, afarizien! Ala ye ti duti gi na ndö ti akozo ngende na ya ti ada ti sambelango Nzapa, ala ye nga titene azo abara ala na ndo so azo abongbi daa. 44Mawa na ala, ngbanga ti so ala yeke tongana adu ti kuâ so azo abaa ni pepe, ala hinga pepe si ala yeke tambula na ndö ni!”

45Mbeni oko ti awafango-ndia ni atene na lo: “Wafango-ye, tënë so mo yeke tene so, mo yeke zonga nga e laa!” 46Jésus akiri tënë na lo: “Mawa na ala nga, ala awafango-ndia, ngbanga ti so ala yeke zia kungba na li ti azo! Kungba ni ane ahon ngangu ti azo ni, me ala awafango-ndia ni, ala yeke ndu kungba ni na li ti maboko ti ala oko pepe! 47Mawa na ala, ala so ayeke leke adu ti kuâ ti awayanga-Nzapa pendere! Andaa akotara ti ala wani laa afâ ando awayanga-Nzapa ni! 48So ti fa atene, ala yeda na ye so akotara ti ala asara ni. Akotara ti ala afâ awayanga-Nzapa si ti ala, ala yeke leke adu ti kuâ ti awayanga-Nzapa pendere! 49Ndani laa, Nzapa atene na lege ti ndara ti lo, lo tene: ‘Fade mbi yeke tokua na ala awayanga-Nzapa na *awatokua. Ala yeke fâ ambeni na popo ti ala si ala yeke sara ngangu na ambeni.’ 50Tongaso, fade Nzapa ayeke hunda na azo ti fadeso ti kiri tënë na lo na ndö ti fango so azo afâ ando awayanga-Nzapa kue, ngbene ye so dunia abaa gigi, 51 ti londo na kuâ ti Abel ngbii asi na kuâ ti Zakarii, so akui na popo ti gbalaka ti da ti Nzapa na ti ndo so ayeke nzoni kue so. Mbi tene na ala taa-tënë: fade Nzapa ayeke hunda na azo ti fadeso ti kiri tënë na lo na ndö ti kuâ ti awayanga-Nzapa so!

52“Mawa na ala, awafango-ndia! Ala mu kerere so a yeke zi na yanga ti hingango ndo; me ala wani, ala li na ndo ti hingango ndo ni pepe. Azo so aye ti li, ala kanga lege ni na ala.”

53So Jésus alondo na ya ti da ni asigigi, awafango-ndia na afarizien ato nda ti gi tënë mingi na lo. Ala hunda lo na atënë na ndö ti aye mingi, 54ala ye ti sara si lo ti na ya ti gbanda ti ala gi na lege ti mbeni tënë ti yanga ti lo.

Currently Selected:

Luc 11: MNF2010

Highlight

Copy