Tongo nda ti aye 34

Siméon na Lévi akiri peko ti sioni so a sara na Dina

1 Dina, molenge-wali so Lea adu na Jacob, asigigi ti gue ti baa awali ti kodro ni. 2 Sishem, molenge ti Hamor, zo ti mara ti Hivi, makonzi ti kodro ni, abaa Dina, lo mu lo, lo hon na lo, lo gbu lo na ngangu si lo lango na lo. 3Lo mu be ti lo kue na Dina, molenge ti Jacob ti wali. Lo ye molenge-wali ni mingi si lo tene anzoni tënë na lo titene be ti lo ade. 4Lo tene na babâ ti lo Hamor: “Mu molenge-wali so na mbi titene lo ga wali ti mbi.” 5Jacob ama tënë ti ye ti kamene so Sishem asara na molenge ti lo Dina. Me ndali ti so amolenge ti lo ti koli angba na ngonda na anyama ti lo, lo zi yanga pepe, ngbii ala kiri na kodro si. 6Hamor, babâ ti Sishem ague na ndo ti Jacob ti tene tënë na lo. 7Amolenge ti Jacob alondo na ngonda akiri si ala ma tënë ti ye so asi so. Ala hinga atene so bubango ala laa. Ala sara ngonzo ngangu ngbanga ti ye so Sishem asara so. Biani, Sishem asara ye ti kamene mingi na Israel, so lo lango na molenge ti Jacob ti wali so; zo ayeke sara ye tongaso pepe na Israel. 8Me Hamor atene na ala: “Molenge ti mbi Sishem aye molenge ti ala ti wali so mingi. Ala mu lo na Sishem titene lo ga wali ti lo. 9Tongaso si e na ala e ga ambuki na lege ti mungo tere ti koli na wali: ala mu na e amolenge ti ala ti wali si ala mu nga amolenge ti e ti wali. 10Fade ala yeke sara kodro na e, sese ni ayeke ga ti ala: ala lingbi ti duti daa, ala lingbi ti ka aye daa; ala lingbi nga ti mu sese ni titene aga ti ala.”

11Sishem atene tënë na babâ ti Dina nga na a-ita ti lo ti koli, atene: “Ala baa mbi na nzoni na le; fade mbi yeke mu na ala ye so ala yeke hunda na mbi. 12Ala fa na mbi kota nginza ti peko ti lo nga na gba ti kadoo. Fade mbi yeke mu na ala ye so kue ala yeke hunda na mbi; me gi ye oko, ala mu na mbi molenge-wali ni titene lo ga wali ti mbi.” 13Amolenge ti Jacob akiri tënë na Sishem nga na babâ ti lo Hamor na mayere, ngbanga ti so Sishem asara ye ti kamene na ita ti ala ti wali Dina. 14Ala tene na ala, atene: “Lege titene e mu ita ti e ti wali na mbeni zo so afâ *ganza pepe so ayeke daa pepe. Tongana e sara tongaso, fade ayeke ga ye ti bubango iri ti e. 15E yeke yeda ti sara ye so ala hunda na e so gi tongana ala fâ akoli ti ala kue na ganza si ala ga tongana e. 16Tongaso si e yeke mu amolenge ti e ti wali na ala ti ga awali ti ala; e nga, e yeke mu amolenge ti ala ti wali ti ga awali ti e; e na ala e yeke sara kodro si e ga gi mara oko. 17Me tongana ala ke ti ma e si ala ke titene a fâ ala na ganza, e yeke zi molenge ti e ti wali na maboko ti ala si e yeke hon.”

18Tënë ti ala ni anzere na be ti Hamor na molenge ti lo Sishem. 19Maseka-koli ni aku pepe ti sara ye so ala hunda so, ngbanga ti so lo ye molenge ti Jacob ti wali mingi. Na popo ti amolenge ti babâ ti lo kue, lo laa azo akpe lo mingi. 20Hamor na molenge ti lo Sishem ague na ndo so azo ayeke bongbi daa na yanga ti gbata ti ala si ala tene na azo ti gbata ti ala ni, atene: 21“Azo so aye ti duti na siriri na e. Ayeke nzoni ala duti na kodro ti e, ala ka aye daa; sese ni ayeke ga ti ala biani. Fade e yeke mu amolenge ti ala ti wali ti ga awali ti e; e nga, e yeke mu amolenge ti e ti wali na ala ti ga awali ti ala. 22Me titene azo so ayeda ti sara kodro na e, titene e na ala e ga mara oko, ayeke nzoni akoli ti kodro ti e kue afâ ganza tongana ti so ala fâ ganza so. 23Tongana e yeda ti sara ye so ala hunda na e, fade ala ngba na popo ti e si anyama ti ala kue na aye ti ala ayeke ga ti e.” 24Azo so kue aga na ndo so azo ayeke bongbi daa na yanga ti gbata ni ayeda na tënë so Hamor na molenge ti lo Sishem atene; akoli so kue aga na yanga ti gbata ni afâ ganza.

25Na lango ota ni, so ka ti ganza ni ayeke so akoli ni, amolenge ti Jacob use, Siméon na Lévi, a-ita ti Dina, amu yongoro zeme ti ala, ala li na ya ti gbata ni na ngoi so azo ni abaa atene, ye kue ayeke na siriri si ala fâ akoli ni kue. 26Ala fâ nga Hamor na molenge ti lo Sishem. Ala mu Dina na ya ti da ti Sishem, ala sigigi na lo si ala gue. 27Tanga ti amolenge ti Jacob atuku na ndö ti akuâ ni si ala anzi aye so kue ayeke na gbata ni, ngbanga ti so a sara ye ti kamene na ita ti ala ti wali. 28Ala mu ataba, angasa, abagara, alele ti azo ni nga na aye so ayeke na ya ti gbata ni na aye so ayeke na yaka. 29Ala mu amosoro ti azo ni kue, amolenge ti azo ni na awali ti ala, ala mu aye so kue ayeke na ya ti ada na ngangu si ahon na ni.

30Tongaso Jacob atene na Siméon nga na Lévi: “Ala ga na tënë na tere ti mbi, ngbanga ti so ala sara si mbi ga sioni na le ti azo ti kodro ti Kanaan na ti Perizi. E yeke mingi pepe. Fade azo ni ayeke bongbi na ndö ti e si ala yeke fâ mbi, ala yeke hunzi mbi na azo ti sewa ti mbi kue.” 31Siméon na Lévi akiri tënë, atene: “Ayeke na legeni titene a sara ita ti e ti wali tongana wali-ndumba?”

Currently Selected:

Tongo nda ti aye 34: MNF2010

Highlight

Copy