Yona 2
2
Yona e Sunbin-Got eso Weng Bokolewse em Sang te.
1Beli, Yona em dol em kulin tem kel bise ding dim kabalak e, e Yawe akalem Sunbin-Got elo fililin weng sin mak bokolewomele:
2“Eke Yawe kutaka! Ne ilum kulusomi, kulo gaakemii,
ku nem gaanin be kiliko, dokonemselew te. (Sim Fut 120:1)
Sunbin-Got kutaka! Kuansiliw kawtiw im abiw atew kale kel amebomi, ‘Dokonema!’, kangsi kasike,
ku nem kangi weng be kiliko, kinkin ibolow kukuw kukunemselew te.
3Yawe kutaka! Ku nelo kuse okmun fian alelbin diw diw kalak da konemewi,
ne ka kel bisi te.
Okmun fian diw kel akim bilii,
ok be nem dim kel kawtol unse te! (Sim Fut 42:7)
4Unei, ne kulo bokokemomeli:
‘Ku nelo atin kuw konemew sako!’, kangsi kate,
ne kom am yol fian be iti fein atemoki te! (Sim Fut 31:22)
5Okmun fian be nem tikin dim kel unsomelei, e
nelo dukakan kenemei, ‘Nono memfu angoki?’, angsi te. (Sim Fut 69:1)
Kanenemei, okmun em alelbin em akikiw e kak so falal kasi konemse te.
6Ne okmun fian beem amgu yaman awet kebe dim beem afak uneko,
afak dakaw kalak bomi, fon unomin deiw mak ateminba kesi te.
Kate, Yawe nem Sunbin-Got kutaka! Ku nelo kuluselew kasike, ne bisi aneng wa dim be koleweko, matem telii,
ku nelo finik so ibolow dunemselew te.
7Yawe kutaka! Nem kuanomin kis kunum emdiw kesi ding dim kabalak be, (Sim Fut 142:5)
ne kom ibolow fukunsomelii,
nem ‘Dokonema!’, kangsi weng be kom am yol dim abiil tikin kawtem elo talse te.
8Ikalem dem banim dasuw-got ilo wangweng kukuw kukuyembiliw kawtiw i
Sunbin-Got em akalem kunum waneng ilo folok ibolow kukuyemkabe kukuw be dawkatikoko, kolewsiliw te. (Sim Fut 31:6)
9Kate nakalem ete kulo kuw kutikemeko, kom wiin ete kuw daokemsomi,
sim kutikemkabi te.
Kutikemsomi, nem fawtuk ayem weng bokokemsi weng bakati fein gelewoki te.
Nimtew angom? Yawe kutaka! Kukalem ete kuw kunum waneng im kuankemin deiw bul gewsi goto kelewko, ilo finik so deiw mo koyemkabelew Sunbin-Got kute kasike. (Sim Fut 3:8)”,
dangeko, Yawe elo dangse kale.
10Dangei, Yawe e dol fian sel beelo kitil weng mak bokolewomele: “Ku kame ok dilin benggew dim elo uneko, kom kunil kolewbelew kunum beelo wasan fok kelolewka!”, dangse kale. Dangei, e fein uneko, ok dilin benggew dim kel elo wasan fuko, matem da kolewse kale.
Currently Selected:
Yona 2: bhl
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
