Luke 22

Tomotau Yai Nuanua Iesu Ina‑nau‑vi‑anigi

(Mateu 26:1‐5, 14‐16; Marika 14:1‐2, 10‐11; Ioni 11:45‐53)

1Ka avaha Itouvuha Toneina vi‑maupwani. Ka toneina wayahina me Iudea ai palaua iapuni tunina, eha a pai vo‑vi‑nata nui ivo‑vine. 2Ka tau vi‑nomu mata‑genai, kadu Mosese ya veimea a tau viwavenena yai nuanua ananina Iesu ipoy'‑avini, ina‑nau‑vi‑anigi. Ka eha yai nuanua tomotau yoko inua‑goyo dewana wayahina, ka eha yai nuanua ivitana‑wahewahe.#22:2 Iuna aituhu inau‑vonuvonu ananina, o kadi aituhu ivitana‑wahewahe ananina, apaina me Rom ai tau veimea me Iudea yai tau eta‑naonao habuhabui dewa‑yaiyaiei. Wayahina, tau vi‑nomu mata‑genai kadu Mosese ya veimea a tau viwavenena imatamatauta. Ka aitam etawana wayahina inaunau‑nene, e dewana idedewei hivahivana, eha tomotau yoko mataia. 3Ka tuta aitamoata wayahina Satana omo Iudasa me Kariota wayahina, ka nuana inui, e veimeyei. Iudasa aitam Iesu a tau vi‑muni‑waiwai ai yau 12 wayahia.#Ioni 13:2, 27. 4Ka Iudasa omo tau vi‑nomu mata‑genai kadu Manua Vito‑pota a tau nau‑havia wayahia, e nui iaipupu medeina memeanina tauna Iesu na‑vauyei nimaia. 5Ka tau eta‑naonao‑naia idewa‑haiawa Iudasa yana vona wayahina, ka ivonei kina tupwai ivenei a nau‑pata wayahina. 6Ka Iudasa taui nui iawaehei aitamoata deina. Kadu iawaehei tauna potapota ka dunedune, ka aitam auyewa o kadi ioyoma wayahina tomotau yoko eha Iesu nui, ka avi tuta tauna avaha anamanei deina, akanai na‑mataedai, e taui ipoy'‑avini.

Iesu Tauna A Tau Vi‑muni‑waiwai Nui Iamam

(Mateu 26:17‐25; Marika 14:12‐21; Ioni 13:21‐30)

7Ka Itouvuha Toneina an' auyewa vin'‑omo, ka ioyomana me Iudea nau‑wawani Itouvuha vahitau sipiV ivunuvunui, ka palaua tunina nui ianiania.#NiT 12:1-27. 8Wayahina, Iesu Pita ka Ioni ainua vi‑nua‑dadanei, ka vi‑tunei, ine vivane ieta‑naoi, e yai Itouvuha Toneina inau‑vevewanei, ivo‑vi‑aiaia habuhabui wayahi.

9Ka taui ivi‑tanaiei, ivona, “Aveta baina nuanuam wayahika avo‑vi‑aiaia?”

10Ka vona‑nau‑patei, ivona, “Avi tuta unuinu Ierusalem nihenina, onoto aitam ya pai goi daudau avavanei vaniahami. Ka onotona uvi‑muniei, e aitam manua na‑nui. Ka itomi kadue manua‑nana nihenina una‑nu. 11Ka tau vi‑manua‑nana uvonei, una‑vona, ‘Yama Tau Viwavenena vi‑tanaiem, “Bubuna‑honota taua a tau vi‑muni‑waiwai nui Itouvuha Toneina an'‑ania aveta?” ’ 12E tauna aitam bubuna‑honota ananina manua hetana mamaei na‑viwavenemi, ka avaha ivo‑vi‑aiaia sita kadu vei wayahia, kadu gugua habuhabui deina. Ka bubuna‑honota‑nana nihenina anianina uvo‑vi‑aiaia wayahika.”

13Ka ainuai ine, ka dewaia aitamoata aitamoata ivaniahei Iesu yana vona wayahia deinake, ka Itouvuha Toneina anianina ivo‑vi‑aiaia wayahi.

Veimea Vovouna

(Mateu 26:26‐30; Marika 14:22‐26; 1 Korinita 11:23‐25)

14Ka avaha babau ionu iakwa, e Iesu tauna a tau vi‑muni‑waiwai nui idaudauva, ka nui iamam. 15Ka vonei, ivona, “Nuanuau ananina naona itomi nui Itouvuha Toneina anianina taina kan'‑ania, e munina au viha ananina avaniahei. 16Iuna, vona ahiahina, aniani taina vivane pai nau‑yehata wayahiu tanopia. Ka apaina Yaubada ya pai veimea nihenina tomotau Itouvuha Toneina an' anamana tunutunuhina in'‑anamanei, ka auyewana wayahina an'‑ani‑havinei.”

17Wayahina, aitam vei na wainanaV epei, ka nau‑kaiwa Yaubada wayahina, ka vonei, ivona, “Vei taina un'‑epei, ka aitamoata aitamoata wayahimia uvo‑patei una‑nimi. 18Ka avonemi, tuta ataina a itoava Yaubada ya pai veimea a vin'‑omana wayahina, eha kadu aitam tuta wainaV ana‑nim.”

19Ka nimna iakwa, e palaua epei, ka nau‑kaiwa Yaubada wayahina, ka pakeui, ka venei, ka vonei, ivona, “Palaua taina ininiu, ka yauke awaehei wayahimi. Dewa taina unuanuani, ka udedewei pai nuana wayahiu.”

20Ka anianina iakwa, e kadu aitam vei na wainaV epei, ka venei, ka vonei, ivona,

“Vei taina Yaubada yan' awaeha vovouna tau ma' tanopi wayahia, ka yauke dayahiu awaehei vivane awaehana vovouna vi‑putu. 21Kate onoto‑nana apaina na‑vauyeu, ataina tuta baina wayahina nui kamam.#Sam 41:9; Ioni 13:21-22. 22Apaina yauke, Tauna Vi‑tomotau, an'‑aniga Iginuma apa‑taputapu wayahiu deina, kate aioi onoto‑nana na‑vauyeu wayahina.”

23Ka a tau vi‑muni‑waiwai avaha ya vonana inononi, taui nuai vi‑tupatupa, ka matataui ivi‑tanatanaiei, ivonavona, “Kaiwadi, koiaka wayahikaia ana pata dewana na‑dewe?”

Koiaka Ana Wava Ananina?

24Kadu, ivi‑putu inau‑vonuvonu, iuna ivi‑tanatanaiei, “Koiaka wayahikaia vivane ana wava ananina? Yauke, a?”#Luk 9:46. 25Wayahina, Iesu vonei, ivona,

“KiniV taui eha me Iudea wayahia iveimeyei veimea toyoina wayahina. Kadu taui tau kaikaiwabo tanopia ai heta wayahia ivona, ‘Itoai tomotau yai tau vo‑taitai,’ ka ai heta iapa‑vidovidohei deina.#Mat 20:25-27; Mar 10:42-45. 26Ka eha nau‑wawanimi udedewe deina. Aituhu koiaka wayahimia ya nuanua apaina an' anamana na‑nata, tauna nau‑wawani na‑nua‑opu aitam tevana deina. Ka kadue yami tau eta‑naonao nau‑wawani tauna vi‑tau paisewa habuhabumi wayahimi.#Mat 23:11; Mar 9:35. 27Aituhu aitam onoto manuena amam, ka aituhu kadu aitam onoto paipaisewa, e aniani vo‑vi‑aiaia, koiaka ana wava ananina? Tau ma' tanopi medeina ivonavona? Vona ahiahina, ivoneka, ‘Tauna manuena amam ananina.’ Kate udueyeu. Yauke avin'‑omo tanopia vivane avi‑tau paisewa habuhabumi wayahimi. Wayahina, yau dewa eha tau ma' tanopi yai kiniV yai dewa deina.#Ioni 13:12-15.

28Vona ahiahina, itomi avaha umimini toyoina wayahiua yau tuta vitaia habuhabui wayahia. 29Akaka, avi tuta Amau yau pai veimea veneu, akanai avo‑patami, e nui kaveimeyei kiniV deina. 30Ka yau pai veimea nihenina nui kamam kadue kanimnim. Ka kadue aitamoata aitamoata wayahimia an'‑awaehemi pai ma' ahiahina wayahina umanuena, kadu aitamoata aitamoata wayahimia aitam me Isiraeli yai dede ai yau 12 wayahia unau‑yanahi.”#Mat 19:28.

Iesu A Tau Vi‑muni‑waiwai Nau‑dadana Ananina Ivaniahei

(Mateu 26:31‐35; Marika 14:27‐31; Ioni 13:36‐38)

31Ka Iesu ivona Simoni wayahina, “Simoni, Simoni enononi. Satana avaha an' awaeha vaniahei Yaubada wayahina, e habuhabumi na‑nau‑dadanimi, e goyona nihenimia na‑vaniahei, aitam tau baguna witiV utuna pouna ka utuna wagana na‑tana‑vewani deina. 32Ka Simoni, yauke avaha aviama wayahima, e yam vitumahana wayahiu eha evo‑haini. Apaina ena‑ihanua, ka kadu ena‑peu. Ka munia, avi tuta wayahina emavina wayahiua, ka evi‑muni‑havineu, wamke nau‑wawanim yam bagibagi vovouna vavaneim evo‑patai.”#Ioni 17:15.

33Ka Pita ivona, “Kauvea, yam vonana eha tunuhina, iuna ataina tuta yau ate‑vatu mamaei. Kadue aituhu ipoy'‑avinim itainim manua yohona wayahina, akanai au pata itainiu manua yohona wayahina deinake, o kadi aituhu inau‑vi‑anigim, akanai yawaiu awaehem inau‑vi‑anigiu deinake.”

34Ka Iesu vona‑nau‑patei, ivona, “Eha. Pita, avona ahiahina wayahima, ataina tuta a itoava mana‑putua wayahina evi‑ebueu tuta aitonu wayahia, ka ena‑vona wayahiu, ‘Eha onotona at'‑anamane!’ Ka munia kamkam onotona yana tou kanononi.”

Iesu Yana Vona Gugua Tupwai Wayahina

(Mateu 10:9; Marika 6:8; Luke 9:3; 10:4)

35Ka ya vonana Pita wayahina iakwa, e tauna a tau vi‑muni‑waiwai habuhabui vi‑tanaiei, ivona, “Nonova habuhabumi awakabimi avi‑tunemi Vane Ahiahina unaunau‑wahei. Eha yami kina, ka eha ami kode, ka eha ami ae‑yapayapami. Ka medeina? Aviani wayahina uvi‑kutakuta?”

Ka taui ivona‑nau‑patei, ivona, “Eha aitam. Ama pata ana noe.”#Luk 9:3; 10:4.

36Ka Iesu vonei, “Ataina tuta wayahina avonemi tunina. Ataina aituhu ami kode na kinana wayahimia, nau‑wawanimi un'‑epei, ka kadue aituhu yami kubukubu wayahimia, nau‑wawanimi un'‑epei. Ka aituhu eha yami inama, nau‑wawanimi ami kwama tupwai una‑imwaneyei, e inama uvi‑maiei. 37Iuna nonova aitam tau apa‑taputapu wayahiu iginumi deina, ivona,

‘Kadu tauna tau goyogoyoi nui idewa‑yaiyaiei.’

Ka tuta eha ani‑hoina na‑iakwa wayahina, iginumana wayahiu a nau‑yehai na‑vaniahei.”#Isa 53:12.

38Ka taui ivona‑nau‑pata, ivona, “Kauvea, edueyei. Yama inama ainua taina.”

Ka ivona, “Akanai. Ana pata deina.”

Iesu Viama Amana Wayahina

(Mateu 26:36‐46; Marika 14:32‐42)

39Ka Itouvuha Toneina iakwa, tauna a tau vi‑muni‑waiwai nui bubuna‑honota hetana ini‑tawanei, ka yana dewa deina omo Oya Olive wayahina. 40Ka avaha ivin'‑omo, wayahia ivona, “Tuta eha ani‑hoina na‑iakwa wayahina, e Satana na‑nau‑dadanimi. Wayahina, nau‑wawanimi uviama Yaubada wayahina, e bagibagi na‑venemi, ami pata utoha‑vi‑anaimi.”

41Ka vonana iakwa, e tauna a tau vi‑muni‑waiwai ni‑tawanei, ine tupwana, onoto ana pata hanu na‑one wayahina deina, ka aena vi‑tupa‑gum, e viama. Ka yana vona deina, ivona, 42“Amau, aituhu yam nuanua, aviamem hidahida tepaua potapotau ebou‑potei wayahiua. Ka yau nuanua ananina yam nuanua vin'‑omo, eha yauke yau nuanua.” 43Ka aitam anelose wahuma opu‑me, e vo‑vi‑vatui. 44Ka nuana ivita ani‑vainena, wayahina viama bagibagina, ka a mweahau opuopu tanopia dayaha bunuvina peupeu deina.

45Ka Iesu ya viamana nau‑yehai, e mini, mavina a tau vi‑muni‑waiwai wayahia, ka vaniahei vivane iaino‑ainei, iuna yai nua‑vita ananina wayahina iaihanua. 46Ka vonei, ivona, “Ia! Uaino‑ainemi! Umini, ka uviama Yaubada wayahina, iuna apaina ami nau‑dadana na‑omo, ka aituhu eha uviama, apaina goyona udewei.”

Tomotau Iesu Ipoy'‑avini

(Mateu 26:47‐56; Marika 14:43‐50; Ioni 18:3‐11)

47Ka Iesu ya vonana eha ta‑nau‑yehai, ka yoko avaha ivin'‑omo, ka Iudasa eta‑naonaoi. Tauna Iesu a tau vi‑muni‑waiwai ai yau 12 wayahia aitam. Ka Iudasa omo Iesu nepena, e nevanuana na‑maoi. 48Ka Iesu vi‑tanaiei, “Iudasa, eha ena‑ini‑yauyau eomo yauke, Tauna Vi‑tomotau, wayahiua, ka evauyeu aitam mao wayahina, a?”

49Ka avaha a tau vi‑muni‑waiwai aviani vin'‑omo ianamanei, ivi‑tanaiei, ivona, “Kauvea, medeina? Nau‑wawaniai inama wayahia avi‑naua?” 50Ka aitam wayahia eha ta‑potapota Iesu ya vona‑nau‑pata wayahina, ka yana inama si‑naia, ka tau vi‑nomu ananina a tau paisewa aitam tanihana ateina tana‑honoi.

51Ka Iesu ivona, “Ia! Ugenuana!” Ka Iesu onotona tanihana vo‑dadani, e vo‑vi‑aiaia.

52Iakwa, Iesu magigino tau vi‑nomu mata‑genai, ka Manua Vito‑pota a tau nau‑havia, ka kadu ononotoi anani wayahia, taui avaha ivin'‑omo ipoy'‑avini, ka vi‑tanaiei, ivona, “Yau dewa medeina? Aviani unuanua? Taua vivane havia a tau vi‑putu aitam, o medeina? Aviani iuna na inamami ka na punumaimi uvin'‑omo wayahiua upoy'‑aviniu? 53Avaha uanamanei, auyewa aitamoata aitamoata wayahina nui kamamaei Manua Vito‑pota nihenina, kate auyewaia nihenina eha uta‑vo‑vi‑aviniu. Ka ataina tuta udedewei taina deinake, iuna ataina tuta Satana ya veimea bagibagina.”

Pita Iesu Vi‑ebuei

(Mateu 26:57‐58, 67‐75; Marika 14:53‐54, 66‐72; Ioni 18:12‐18, 25‐27)

54Wayahina, Iesu ipoy'‑avini, ka itaini ineiei tau vi‑nomu ananina ya manua wayahina. Ka Pita enoma vi‑muniei.#Mar 14:53-54. 55Ka manua upuna wayahina taui Iesu ipoy'‑avini inau‑hohona ka avaha ai ipoui. Ka Pita omo ka nui imanuena. 56Ka aitam tau paisewa vavinena avaha Pita manuena dueyei, e habuhabui wayahia ivona, “Onoto taina Iesu nui adueyei.”

57Ka Pita vi‑ebua, ivona, “Vavinem, eha tauna at'‑anamane.”

58Ka munia, tuta eha ani‑hoina iakwa wayahina, aitam onoto Pita dueyei, e vonei, ivona, “Kadu wamke aitam a tau vi‑muni‑waiwai wayahia!”

Ka Pita ivona, “Ia! Yauke eha!”

59Ka babau aitamoata munia, e kadu aitam onoto yaiana wayahia ivona, “Eha vitupu, onoto taina tauna nui ini‑awana. Iuna ya ponaitu vivane me Galili yai ponaitu!”

60Ka Pita vonei, ivona, “Eha! Avonem eha at'‑anamane aviani wayahina evonavona!” Ka Pita ya vonana eha ta‑iakwa, ka kamkam onotona toutou. 61Ka Kauvea magigino, e matana onei Pita matana wayahina, ka dune‑vi‑anai. Ka Pita Iesu yana vona nuani tutana Kauvea ivona, “Ataina naona evi‑ebueu tuta aitonu wayahia, ka munina kamkam onotona yana tou.” 62Wayahina, Pita nuana ivita ananina, e iopu vuvunaha ka tou vi‑mohai, iuna ya ini‑yauyau ani‑vainena.

63Ka tau nau‑havia‑naia Iesu idune‑vi‑avini ivi‑putu ivi‑waipoei ka ivunuvunui. 64Ka kadu matana ana bwa' iyohoni, ka yai vi‑waipo wayahina ivunuvunui, ka ivi‑tanatanaiei, ivona, “Wamke tau apa‑taputapu aitam, a? Akanai ka, koiaka vunum?” 65Ka kadu vona goyona habuhabuna wayahina imana‑giboei deina.

Ononotoi Anani Iesu Ivi‑tanatanaiei

(Mateu 26:59‐66; Marika 14:55‐64; Ioni 18:19‐24)

66Ka waganai gininia wayahina, me Iudea ai tau veimea inau‑hohona, vivane ononotoi anani, ka tau vi‑nomu mata‑genai, ka kadu veimea a tau viwavenena. Ka Iesu iomanei niwania ivi‑au‑mini. 67Ka ivonei, ivona, “Aituhu wamke vivane Tau Ito‑yavuha‑nana, akanai evoneai deina.”

Ka Iesu vona‑nau‑patei, ivona,

“Aituhu avonemi, eha uvitumahaneu,#Ioni 3:12. 68ka aituhu avi‑tanaiemi, ‘Aviani wayahina eha uvitumahaneu, vivane yauke Tau Ito‑yavuha?’, eha uvona‑nau‑patau tunuhina. 69Ka tuta tepakaia eha a ito‑vewana wayahina, yauke, Tauna Vi‑tomotau, amanuena Yaubada Bagibagi‑vainena ateina wayahina.”#Dew 7:56.

70Wayahina, habuhabui ivi‑tanai‑havine, ivona, “Kaiwadi, wamke vivane Yaubada Natu‑hoina, a?”

Ka vona‑nau‑patei, ivona, “Aituhu uvonavona wayahiu deina, yami vona tunuhina.”

71Wayahina, taui matataui ivona, “Akanai. Eha nau‑wawanika mani tomotau kavaniahei ya goyona ihaeyei wayahikaia. Iuna avaha yana vona vitupu kanononi, ka vonana ana heta wayahina nau‑wawanika kadewa‑yaiyaiei.”

Currently Selected:

Luke 22: MVN

Highlight

Copy