Ioni 7

Iesu Ine Vekevekeke Toneina Wayahina

1Ka dewaia iakwa, e Iesu papani Galili nihenina ni‑vivivina, ka eha ya nuanua papani Iudea nihenina na‑tutu‑vivina, iuna me Iudea yai tau eta‑naonao yai nuanua ina‑nau‑vi‑anigi.#Ioni 5:18. 2Ka avaha Vekevekeke Toneina ana tuta vi‑mwaupwani, e me Iudea ivo‑vi‑aiai.#7:2 Me Isiraeli ai veimea Mosese wayahina veimeyei Vekevekeke Toneina idedewei. Ponimana aitamoata aitamoata nihenina yoko aitamoata aitamoata ivanevane Ierusalem wayahina, ka tenoke vekevekeke iyoneyonei, e wiki aitamoata nihenina imamaei nihenina. Dewana aitam pai nuana yai tupua‑nenenehi yai vin'‑omana papani Egipita wayahina. Taui anata imamaei ponimana ai yau 40 nihenia, ka eha yai manua. Taui yai pai ma' vekevekeke kadu ine ai heta. #Lev 23:34. 3Wayahina, Iesu vavaneina ivonei, ivona, “Papani taina eni‑tawanei ena‑ne papani Iudea wayahina, e tenoke am tau vi‑muni ai pata yam dewa‑bagibagi idudueyei.” 4Kadu ivonei, ivona, “Eha aitam koiaka dewa hivahivai dedewei, e ana wava na‑nata. Wayahina, aituhu wamke yam nuanua tomotau habuhabui in'‑anamanem, akanai nau‑wawanim taum eviwavenem idudueyem.” 5(Vavaneina iaipuipupu deina, iuna taui kadu eha ita‑vitumahane vivane tauna Tau Ito‑yavuha‑nana.)#Dew 1:14.

6Ka Iesu vonei, ivona,

“Yauke yau tuta eha ata‑vaniahe, apaina. Kate itomi wayahimi, aituhu avi tuta yami nuanua una‑ne, akanai tuta‑nana tuta ahiahina wayahimi, e ami pata una‑ne. 7Iuna eha ana pata tau ma' tanopi inau‑nikonikoiemi. Kate taui inau‑nikonikoieu, iuna tuta tuta taui mataia yai dewa asi‑vin'‑omanei vivane goyona. 8Ahiahina! Itomi una‑ne tonei taina wayahina. Yauke taua eha ana‑ne. Iuna, yau tuta ahiahina eha ta‑vin'‑omo.”

9Iesu avaha ivona deina, e tauna ana heta Galili nihenina mamaei.

10Ka Iesu vavaneina tauna ini‑tawanei, e taui ine tonei‑nana Ierusalem wayahina, kadu munia Iesu papani Galili ni‑tawanei ine tonei‑nana wayahina, kate hivahivana, ka eha aitam koiaka t'‑anamane. 11Ka tonei‑nana nihenina me Iudea yai tau eta‑naonao Iesu inenenei, kadu ivi‑tanatanaiei, ivonavona, “Tauna aveta?”

12Ka tanoi wayahina tomotau habuhabui matataui ivi‑awa‑yaya Iesu wayahina, ka inau‑vonuvonu taina deina. Tupwai ivonavona, “Tauna onoto ahiahina,” kate tupwai ivonavona, “Eha! Tauna tau vitupu, ka tomotau vo‑vi‑banabanai.” 13Ka eha aitam koiaka ta‑vonavona Iesu wayahina tomotau yoko mataia. Iuna me Iudea habuhabui taui yai tau eta‑naonao imatamatautei.

14Ka avaha tonei‑nana ana wiki niwanina, Iesu Manua Vito‑pota a pai vi‑wauna wayahina inu, e vi‑putu tomotau viwavenei. 15Wayahina, tutana me Iudea yai tau eta‑naonao inononi, taui nuai vi‑tupatupa ananina kadu matataui ivi‑tanaiei, ivona, “Tauna eha aitam tuta wayahina ta‑iaiava baina yama pai anamana ananina nihenina. Wayahina, aveta wayahina onoto taina ya nua‑uya vaniahei? Kaiwadi!”#Mat 13:54; Luk 2:47.

16Akaka Iesu nau‑patei, ivona,

“Yauke yau nua‑uya eha taua wayahiua ta‑vin'‑omo, kate au tau vi‑tune tauna ya nua‑uya veneu, aviwavenena.#Ioni 12:49; 14:10. 17Ka aituhu aviyaivia ivi‑nua‑dadani, e Yaubada ya nuanua idedewei, apaina taui yau viwavenena in'‑anamanei vivane Yaubada wayahina vin'‑omo, eha taua wayahiua ta‑vin'‑omo. 18Aituhu aviyaivia yai nuenuea iviwavenena, yai nuanua taui ai wava isi‑nai, ivo‑vi‑natei. Kate aituhu koiaka a tau vi‑tune ana wava si‑nai, vo‑vi‑natei, tauna onoto ahiahina ka tunuhina, ka tauna nihenina eha aitam aviani goyona.#Ioni 8:50. 19Vona ahiahina, Mosese ami veimea venemi, kate eha aitam koiaka wayahimia ta‑vivi‑muni ahiahina. Aituhu veimeana uvivi‑muni ahiahina, aviani iuna yami nuanua una‑nau‑vi‑anigiu?”#Dew 7:53; Rom 2:21-24.

20Ka yoko‑naia yana vona inau‑patei, ivona, “Ia! Nua gawagawamina ununum vo‑vi‑magiginoei, wayahina evonavona deina! Koiaka wayahiaia dewa‑dadani na‑nau‑vi‑anigim?”#Ioni 8:48; 10:20.

21Ka Iesu yai vonana vona‑nau‑patei, ivona,

“Auyewa tapanono wayahina dewa‑bagibagina aitamoata adewei, e onoto avo‑vi‑aiaiei, vidoha. Wayahina, itomi nuami vi‑tupatupa ananina. 22Kate medeina itomi yami dewa auyewa tapanono wayahina? Mosese veimeyemi itomi natunatumi ononotoi wagai udabedabe‑neiei pai dune wayahina. (Ka vona tunuhina, veimeana eha Mosese wayahina ta‑vin'‑omo, kate nonova yaka tupua‑nenenehi dewana ivi‑putui, ka dewana taui wayahia vin'‑omo.)#Lev 12:3; Nao 17:9-13. 23Wayahina, dewana tevana ononotoi wayahia udedewei auyewa tapanono wayahina, iuna Mosese ya veimea uvi‑muniei, ka eha ubwege. Wayahina, aviani iuna unau‑havieu tutana auyewa tapanono wayahina onoto avo‑vi‑aiaiei vidoha‑vainei?#Ioni 5:8-10, 16. 24Avi tuta tomotau yai dewa unau‑yanahi utana‑vewani, kadi ahiahina o goyona, eha nau‑wawanimi yai dewa ai dune ana heta wayahina uvi‑nua‑dadani, kate nau‑wawanimi yai dewa iuna unau‑yanahi.”

Kaiwadi, Iesu Vivane Tau Ito‑yavuha, O Eha?

25Ka tupwai me Ierusalem ivona, “Kaiwadi, tau eta‑naonao yai nuanua onoto taina ina‑nau‑vi‑anigi, a? 26Kate udueyei! Tauna avaha tomotau niwania mimini ka vonavona wayahia, ka eha aitam koiaka movina ta‑vito‑pote. Medeina? Yaka tau eta‑naonao avaha iawaehei vivane tauna Tau Ito‑yavuha? 27Eha ana pata. Iuna onoto taina ya meagai avaha kanamanei. Kate avi tuta Tau Ito‑yavuha‑nana na‑omo, eha aitam koiaka ya meagai n'‑anamane.”#7:27 Tomotaui inuanua Iesu ya tupua meagai Nasareta nihenina, papani Galili nihenina, kate eha. Iesu ya tupua vin'‑omo meagai Betelehem wayahina, papani Iudea nihenina. Taui inuanua avaha ianamanei tunuhina, kate eha it'‑anamane‑vidoha. Wayahina, aveta Iginuma ivona, “Avi tuta Tau Ito‑yavuha‑nana na‑omo, tomotau eha tauna ya tupua a papani it'‑anamane‑vidoha!”, vonana vivane vona tunuhina. #Ioni 7:41; 9:29.

28Ka Iesu ya viwavenena Manua Vito‑pota a pai vi‑wauna nihenina eha ta‑iakwa, ka movina ananina wayahina ivona, “Ika, itomi avaha uanamaneu. Ka kadu avi papani wayahina aomo avaha uanamane‑yehai. Yauke aomo papani taina wayahina, kate eha taua yau nuanua ana heta adewei deina. Au tau vi‑tune‑nana, tauna yana dewa ahiahina kadu tunutunuhina akanai. Kate itomi eha ut'‑anamane koiaka tauna.#Mat 11:27; Ioni 8:55. 29Ka yauke anamanei, iuna tauna vi‑tuneu, ka kadu ani‑tawanei avin'‑omo baina tanopia.”

30Ka vonana wayahina tomotau tupwai yoko‑nana nihenina idewa‑dadani ipoy'‑avini. Ka eha aitam koiaka wayahia ta‑vo‑dadani. Iuna tauna eha yana tuta ta‑vaniahe yan' aniga wayahina.#Ioni 7:44. 31Ka tomotau habuhabui yoko‑nana nihenina ivitumahanei ka ivona, “Vona ahiahina, onoto taina dewa‑bagibagi habuhabui avaha dedewei. Avi tuta Tau Ito‑yavuha‑nana na‑omo, kadi ana pata tauna ya dewa‑bagibagi onoto taina ya dewa‑bagibagi nata‑tawane?”

Tau Nau‑havia Iomo Iesu Ina‑yohoni

32Ka tomotau ivi‑awa‑yaya Iesu wayahina deina. Ka avaha Parisi dewaia inononi, e taui kadue tau vi‑nomu mata‑genai taui yai tau nau‑havia ivi‑tunei, e Iesu iyohoni. Wayahina, tau nau‑havia‑naia iomo, e yana vona inononi.

33Ka Iesu ivona, “Tuta kutakutana ana heta nui kamamaei. Apaina amavina tauna au tau vi‑tune‑nana wayahina. 34Ka apaina uneneneu, kate eha uvaniahau. Ka auyewana wayahina papani tunina wayahina amamaei, ka itomi eha ami pata papani‑nana wayahina un'‑omo.”#Ioni 8:21; 13:36.

35Wayahina, me Iudea‑naia matataui ivi‑vonavona, ivona, “Aveta wayahina tauna na‑ne vivane apaina eha kavaniahe? Kaiwadi, tauna na‑ne me Iudea‑naia, taui nonova yai meagai ini‑tawanei ine mani papani, e me Girisi nui imamaei? Kadi tenoke tauna me Girisi viwavenei, a? 36Ya vonana aviani an' anamana? Iuna ivona, ‘Apaina uneneneu, kate eha uvaniahau,’ ka kadu ivona, ‘Papani tunina wayahina amamaei, ka itomi eha ami pata papani‑nana wayahina un'‑omo.’”

Vekevekeke Toneina An' Auyewa Pai Nau‑yehata

37Ka toneina an' auyewa ananina auyewa pai nau‑yehata. Ka auyewana wayahina Iesu yoko niwania mini, ka movina ananina vi‑hone, ivona, “Aituhu aviyaivia wayahimia magami ayayana, akanai un'‑omo wayahiua, e una‑nim.#Lev 23:36; Isa 55:1; Ioni 4:14. 38Ka Iginuma ivona deina,

‘Yawai a daudau au tau vitumahana nuana wayahina

n'‑am‑iwaiwahi.’”#Isa 58:11.

39Ka Iesu tauna ya vonana wayahina ipuipupu Yaubada Nuana Ahihinata wayahina. Ka aituhu aviyaivia Iesu ivitumahanei, apaina Nuana Ahihinata na‑nu nihenia, mamaei. Ka auyewa tanoi wayahina, Nuana Ahihinata eha ta‑nuinu tomotau nihenia, iuna Iesu eha wahuma ta‑vane, kadu tauna eha didigana ta‑vaniahe. Apaina.#Ioni 16:7; 20:22; Dew 2:4.

40Ka tomotau habuhabui Iesu ya vonana inononi, ka tupwai ivona, “Vona ahiahina, onoto taina vivane Tau Apa‑taputapu‑nana.”#Ioni 6:14.

41Ka tupwai kadue ivona, “Tauna vivane Tau Ito‑yavuha‑nana.”

Kate tupwai eha yai nuanua, ka ivona, “Vona ahiahina, Tau Ito‑yavuha‑nana ya tupua eha Galili wayahina!#Ioni 1:46. 42Medeina Iginuma voneka? Ivona vivane Tau Ito‑yavuha‑nana Davida yana dede wayahina omomo, kadu Davida ya meagai Betelehem nihenina na‑tupua. Ka Betelehem eha papani Galili nihenina! Wayahina, eha ana pata tauna vivane Tau Ito‑yavuha‑nana.”#Sam 89:3-4; Mik 5:2. 43Wayahina, tana‑vewana vin'‑omo tomotau‑naia niwania deina. 44Ka tupwai yai nuanua Iesu ipoy'‑avini, kate eha aitam koiaka ta‑vo‑dadani.

Me Iudea Yai Tau Eta‑naonao Iva‑hamwahamwana

45Ka tau nau‑havia‑naia imavi tau vi‑nomu mata‑genai wayahia kadue Parisi wayahia. Akaka taui tau nau‑havia‑naia ivi‑tanaiei, ivona, “Aviani wayahina itomi eha uta‑poy'‑avini, ka eha uta‑omane baina wayahiaia?”

46Ka tau nau‑havia‑naia ivona, “Onoto tanoi yana vona ahihi‑vainena. Eha kadu aitam koiaka deina.”#Mar 1:22.

47Ka Parisi ivona, “Ia! Kaiwadi, tauna nonomi, kadu itomi nuami epei, a? 48Ka avaha uanamanei, eha aitam koiaka itoai tau veimea o itoai Parisi wayahiaia Iesu ta‑vitumahane. Eha!#Ioni 12:42. 49Yoko taina ivitumahanei, kate taui mwagemwagei, iuna eha Mosese ya veimea it'‑anamane‑vidoha. Wayahina, ataina Yaubada taui ai nau‑pata goyona venevenei.”

50Kate aitam tau veimea wayahia ana wava Nikodemusi. Nonova ioyoma tauna omo Iesu wayahina, e ainua iaipupu. Ka tauna yaiana vonei, ivona,#Ioni 3:1-2. 51“Itoka aka veimea ivona deina, eha nau‑wawanika tomotau kan'‑apa‑goyogoyo‑kavokavovo. Naona nau‑wawanika onoto kanononi, ka aituhu ya goyona kavaniahei deina, akanai, munia aka pata kadewa‑yaiyaiei.”

52Ka tau eta‑naonao‑naia kadu Nikodemusi iyapoi, ivona, “Ia! Kaiwadi, wamke kadu aitam tevana Galili, a? Aituhu Iginuma ena‑iavi tunuhina, en'‑anamanei eha aitam tau apa‑taputapu Galili wayahina na‑omo.”#Ioni 7:41-42.

53Ka ipupuna iakwa, ka aitamoata aitamoata wayahia imavina yai megeia.

Currently Selected:

Ioni 7: MVN

Highlight

Copy