Mark 11
11
Yesu i Rui au Jerusalem
(Matthew 21:1-11; Luke 19:28-40; John 12:12-19)
1Yesu a tauvotagho maitehi muriya po hita gheꞌeta au Jerusalem, yana hi ai gheꞌeta au Betage ma Bethany, Oya Olive augheregherena. Anima a tauvotagho ruwagha 2i riwehi, ma i pariꞌaharehi ipa, “Ona nae meyagai aunaomi ona ghegheꞌetaiyana, apo donki yaubona hi raghihi po e maꞌamaꞌae, egha aiya ghehauna ita geru dadani, ona ohei po ona neiyaꞌi wehidana.#11:2 Mai Judea ahi nota yana rava yamoyamona ahi bagibagi donki e dewadewai. Donkina geruna yana ei atataiyeta da Yesu i neneꞌi a nuwahubana me nuwahopuhopu guyau. 3Ma aiyaꞌi ina raubayademi inapa, ‘Aiwa aubaina we o dewadewai?’ yana ona riwei, ‘Onapa Bada i rauhogharei ma apo mara tuponaꞌava, ma ina himirameeiyaꞌi.’”
4Aubaina ahi ruwagha hi nae po donkina yaubona au tayaha rava hi raghihi numa au mataꞌetana po i mahimahiri hi nehaghai, yana hi oheꞌohei, 5ma nahidana rava hi mahimahiri yana hi raubayadehi hipa, “Aiwa aubaina donkina yaubona o oheꞌohei?”
6Po a tauvotagho ruwagha hi paribeehi, Yesu me i ririwanehi nanaꞌarena, anima ravahi hi viꞌaninehi po hi naiyei. 7Maranai donkina hi neiya auwarina, yana ahi anirauhawawara au uputuwana hi taꞌuri ma autepana Yesu i tughura.#2 Kings 9:12-13
8Ma rava maghamaghauhi ahi anirauhawawara au tayaha hi taꞌuri ma ghehauhi ghihi au ꞌwapu hi tarai ma au tayaha hi taꞌuri.#11:8 John 12:13, auwarina yana rava ghihi ruguruguhi au tayaha hi taꞌuri ma Yesu hi viꞌateꞌatei ma hi vokaokaohei me guyau. 9Ma rava aiyavo hi tayatayaha po waimurihi hi otuꞌotu ma hipa, “Maimaituwa ta votaraghaiyei! Maimaituwa ina viꞌahiꞌahini, tauna Bada wavanei e neneꞌi!
Votaraghae!#11:9 ‘Hosana’ Aramaic ponahiyei aunaona yana ‘ma viyawahaniꞌai’ ma marina yana ‘votaraghae’ ma ‘vokaokaoha’. Ma egana 9–10 auwarina rava Psalm 118 hei babaniyei, yana votaraghae ana psalm. Marina tauhi yana Yesu he vokaokaohei guyau nanaꞌarena.
Waiꞌahiꞌahinana tauna auwarina Bada wavanei e neneꞌi. 10Waiꞌahiꞌahinana amata David a umavou e neneꞌi ma a vitaniwaga vouna ta kaohei!
Votaraghae Maimaituwa auwarina!”
11Anima Yesu i gheꞌeta au Jerusalem po i rui Maimaituwa a au Numa. Ma ginauri atapuhi i inana naiyehi, ma aita au i biga aubaina po a tauvotagho 12 maitehi hi nae au Bethany.
Yesu Kaiyaha i Parikubai
(Matthew 21:18-19)
12Maratom au ghehauna, maranai Yesu a tauvotagho maitehi Bethaniyei hi nenememeꞌi, yana am i voiyei. 13Ma kaiyaha rauruguna auheiya i inanai, aubaina i nae po anona ita baihei, ma maranai i nae auwarina yana egha anona ma rugunaꞌava, babana egha ana hauga rauꞌano. 14Anima Yesu kaiyahana i riwei ipa, “Egha meyanai aiya anom ina ameei!” #11:14 Maranai kaiyaha e raurugu yana e rauꞌano. Ma we au marana yana egha rauꞌano ana mara, ma i raurugu yana ita rauꞌano ma eꞌegha. Kaiyaha yana mara atapuna Israel he ampariruvaruvai (Micah 7:1-6). We ampariruvaruvana yana eyagi ruguruguna ma egha anona yana mai Israel egha anohi. Moses a raugagayo hei hanahanapuwei ma rava au matahi he rautaghoi ma auhinenihi yana egha anohi. Anima a tauvotagho aiwa i yatoyatoniya hi nonori.
Yesu, Tauviꞌuneꞌune Maimaituwa a Numei i Vireta Hopunehi
(Matthew 21:12-17; Luke 19:45-48; John 2:13-22)
15Maranai Yesu a tauvotagho maitehi hi raugheꞌeta au Jerusalem, yana Yesu i rui Maimaituwa ana Numa* au ganahobena ma tauviꞌuneꞌune i vireta hopunehi ma mane tauvivereverena#11:15 Dobu gheha manehi mai Judea ahi mane maitenahi hi vereverenei. ahi pata ma gabubu taugimareina ahi anitughura i buinihi. 16Ma i vighaꞌa po egha anivigimagimara hinaꞌavara ma hina vitupatuni Maimaituwa ana Numa ganahobenei. 17Maranai i hanahanapuhi yana ipa, “Maimaituwa ponana hi girugirumiya ipa, ‘Rava hina riwa da aꞌu numa yana dobu atapuna ravahi ahi pari numana.’ #Isaiah 56:7
Ma taumi o dewai po me rava danedanenehi, ahi numa.” #Jeremiah 7:11-15
18Gudutaupuyoweina* ghaeghaehi ma raugagayo tauvihanahanapuweina we hi nonori yana hi vikare po tayaha hi baibaiha vihiraghenana aubaina ma hi rovowei, babana rava boruhi a vihanahanapu auwarina hi amhuna.
19Maranai au i pompom yana a tauvotagho maitehi Jerusalem hi neꞌaharei.
Kaiyahana i Poꞌi
(Matthew 21:20-22)
20Maratomtom ghehauna Yesu a tauvotagho maitehi hi neꞌi po hita verauvira ma kaiyahana hi inanai yana i poꞌi. 21Ma Peter nuwanei i ghae po Yesu i riwei ipa, “Tauvihanahanapu ma inanai! Kaiyahana u parikubaiya i poꞌi.”
22Yesu i paribeehi ipa, “Maimaituwa ona vitumaghanei. 23Taꞌu yana riwa vaimaiha a ririwemi, rava aiya we oyana ina riwei inapa, ‘Ma nae po ma aharemem au boga’ ma egha ina raunuwa ruwaruwagha, ma ina vitumaghana* yana aiwa i ririweiya, apo ina wawara ma aubaina apo ina dewai. 24Yamna aubaina po a ririwemi. Maranai ginauri aiwa o raupari ma oi bagheiya, ona vitumaghana da boiboghi o vaini, yana apo aiwa oi bagheiya ina veremi. 25-26Maranai e raupari ma rava ghehauna i dewaboꞌa auwarim, yana ma ai nuwaꞌaharei, ma Amam au mara nanaꞌarena apo am dewaboꞌa ina nuwaꞌaharei.”
Mai Judea* ahi Babada Yesu a Vaivai hi Vitaravirevirei
(Matthew 21:23-27; Luke 20:1-8)
27Yesu, a tauvotagho maitehi hi gheꞌetame au Jerusalem, ma Yesu i naenae Maimaituwa ana Numa* au ganahobe, ma gudutaupuyoweina* ghaeghaehi, raugagayo tauvihanahanapuweina ma ahi babada hi neꞌi auwarina, 28po a vaivai hi vitaravirevirei hipa, “Aiya wavanei we dewahi e dewadewai? Bo aiya vaivaina i verem?”
29Ma Yesu i pariverehi ipa, “Aꞌu raubayada emosi a vitaravireviremi, po ona vimaihei ma apo a riwemi, aiwa vaivainei we ginaurihi a dewadewahi. 30Ona riweꞌu John aiya i riwei po i ambabataito: Maimaituwa bo rava?”
31Tauhiꞌava hi vikare po hi taratarapiri vivira hipa, “Me ta riwanei, inapa ta paribeei tanapa Maimaituwa, yana apo inapa, ‘aiwa aubaina John egha ota vitumaghanei?’ 32Wate apo egha tana riwa da rava hi riwei.” Babana rava yana John hi vitumaghanei, da tauna peroveta, po patarahi hi rovowehi.#Luke 20:6 33Po ahi paribeeyana Yesu auwarina yana hipa, “Egha ata hanapuwei.”
Ma Yesu i riwehi ipa, “Taꞌu nanaꞌarena apegha a riwemi, da aiwa vaivainei we ginaurihi a dewadewahi.”
Currently Selected:
Mark 11: TPA
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
