Luka 4

Yesu akemebwa

(Mat 4:1-11; Mar 1:12-13)

1Yesu yaira okuva ku Yorudani, ng'aidhwire Mwoyo Mutukuvu, era Mwoyo yaamutwala mu irungu, 2yaamala enaku amakumi ana (40) Sitaani ng'amukema. Mu nnaku edho tiyalya ku kantu koonakoona, era bwe dhaawaaku endhala yaamuluma.

3Sitaani yaamukoba ati: “Oba nga oli Mwana wa Katonda, koba eibaale lino lifuuke omugaati.”

4Yesu yaamwiramu ati: “Kyaghandiikibwa kiti, ‘Omuntu taba mulamu lwa mugaati gwonka.’ ”#Ma 8:3

5Agho Sitaani yaamutwala ku lusozi era mu kaseera akazira ghe kaaga yaamulaga obwakyabazinga bwonabwona. 6Yaamukoba ati: “Ndidha kukugha obukumu ku bwakyabazinga obwo bwonabwona n'ebitiibwa byabwo, kuba byampeebwa era ye mba nhenze ye mbigha. 7Kale bw'okuba amakiryaivu n'onsinza, byonabyona biidha kuba bibyo.”

8Yesu yairamu ati: “Kyaghandiikibwa kiti, ‘Osinzanga Musengwa Katonda wo, era ni yenka y'ogheerezanga.’ ”#Ma 6:13

9Baava agho Sitaani yaamutwala e Yerusalemu yaamuta ku kasolya ak'eisinzizo, yaamukoba ati: “Oba oli Mwana wa Katonda va ghano weesuule ghansi 10kuba kyaghandiikibwa kiti, ‘Aliragira bamalaika be baakulabirira, baakukuuma’#Zab 91:11

11era kiti, ‘Balikulera mu ngalo dhaibwe olobe kwekonta kigere ku ibaale.’ ”#Zab 91:12

12Yesu yaamukoba ati: “Kyaghandiikibwa kiti, ‘Tokemanga Musengwa Katonda wo.’ ”#Ma 6:16

13Sitaani ng'amaze okumukema mu ngeri yoonayoona, yaamuviira okutuusa ng'ebiseera bituuse.

Yesu atoolera omulimo gwe mu Galilaaya

(Mat 4:12-17; Mar 1:14-15)

14Agho Yesu mu maani ga Mwoyo Mutukuvu yairayo e Galilaaya, era kyawulikika mu biketezo byonabyona ebyetooloire agho. 15Yaayegeresa mu sinagoga dhaibwe nga boonaboona bamutaamu ekitiisa.

Yesu bamuboola e Nazarethi

(Mat 13:53-58; Mar 6:1-6)

16Yaatuuka e Nazarethi ye yakulira, ku Sabbato yangira mu sinagoga nga bwe yali amanhiriire, yaasituka okusoma. 17Baamugha ekitabo. Bwe yakiwumbulula yaatuuka aghaaghandiikibwa bino:

18“Omwoyo gwa Musengwa gundiku,#Isa 61:1-2

kuba yansiiga omuzigo okukobera abaavu Amawulire Amalungi.

Yantuma okukobera abasibe nti baidha kulekulwa,

n'abatulu nti baidha kubona.

Era yantuma okuwonia abo abatuntuzibwa,

19n'okulangirira omwaka gwa Musengwa ogw'okulokolwa.”

20Yaawumbaku ekitabo yaakiiriza omugheereza, yaatyama. Boonaboona abaali mu sinagoga baamutaaku amaiso. 21Agho yaatoolera okubakoba ati: “Ebyaghandiikibwa bino bye muwuliire n'amatu gaimwe, olwaleero bituukiriire.”

22Boonaboona baasiima era beewuunhia inho ebibono ebiwoomu ebyali bimuvaamu, era baakoba bati: “Ono ti n'omwana wa Yosefu?”

23Yesu yaabakoba ati: “Nkakasa nga mwidha kunkoba ng'olugero luno bwe lukoba luti, ‘Omuyigha, weeyighe mwene,’ era muti, ‘Ebyo bye twawuliranga bye wakolera e Kaperinaumu, bikolereku ni ghano ku kyalo eky'ewaimwe woona.’ ” 24Yaakoba ati: “Bwenebwene ka mbakobere ezira mulanzi aikirizibwa ku kyalo kya waibwe.#Yoa 4:44

25“Aye mbakobera mu butuufu bwene: Mu byanda bya Eliya, banamwandu baali kamaala mu Isiraeli eigulu bwe lyesiba emyaka esatu n'emyezi omukaaga, endhala ey'amaani n'egwa mu nsi woonawoona.#1 Bakyab 17:1 26Aye Eliya tiyatumwa eri waire omulala ati ku abo, okutoolaku ew'omukazi namwandu ow'omu Zarefathi eky'omu Sidoni.#1 Bakyab 17:8-16 27Ate era ab'endwaire ey'ebigenge baali kamaala mu Isiraeli mu byanda bya Elisha omulanzi. Aye era ku abo ghazira naire mulala eyawonezebwa okutoolaku Naamani Omusiria.”#2 Bakyab 5:1-14

28Boonaboona abaali mu sinagoga bwe baawulira ebyo baidhula obusungu. 29Baasituka baamubingira ku luya okw'ekibuga, baamutwala ku mpumi ey'olusozi ekibuga kyaibwe kwe kyazimbibwa, nga benda bamusuule ghansi. 30Aye yaababitamu ghagati yaaja.

Omuntu eyaliku omuzimu omubi

(Mar 1:21-28)

31Agho yaaserengeta e Kaperinaumu, ekibuga eky'omu Galilaaya era yaabeegeresa ku lwa Sabbato. 32Beewuunhia endhegeresa ye, kuba ebibono bye nga bya buyinza.#Mat 7:28-29 33Mu sinagoga mwalimu omuntu eyaliku omuzimu omubi, yaayasiikanira ghaigulu ati: 34“Tuleke, otwendeza ki, Yesu Omunazarethi? Oidhie kutuzikiriza? Nze nkwidhi, niiwe omutukuvu wa Katonda.”

35Aye Yesu yaagukaabukira ati: “Sirika era muveeku.” Omuzimu gwamusuula ghansi mu bantu, gwamuvaaku nga tigumukosiisa.

36Boonaboona baayasaamirira, era buli muntu yaakoba mwine ati: “Kiki kino? Emizimu emibi agiragira n'obukumu n'amaani gyavaagho!” 37Agho ebibono ebimufaaku byatuuka mu buli kifo ekyetooloire agho.

Yesu awonia abantu kamaala

(Mat 8:14-17; Mar 1:29-34)

38Agho Yesu yaasituka yaava mu sinagoga, yangira mu ndhu ya Simoni. Yaayagaana mukoirume wa Simoni ng'ali n'omusuudha omungi, era baamusaba amuwonie. 39Yaayemerera ghe yali yaalagira omusuudha gwa muleka, era mangu ago yaasitukiramu yaabagheereza.

40Agho endhuba bwe yali ng'egwa, boonaboona abaali n'abagodhe ab'ebirwaire ebya buli nsambo, baabaleeta gh'ali, era yaabagemaku mulala mulala yaabawonia. 41Era n'emizimu emibi gyona gyava ku bantu kamaala nga gyasiikana giti: “Iwe oli Mwana wa Katonda!”

Yaagikaabukira nga tagiganha kwogera, kuba gyali gimwidhi nga ni Kurisito.

Okwegeresa mu Buyudaaya

(Mar 1:35-39)

42Bwe bwakya enkyo yaavaagho yaaja mu kifo omuzira bantu. Aye abantu baamwagala era baamutuukaku, baamusigaza nga tibenda abaveeku. 43Aye yaabakoba ati: “Nteekwa okwegeresa ab'omu bibuga ebindi boona eby'Obwakyabazinga bwa Katonda, kuba natumibwa lwa kino.” 44Era yaayegeresa mu sinagoga edh'omu Buyudaaya mwonamwona.

Currently Selected:

Luka 4: Sog

Highlight

Copy