Matiu 12

O Iesu i a Labino tagun a Bung na Sabat

(Mk 2:23-28; Lk 6:1-5)

1 # Lo 23:25 Numur, un ara Bung na Sabat, o Iesu i wan potor una kum kinobot na wit. Anun a kum nat na ususer det murak, ra det turpas a kumut a ramano kum turunu wit ma det wani. 2#Kis 20:10Ra a kum Parisi det tama i, det watungi tano lena, “Tama i, anum a kum nat na ususer det pam a utna ri, ra ke tokodos elar nama warkurai tagun a Bung na Sabat.” 3#1 Sml 21:1-6O Iesu i balu det lena, “Pepetlai, ka mot luki utmakai asau ra o Dewid i pami? Det nama taro ra det wan tomo det murak, 4#Wkp 24:5-9ra i ruk una rumu anun o God, ra i wan a beret ra di sa pitar tari torom o God. Ma det kai ra det wan tomo nami det wangon taguni. A beret ra, a warkurai taguni, i lenri, a kum tene etabor kut torom o God det in nangon taguni, ma a taro oros awu. 5#Nam 28:9-10Pepetlai, ka mot luki utmakai a wasiso tagun a Buk na Warkurai? I watungi lena, a kum tene etabor torom o God det ser papam una rumu na etabor una Bung na Sabat, ikut ka det raro uni. 6#Mt 12:41-42A watungi tamot lena, ara kuri nin i labo taun a rumu na etabor. 7#Mt 9:13Di sa tumus tari una Buk Tabu lenri, ‘A nem a marmaris, ma ka nem a etabor ra di ser tuni.’ Os 6:6

Ra gunuk mot sa tasman a kukurai ina wasiso ri, ka mot in takun det ra ka det raro. 8Uni a Nutun a Musano i a Labino tagun a Bung na Sabat.”

O Iesu i ulangolango pas a musano ra a lamano i kong

(Mk 3:1-6; Lk 6:6-11)

9Numur o Iesu i wan tagitiro, ra i ruk una nundet a rumu na lotu. 10#Lk 14:3Ara musano kura iai, a lamano i kong. Det sisio sur tu utna det in takun o Iesu nami, ra det tingi lena, “Pepetlai, i tokodos ut elar nam anundat a Warkurai sur din ulangolango pas taio una Bung na Sabat o awu?” 11#Lk 14:5Ma i balu det lena, “Ra taio tagun mot anunu tu sipsip in puku taru unin nutung una Bung na Sabat, pepetlai, ken pam ukai pasi, ma ken dat toto melet pasi? 12A musano i labo taun a sipsip. Lenra i tokodos sur din pam a wakakino una Bung na Sabat.” 13Ra i inanos a musano lena, “Kodos a lamam.” I kodosi, ra a lamano i tokodos melet, elar nam ara lamano ra i wakak. 14#Jn 5:16A kum Parisi det pirso, ma det wasiso tomo sur tu kisapi ra det in um doko o Iesu uni.

A tultul ra o God i pilok pasi

15Ra o Iesu i tasmani lena det wasiso tomo sur det in um doko i, i wan tagitiro iai. A labino kunur na taro det muri, ma i ulangolango pas det rop ra det misait. 16#Mt 8:4; Mk 3:12Ma i turbat det, sur gong det inanos tar taio lena, i osi. 17I watungi lenra sur in pam sot pas a wasiso anun o God ra o Aisaia a poropet i sa wasiso mugu taru uni lena,

18 # Mt 3:17 “Iri anung a tultul ra a sa pilok pasi,

anung a nat na wakak, a gas doko nami.

An uruk tar a Niong uni,

ra in upuaso a warkurai ra i tokodos torom a taro tagun a kum gapman.

19Ken wasiso na kankan, ma ken ugaia,

ma ka din longoro in nalngano una kum kisapi.

20Ken pak in nere ra i tulukun,

ma ken wup doko a lam ra ke kunabor wakak.

In pami lenra tuk ra a tokodos na warkurai in winim pas a sakino.

21A taro tagun a kum gapman det in nurnur una risano ma det in kis langlang sur in ulaun det.” Ais 42:1-4

O Iesu ma o Belsebul

(Mk 3:20-30; Lk 11:14-23)

22Det ben pat ara musano torom o Iesu, i ngat ma i pulu, ma a laulau na nion kura uni. O Iesu i ulangolango pasi, ra a musano ra, i wasiso ma i tamtama kai. 23Ra a taro rop det kisin, ma det iting lena, “Kutiro a Nutun o Dewid#12:23 A taro Juda det ser watung a Mesaia a Nutun o Dewid. ut ri?” 24#Mt 9:34; 10:25Ikut a kum Parisi det longoro i ra det watungi lena, “A musano ri, i ser lakro ru a kum laulau na nion nama dekdekin o Belsebul, a labino anun a kum laulau na nion.”

25O Iesu i sa tasman a nuknukin det, ra i watungi tandet lena, “Ra tu gapman det melet ut det in waim etalai, a gapman ra in rop kut. Ra tu tamon, o lako taro tagun tu rumu, det in waim etalai melet kut, ka det in kis tomo melet mo. 26Ra o Satan in lakro ru anun a kum tultul, det in nan sarara. Ra i lenra, anun a gapman in tur dekdek pepetlai? 27Ra iau an lakro ru a kum laulau na nion nama dekdekin o Belsebul, anumot a taro det ser lakro ru a kum laulau na nion nama dekdekin osi? Anundet a pinapam ut in upuaso i lena, anumot a etakun ke lingmulus. 28#Ap 10:38; 1 Jon 3:8Ikut, ra an lakro ru a kum laulau na nion nama dekdekin a Nion o God, in ese i lena a matanitu anun o God i sa wanpat torom mot.

29“Kataio in pet lar pasi sur in ruk una rumu anun tu dekdek na musano, ma in los pas a kum utna tagitiro una nun a rumu, ra ken ker ukai mugu tari. Ra ut in ker ukai mugu tari, in los a kum utna maragom anun a musano ra.

30 # Mk 9:40; Lk 9:50 “O naro ra ka mir tar pasano mir ebar. Ma o naro ra ke warut iau u eben, i lu sarara ru a taro kut. 31#Ibr 6:4-6Ra a watungi tamot lena, din unus ru a kum sakino petutna rop anun a taro, ma anundet a kum sakino wasiso kai un o God, ikut ra det in wasiso laulau una Tokodos na Nion ka din unus lar pasi. 32Osi kai ra in watung tar tu sakino wasiso una Nutun a Musano, din unus ru i kut, ikut osi ra in wasiso laulau una Tokodos na Nion, ka din unus lar pasi, una nilaun uniri ma una nilaun numur kai.

In nanai ma a wino

(Lk 6:43-45)

33 # Mt 7:16-20 “In wakak na duwai, i ser wu a wakak na wino, ma in laulau na duwai, i ser wu a laulau na wino. Din tama lele in nanai tagun a wino. 34#Mt 3:7; 15:18; Lk 3:7; 6:45Mot a kum nutnutun a kum sui! Mot ra a laulau na taro, mot in watung petlan tu wakak na wasiso? Uni a wan a taro i watung puaso a petutna ra i bukus una nundet a nilaun. 35A wakak na musano i ese anun a wakak na petutna tagun a wakakino ra i kis una nun a nilaun, ma a laulau na musano kai, i ese anun a sakino petutna tagun a sakino ra i kis una nun a nilaun. 36A watungi tamot lena, a kum wasiso laulau rop ra a taro det sa watung tatari, kura numur din ting det uni una bung na warkurai. 37Ra una bung ra, anum a wasiso ut in ulangolango pas ui, o in ban laulau ui.”

Det saring o Iesu sur in pam tu ukinalong

(Mk 8:11-12; Lk 11:29-32)

38 # Mt 16:1; Lk 11:16; Jn 6:30 Numur ara taro tagun a kum tene ususer tagun a Warkurai ma a kum Parisi det watungi tano lena, “Tene Ususer, un pam tu ukinalong sur met in tama i.” 39#Mt 16:4; Mk 8:12I balu det lena, “A taro tagun uniri, a sakino taro, anundet a nilaun i bakbak gusun o God. Det sasaring sur tu ukinalong, ikut ka din pam taio torom det. Din pam a ukinalong kut elar nami ra di sa pam tari un o Jona a poropet. 40#Jna 1:17Uni o Jona i laun a tulu bung unin balan a labino kiripo, ma lenkutkai ra a Nutun a Musano in inep pas a tulu bung ubalan a piso. 41#Jna 3:5Una bung na warkurai, a taro Niniwe det in tur ma det in takun dekdek a taro tagun uniri, uni det nukpukus una warawai anun o Jona, ma o naro ra i labo taun o Jona kuri ut nin, ikut ka mot longoro i. 42#1 Kin 10:1-10Una bung na warkurai, a kwin tagitong una matmatano tobar in tur ma in takun dekdek a taro tagun uniri, uni i wan ut tagitiro bakbak sur in longoro a mananos anun o king Solomon, ma o naro ra i labo taun o Solomon kuri ut nin, ikut ka mot longoro i.

A laulau na nion i milet melet

(Lk 11:24-26)

43“Ra tu laulau na nion in pirso pas gusun tu musano, in nan una kum nubual ra kalako danim iai, sur in mana, ikut ken sio pas tu nubual sur in mana uni. 44Ra in watungi lena, ‘An milet melet sur anung a rumu, ra a sa pirso pas gusuni.’ Ra in nanpat, in tama i ra i sa belbel, di sa surupu tari, ma di sa ukodos tari. 45#2 Pit 2:20Numur in nan ra in ben melet pas a wonom mawit na laulau na nion, ra det laulau sakit tano, ma det in ruk rop taru una rumu ra, ma det in kis uni. Ma a nilaun anun a musano ra in laulau sakit taun a nilaun ra numugu i utur ukai i. In lenkutkai ra torom a laulau na taro tagun uniri.”

O nan o Iesu ma a kum tistisino

(Mk 3:31-35; Lk 8:19-21)

46Ra o Iesu i wasiso utmakai torom a kunur na taro, o nano ma a kum tistisino det wanpat, ma det tur taru kut nago upiso, uni det nem na wasiso tomo nami. 47Ma ara i inanos o Iesu lena, “O nam ma a kum tistisim kunago det tur nago upiso. Det nem na wasiso tomo nam ui.”#12:47 Una ramano kum du buk una wasiso Grik, katu vers 47. 48Ra i balu i lena, “Osi o nang, ma osi det a kum tistising?” 49Ra i kodos a lamano torom anun a taro na ususer ma i watungi lena, “Tama i, det ri o nang ma a kum tistising! 50#Rom 8:29Uni osi ra i ser mur a nemnem anun o Tita ra i kis sapat una langit, i ra o tising a musano, ma o tising a ino, ma o nang.”

Currently Selected:

Matiu 12: kqw

Highlight

Copy