Luk 20

Det ting o Iesu una dekdek ra i ser papam nami

(Mt 21:23-27; Mk 11:27-33)

1Ara bung o Iesu i ususer a taro ubalan in noworo ina rumu na etabor, ma i warawai nama Wakak na Wasiso, ra a kum lamlabino tene etabor torom o God, ma a kum tene ususer tagun a Warkurai tomo nama kum mugumugu det wan toromi. 2Ra det watungi tano lena, “Un inanos met, asi na ngas na dekdek ra u pam a kum utna ri nami? Osi ra i pitar a dekdek ri tam?” 3O Iesu i balu det lena, “Iau kai an ting mot nam ara iting. Mot inanos iau. 4Tagai a dekdek ra o Jon i baptaiso a taro nami? Tan o God, o tan a taro kut?” 5Ra det wasiso etetalai torom det lena, “Ra dat in watungi lena, ‘Tan o God,’ in balu dat kut lena, ‘Sur asau ra ka mot nurnur uni?’ 6Ikut ra dat in watungi lena, ‘Tan a taro,’ a taro rop det in duku doko dat, uni det nurnur un o Jon lena i a poropet.” 7Ra det balu i kut lena, “Ka met tasmani tagai i.” 8Numur o Iesu i watungi tandet lena, “Iau kai kan inanos mot una dekdek ra a ser pam a kum utna ri nami.”

A wasiso elelar una taro na pinapam una kinobot na wain

(Mt 21:33-46; Mk 12:1-12)

9 # Ais 5:1 O Iesu i watung a wasiso elelar ri tan a taro lena, “Ara musano i marut tar a kinobot na wain, ra numur i pitar tari munung tan a ramano kum tene pinapam sur det in tamtamabati, ra i wan taru gusun det, ma i sa suano bat pasi tiro iai. 10Ra a kalang i sa sot sur din git tomo a wino wain, i tulu ru ara tultul torom a taro na pinapam, sur lako kum kur wain tagun anun a kinobot sur anunu kai. Ikut a taro na pinapam det umi, ma det tulu oros melet ru i kut. 11I tulu melet ara tultul torom det, ikut det um meleti, det ban umaimai tari, ma det tulu oros melet ru i kut. 12Numur i tulu melet a mantul na tultul, ra det um laulau tari, ma det woro pirso ru i. 13Ra a taman a kinobot i watungi lena, ‘Asau mo ra an pami? An tulu ru o nutunglik ut, a nat na wakak. Kutiro det in urur uni.’ 14Ikut, ra a taro na pinapam det tama pasi, det wasiso tomo pas lena, ‘O naro ra in keles o tamano, i mo ra i wan urin. Mot iap, dat in um doko i, sur anundat mo a kinobot.’ 15Ra det sugut pirso ru i tagun a kinobot, ma det um doko ru i.

“Asau mo a taman a kinobot na wain in pami un det? 16In nanpat ma in um doko ru a taro na pinapam, ma in pitar tar a kinobot torom lako taro gisen, sur det in tamtamabati.” Ra a taro det longoro a wasiso ri, det watungi lena, “Awu, ken lenra!” 17Ikut o Iesu i nas det, ra i watungi lena, “Asau mo a kukurai ina wasiso ri ra di sa tumus tari una Buk Tabu?

‘A wat ra a kum tene pam rumu det lakro ru tari,

i ut ra, i wanpat a wakak na wat ra i udekdek a rumu.’ Sng 118:22

18 # Ais 8:14-15 Det rop ra det puku taru una wat ri, det in tiginogino, ma osi ra a wat ri in puku taru uni, in tiginogino rop elar nama kubus.”

19A kum tene ususer tagun a Warkurai ma a kum lamlabino tene etabor torom o God det sisio sur tu kisapi sur det in pam ukai pas o Iesu una du bung utra, uni det tasmani ut lena i watung a wasiso elelar ri un det. Ikut det ngaran a taro.

A iting una takis

(Mt 22:15-22; Mk 12:13-17)

20 # Lk 11:54 A kum tene ususer tagun a Warkurai ma a kum lamlabino tene etabor torom o God det tama sursuri, ma det tulu ru a kum tene torotoro ma det toro lena det a lingmulus na taro. Ra det kis na usobor sur tu wasiso ra o Iesu in watung tari ra det in takuni nami, sur det in pitar tari una warkurai ma una dekdekin a mugumugu tagun a matanitu Rom. 21Ra det watungi lena, “Tene Ususer, met tasmani lena i tokodos anum a wasiso ma anum a etowo. A magiram i takai kut torom a taro rop, ma u ser ususer det una kisapi anun o God nama lingmulus. 22Pepetlai, i tokodos sur dat in pitar a takis torom a Sisa #20:22 A Sisa i a labino mugumugu tagun a gapman Rom, ma a taro Israel kai det kis utuntudu in anun a warkurai. o awu?” 23O Iesu i sa tasman ru anundet a torotoro, ra i watungi tandet lena, 24“Mot in ese iau nam tu mani. In masarin osi ri, ma a tumtumus ri uni anun osi?” Det balu i lena, “Anun a Sisa.” 25Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.” 26Ma ka det usobor lar pasi umatan a taro nama wasiso ra. Det kisin doko una nun a minabalu, ma katu wasiso mo anundet.

A iting una nilaun melet gusun a minat

(Mt 22:23-33; Mk 12:18-27)

27A ramano kum Sadusi, ra det ser ipul kut lena, katu nilaun melet gusun a minat, det wan torom o Iesu, ma det tingi lena, 28“Tene Ususer, o Moses i tumus tari tandat lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino. 29Ara kabo tisino, a wonom mawit na musano det. A mugano i nolin, ra i mat pas gusun anun a ino, ma katu nutunder. 30Ra a murmur tano bulung i nolin nama ino ra, ma i bulung i mat kut gusuni. 31Numur a mantul nami bulung i nolin nama ino ra. I lenkutkai ra, a wonom mawit det rop, det nolin pas nami, ma det mat kut. Ikut a ino ra, ke usus tar tu nat un det. 32Ra numur a ino bulung i mat. 33Una nilaun melet gusun a minat, a ino ra, anun osi na pasandet mo? Uni a wonom mawit rop, det sa nolin pas nami.”

34O Iesu i watungi tandet lena, “A taro tagun a kum kilalo ri det ser nolin, 35ikut a taro ra det tokodos sur det in katutur melet gusun a minat, ma det in laun una nilaun numur, ka det in nolin melet mo. 36Ma ka det in mat melet, uni det elar mukut nama kum ensel. Det a kum nutnutun o God, uni det sa laun melet gusun a minat. 37O Moses i ese i lena a kum minat det katutur melet. Una wasiso na Buk Tabu unin nanai ra i kunabor, o Moses i watung a Labino lena, ‘A God anun o Abaram, a God anun o Aisak ma a God anun o Jekop#20:37 O Abaram, o Aisak ma o Jekop detul mat, ikut a wasiso ri i ese i lena, uniri detul laun..’ Kis 3:6

38O God awu sur a God anun a kum minat, i a God anundet ra det laun, uni umatano det rop det laun.” 39Ra a ramano kum tene ususer tagun a Warkurai det watungi lena, “Tene Ususer, anum a wasiso i wakak doko.” 40Ma ka det wan melet mo toromi nam tu iting, uni det ngara.

A Karisito i a Labino anun o Dewid

(Mt 22:41-46; Mk 12:35-37)

41O Iesu i watungi tandet lena, “Ilai ra di watungi lena a Karisito i a nutun o Dewid? 42Uni o Dewid ut i watungi una Buk Song una Buk Tabu lena,

‘A Labino i watungi torom anung a Labino lena,

“Un kis una papor sot na lamang,

43tuk ra an winim pas anum a kum ebar

sur det in kis utuntudu in anum a warkurai.” ’ Sng 110:1

44O Dewid i watung a Karisito lena, i anun a Labino. Ra i lenra, der tamano pepetlai?”

O Iesu i utumarong a taro una petutna anun a kum tene ususer tagun a Warkurai

(Mt 23:1-36; Mk 12:38-40; Lk 11:37-54)

45Ra a taro rop det longoro o Iesu, i watungi tan anun a kum nat na ususer lena, 46“Mot in tumarong mot gusun a kum tene ususer tagun a Warkurai. Det nemi sur det in nan tuptupukus nama kum wakak na ememar, ma det nemi kai sur a taro det in pitar a labino urur torom det una kum nubual na inawan tomo. Ma det nem a kinkinis sa numugu una kum rumu na lotu, ma a kinkinis na labino sa numugu una kum lukaro. 47Det ser urop a kum ululeng anun a kum ula, ma det ser pam a kum walalos na niaring sur a taro det in tama det. In labo doko a warkurai na minabalu anun o God torom det.”

Currently Selected:

Luk 20: kqw

Highlight

Copy