Jon 12

O Maria i waninar o Iesu sur a bung ra in mat ma din uruki una kulam na minat

(Mt 26:6-13; Mk 14:3-9)

1 # Jn 11:1, 43 A wonom na bung utmakai numugu tan a labino bung na lotu na Wanlakai, o Iesu i wanpat tong o Betani, a tamon anun o Lasarus, a musano ra o Iesu i ulaun melet pasi gusun a minat. 2#Lk 10:40Ra det pam a inangon tiro sur u ugasgas o Iesu. O Mata i wapor utna torom det, ma o Lasarus i ara tagun det ra det kis tomo nam o Iesu una inangon. 3#Lk 7:37-38Ra o Maria i los pas in nokoto na polo sangsangnain ra di watungi nama nad, ma a matano i ka doko. I lingisi una ru kikin o Iesu ma i wus der nama iwu na lorino. Ma a sangnainino, i ubukus pas a rumu ra.

4Ara tagun a kum nat na ususer anun o Iesu, o Judas Iskariot, i ra in usobor tar o Iesu, i watungi lena, 5“Sur asau ra ka di siuru in nokoto na polo sangsangnain ri sur lako tulu mar na denaria#12:5 Ara denaria i elar nama ikul anun ara musano un ara bung na pinapam. sur din tabor a kum sibo na taro nami?” 6O Judas ke maris a sibo na taro, awu. I watungi lenri uni i ser tamtamabat anundet a mani ma i ser los eno i, uni i a tene wolong. 7O Iesu i longoro a wasiso anun o Judas, ra i watungi lena, “Madek ru a ino ri, uni i sa pam tar a pinapam ri un iau sur a bung ra an mat ma din uruk a minating una kulam na minat. 8#Lo 15:11A kum sibo na taro det in laun bolbolos tomo ut nam mot. Ikut iau, kan kis tukum nisamot.”

Det epak sur det in um doko o Lasarus

9A kunur na taro tagun a taro Juda det longoro i lena o Iesu kurong i o Betani, ra det wan utong. Awu sur det wan sur det in tama o Iesu kut, det wan utkai sur det in tama o Lasarus, i ra o Iesu i sa ulaun pasi gusun a minat. 10#Jn 11:45I mo ra a kum lamlabino tene etabor det epak sur det in um doko o Lasarus utkai. 11Uni a susut na te Juda det wan gusun det ma det nurnur un o Iesu, i kibino un o Lasarus.

O Iesu i wan usapat o Jerusalem elar nama king

(Mt 21:1-11; Mk 11:1-11; Lk 19:28-40)

12Una bung numur, a labino kunur na taro ra det wanpat sur a labino bung na lotu na Wanlakai, det longoro i lena o Iesu kai i sa wan nanan usapat o Jerusalem. 13#Jn 1:49Ra det los pas a kum dono baibai ma det wan sur det in barato o Iesu nami. Ra det kukukuk lena,

“Osana! O naro ra i wanpat nama risan a Labino i dan! Sng 118:25-26

A king anun a taro Israel i dan!”

14O Iesu i sio pas a dongki, ra i kis taru netes uni, elar nama Buk Tabu i sa watung tari uni lena,

15“A taro Saion, gong mot ngara.

Tama i, anumot a king i mo ra pat i wan nanan torom mot,

i kis una barman na dongki.” Sek 9:9

16 # Jn 2:22 A kum nat na ususer anun o Iesu ka det tasman lele i lena a kum utna ri, di sa tumtumus mugu taru uni una Buk Tabu. Ikut ra o Iesu i sa kis una nun a minamar, det tasmani maragom lena, di sa tumus tar a kum utna ri un o Iesu, ma di sa pam tari kai a kum utna ri uni.

17A susut na taro ra det tur tomo nam o Iesu una bung ra i kabo pirso pas o Lasarus tagun a kulam na minat ma i ulaun pasi, det inanos nanan nami. 18Ra a susut na taro det wan sur det in barato o Iesu, uni det sa longoro tar a wasiso una utna na ukisin ri. 19A kum Parisi det wasiso etetalai torom det lena, “Mot tama i, ka dat in pam lar pas tu utna ra dat nem na pami uni. Uni a taro rop det sa muri.”

A taro Grik det nem na tama o Iesu

20A ramano kum te Grik kai det wan usapat o Jerusalem una labino bung na lotu na Wanlakai, sur det in lotu. 21Ra det wan torom o Pilip, a te Betsaida. O Betsaida ara tamon una papor Galili. Ma det watungi tano lena, “Le, met nemi sur met in tama o Iesu.” 22O Pilip i wan ra i inanos o Endru. Ra der wan ma der inanos tar o Iesu. 23#Jn 13:31-32; 17:1Ra o Iesu i watungi tander lena, “A du bung i sa wanpat sur o God in mar a Nutun a Musano. 24#1 Kor 15:36A inanos mot nama lingmulus, ra in niwino wit ken puku taru una piso, ma ken mat pas, in kis len taru ut ra, in tekene kut. Ikut ra in mat pas, in wu lako susut na wino. 25#Mt 16:25Osi ra i maris anun a nilaun, in iru, ma osi ra ke maris bat anun a nilaun nin una rakrakon bual, in utur ukai a nilaun sur a nilaun tukum. 26Ra taio i nemi sur iau anun a Labino, i wakak sur in mur iau, ma i anung a tultul ra in kis tomo nam iau una dino ra an kis iai. Osi ra i papam torom iau, o Tita in ulabo pasi.

O Iesu i wasiso una nun a minat

27 # Sng 6:3; 42:5; Mt 26:38 “Uniri in balang i maut doko. Asau mo ra an len? Pepetlai, an watungi lena, ‘Tita, un ulaun iau gusun a du bung ri’? Awu, kan wararing lenri, uni, i kutri, i a kibino ra a wan suri urin, sur an taramo a ngunungut una bung ri. 28Tita, un ulabo pas a risam!”

Numur in nalngan ara tagisapat una langit i watungi lena, “A sa ulabo tari, ma an ulabo meleti ut.” 29A kunur na taro ra det tur taru tiro det longoro i. Ara taro det watungi lena a pungpugur, ma ara taro kai det watungi lena, “Ara ensel i wasiso toromi.” 30Ikut o Iesu ut i watungi lena, “In nalngan ara ri, awu sur i wasiso sur in warut iau, awu, i wasiso sur in warut mot ut. 31A du bung ri din warkurai a rakrakon bual. Uniri din lakro ru a labino anun a rakrakon bual. 32#Jn 3:14Ikut iau, ra din utur toto pas iau taginin upiso usapat netes, an dat pas a taro rop torom iau.”#12:32 O Iesu i wasiso na pidik una nun a minat unin nanai kutus. 33#Jn 19:6I watungi lenri sur in utalapori lena in mat pepetlai.

34 # Sng 110:4; Ais 9:7; Dan 7:14 A kunur na taro ra, det watungi tano lena, “Met sa longoro tari una Buk na Warkurai lena, a Karisito in kis tukum. Sur asau ra u watungi lena din utur toto pas a Nutun a Musano usapat netes? Osi ra a Nutun a Musano?” 35#Jn 8:12O Iesu i watungi tandet lena, “A talapor ken kis suano i mo torom mot. Ra a talapor i kis utmakai torom mot, mot nan tuptupukus. Numur a dumirum in pulus bat mot. I ra i wanan una dumirum, ken tasmani lena in nan urai. 36#Ep 5:8Ra a talapor i kis utmakai torom mot, mot in nurnur uni, sur mot a kum nutnutun a talapor.” Ra o Iesu i sa watung rop tar a wasiso ri, i wan eno pas gusun det.

A ramano taro Juda ka det nurnur un o Iesu

37O Iesu i sa pam tar a susut na utna na ukisin umatandet, ikut ka det nurnur uni, 38sur a wasiso ra a poropet Aisaia i wasiso taru uni in nanpat mulus. I watungi lena,

“Labino, osi i nurnur una numet a wasiso?

Ma osi ra di sa ese tar a dekdekin a Labino tano?” Ais 53:1

39-40Ma o Aisaia i sa watung tari kai lena,

“O God i sa upulu bat ru a kum matmatan det,

ma i sa udumun bat ru a kum nuknukin det,

sur gong det tamtama nama matmatan det,

ma gong det tasman lele i nama nuknukin det,

ma ka det in tupukus torom iau,

sur an ulaun pas det.” Ais 6:10

Iri a kibino ra ka det nurnur. 41#Ais 6:1O Aisaia i watungi lenri uni i sa tama mugu a minamar anun o Iesu, ra i wasiso uni.

42 # Jn 9:22 A susut na taro det nurnur un o Iesu. A ramano kum mugumugu kai tagun a taro Juda det nurnur, ikut ka det wasiso puaso uni, sako a kum Parisi det in turbat ru det gusun a kum rumu na lotu. 43#Jn 5:44Ka det wasiso talapor, uni det nemi kut a wasiso na ululabo anun a taro torom det, ma ka det nuk pas a wasiso na ululabo anun o God torom det.

A kum wasiso anun o Iesu in warkurai a taro

44O Iesu i wasiso namin labino walngano lena, “I ra i nurnur un iau, awu sur i nurnur kut un iau, i nurnur utkai un i ra i tulu ru iau urin. 45#Jn 14:9Ma i ra i tama iau, i sa tama tar i ra i tulu ru iau urin. 46A sa wanpat urin una rakrakon bual elar nama talapor, sur osi ra i nurnur un iau, ken kis una dumirum. 47#Jn 3:17Ra taio i longoro anung a kum wasiso ma ke muri, iau kan warkurai i. Uni ka wanpat sur an warkurai a rakrakon bual, a wanpat kut sur an ulauni. 48Osi ra ke nem iau ma ke mur anung a kum wasiso, anung a kum wasiso ut ra, det in warkurai i una bung na warkurai. 49Uni a kum wasiso ra a sa watung tari, awu sur anung. O Tita ut i tulu ru iau nami urin, sur an wasiso kut nami. 50Ma a tasmani lena anun a warkurai i pitar a nilaun tukum. A kum wasiso a watungi, o Tita i tulu ru iau nami sur an watungi.”

Currently Selected:

Jon 12: kqw

Highlight

Copy