Lluku 24

Yesusi Lomboropa Ola Molorumu Kinia Ambo Marene Yu Kanoringi Semanemo

(24:1-12)

1˻Ononga koro moloringi˼ wale Sambatemo pora nimba, pulu-pulu kongono walemo wendo ombándo kolea tangomba muni lierimu kinia amboma wambola muna toli u seko taltoringima liku mengo pungu, ˻Yesusinga˼ ónomo taltoringi kou-kandena mengo puringi.

2Akuna punguli kou-kande kerepulumu pipi siringi koumu perele-marele pumba welkendo lierimu kanokole, 3sukundu puringi kinia akuna Ye-Awili Yesusinga ónomo u lierimuna naa lierimu kanoringi. 4Kanu-kinia ‘Ónomo nambi semunje?’ ningu konopu kimbu siku moloringi kinia ye talo kariapá sepale pa selemo mele seli wale-pakoli pakoringili yetolo ono moloringina gilieringili.

5Kanokole amboma mini-wale munduku tamalu peringi kinia yetolone onondo ninguli: “Konde molemomo, ya óno-koleana nambi semu-na korokomeleye? 6Yu ya naa lemó. Lomboropa ola molopa wendo pumu.” ˻niringili.˼ “Yu ˻ono-kinia˼ kolea Gallilli molopa onondo nirimu mele piliayo. Yuni nimbale: 7“˻Juda yombomanga ye awilimane˼ Mania Omba Mana-Ye Au Lierimu Yemo liku talape lupa yombo ulu-pulu-kiri selima yu liku singí, onone yu unju-perana kolopili uku toko panjingí kinia kolopale wale yopoko-sipamonga lomboropa ola molomba.” nirimu kanumu.” niringili.

8Kanu-kinia Yesusini u aku nirimu mele ambomane kelko pilieringi.

9Kou-kandemo munduku kelko, kelko yando ongole niringimuni, lombili andoli rureponga yopoko kinia akuma pea moloringi yomboma kinia onondo pilku kanoringi mele semane toko siringi. 10Kolea Makatalla ambo Maria keme, ambo Joana keme, Jemisi anumu Maria keme, ono pea puringi amboma keme, kanu ambomane Yesusini u “Nanga kongonomo sende-paa.” nimba lipa mundorumu ye rureponga yopoko aku semanemo toko siringi.

11Aku-sipa na-kolo ambomane niringi ungumu pilkuli ‘Ono kolo tokomele.’ ningu pilku kuru naa mondoringi.

12˻Ambomane niringi unguma kuru naa mondoringi˼-na-kolo Pita ola gilipa ónomo taltoringi kou-kandena kanombando lisipa pumba, wake sepa kanopa Yesusinga ónomo okoringi mulu-maminiama manjipa akuna we lierimu kanopale konopu awisili kimbu sipa ‘I nambolka unguri semunje?’ nimba pilipa yando orumu.

Kolea Emeasi Aulkana Ulu Se Wendo Orumu Semanemo

(24:13-35)

13Yesusi lomboropa ola molorumu aku walemonga ˻yu lombili andoringi yombomanga˼ yombo talo kolea-kanga Emeasi pungilí puringili. Aku kolea-kangamo kinia kolea-awili Jerusalleme kinia aulkamo laye-kolte sulu mele, illepene killomita mele. 14Olone Yesusi kolorumumundu anju yando angelema niliku puringili.

15Aulkana aku ulumando angelema niliku pangili Yesusi yuyu olo puringilina omba olo kinia kopu sepa purumu, 16aku-na-kolo Yesusi yu ‘We-ye lupare okomo konopu leangili.’ nimbale serimu, olone yu naa kanoko imbi siringili.

17Yuni olo mangilipa nimbale: “Olo nambolkamondo angelema niliku pukumbiliye?” nirimu.

Olo Yesusi toringi kolorumumunga nono ningu we gilieringili. 18Senga imbi Killopasi, akumuni yundu mangilipa nimbale: “Jerusalleme sukundu talko ulu wendo orumuma nu naa kanorunuye? Yombo awisili akuna ongo maku tokole kanoringi-na-kolo nu pea naa molko kanoringi. Senga lupa molkole okono lepomo.” nirimu.

19Orumu yemone “Nambolka ulumaye?” nirimu.

Olone ninguli: “Kolea Nasarete ye Yesusinga ulu kanuma.” niringili. “Yesusi yu Pulu Yemone ungu-umbu tondolima pilipa yando nimba sili ye se molopale Pulu Yemo kinia olio mana-yomboma kinia kanopo molamili ungu tondoloma nimba ulu tondoloma serimu. 20Kanu-kinia olionga ningu Pulu Yemo popo tondoli ye awilima kinia olio nokolemele ye awilima kinia ‘Yu kote pilku “Kolopili.” ningu tangi.’ ningu ˻Romo gapomano yema˼ anju siringi onone ‘Yu kolopili.’ ningu unju-perana uku toko panjeringi. 21Aku-sipa na-kolo olio pilierimulu, ‘Yu Pulu Yemone lipa mundorumu, ˻Romo gapomano yombomane olio˼ Isirele yomboma ˻tondolo munduku nokolemelemonga˼ mindili nombo umbuna sepili molemolomonga olio lipa tapondopa ˻ononga kína˼ wendo lipa ‘Molko kondangi.’ nimba ˻kolali sepa˼ olionga ye nokoli kingimu molopa olio nokopa kondomba.’ nimbu pilipu konopu sipu molorumulu-na-kolo yu toko kondoringi. Akumunga ungu se pea i-sipa: Talko toringi, kiniá wale yopoko-sipa mele omba pukumu.

22-23“Pe kiniá ulu se lupa wendo omula. Yu lombili andorumulumanga ambo pokore kiniá ongo níngi mele pilipuli mini-wale mundomulu. Kiniá paa orili-u kanu amboma yu óno seringi kou-kandena pungu kanongi-na-kolo yunga ónomo naa liemu. Ono ongo oliondo ninguli: “Mulu-koleana angello talo kanomulu, olone “Yu we molemo.” níngili.” níngi. 24Kanu-kinia olio pea molomulu ye talo óno kou-kandena punguli ambomane níngi mele kanongili, aku-na-kolo yu naa kanongili.” niringili.

25Aku niringili kinia olo lombili akilepa orumu yemone olondo nimbale: “Olo aroma topombele. Olo konopu naa pelemomonga u Pulu Yemone ungu-umbu tondoringima pilku yomboma ningu siringi yemane yundu niringi bokuna molemo mele mongotolone kanoko komutolone pilkuli konoputolonga liku mengo andolembolánje ˻Yesusi-kinia talko seringi mele kinia yuni serimu sekemo mele kinia˼ kamu alieli pilielembolá lémo. 26Pulu Yemone ungu-umbu tondorumuma pilku yomboma ningu siringi yemane Pulu Yemone “Ono nokopa kondomba ye se lipu mundumbu.” u nimba, nimba taltorumu ye nokoli Karasimu mania ombale, ya ye nikimbilimu talko mindili norumu mele mindili nomba mulu-koleana ye nokoli awili se pumba molomba mele u ningu naa siringiye? Ningu siringi kanumu. Pe kiniá u ningu siringi mele yu aku semu.” nirimu.

27Aku nimbale Mosisini Yesusi yu yuyu sembá mele u boku marenga topa nirimu mele pulu polopa nimba sipa, yandopa yandopa Pulu Yemone ungu-umbu tondorumuma pilku yomboma ningu siringi yemane yu sembá mele u boku marenga toko niringi mele nimba sipa, aku Pulu Yemonga bokumuni nilimú mele pali nimba silipa yombotolo kinia aulkana purumu.

28Yombotolo puringili koleamo nondoko wendo oringi kinia Yesusi we sumbi sipa senga lupa pumbá serimu. 29Aku-na-kolo olone ta ningu ninguli: “Mólo. Ena pumba ipu nondopa lemba kene pea peamili.” niringili-kulu yu olo-kinia pumba molorumu.

30Kanu-kinia olo pea kere-langi nongo moloringi kinia yuni pellawa kaloli se lipa Pulu Yemo “Ange.” nimba, ambolopa pike lepa olo sirimu. 31Aku serimu kinia olo yu kanoko olonga Ye-Awili Yesusi ningu kanoringili kinia sepa nema liltimu kelko naa kanoringili. 32Kanu-kinia olo ololo anju yando angelema ningu ninguli: “Aulkana olto-kinia omba ungu nimba Pulu Yemonga bokumuni nilimú mele ungu-pulumu nimba silipa omu kinia olto kamelé kongulu topili ombulu kanumu. Ye-Awili Yesusi-kinia ombulumunga aku semu lepomo.” niringili.

33Kanu-kinia olo ola gilku kelko sumbi siku Jerusalleme yando ongo, lombili andoli ye rureponga yopoko kinia ono pea maku toko moloringi yombo lupama kinia moloringina puringili.

34Sukundu puringili kinia onone olondo ninguli: “Ye-Awilimu paa sika lomboropa ola molomu lémo. Yu yuyu Saimono molomuna pumba mona giliemu.” niringi.

35Kanu-kinia yombotolone aulkana puringili kinia ye se omba nirimu mele kepe kanu yemone pellawa kaloli se ambolopa pike lierimu kinia kanoko ‘Yu Yesusi.’ ningu kanoringili mele kepe onondo semane toko siringili.

Yesusi Lomboropa Ola Molopale Lombili Andoli Yomboma Moloringina Orumu Semanemo

(24:36-49)

36˻Yesusi lombili andoli˼ yombomane ˻Yesusi yu lomboropa ola molorumu kanoringimundu˼ angelema ningu molangi Yesusi yu omba ono moloringina sumbi sipa gilipale “Ono konopu pe nipili molaa.” nirimu.

37Ono ‘Yombo kololi senga minimu kanokomolo.’ konopu lekole pungu-pungu ningu pipili koloringi. 38Yuni onondo nimbale: “Mini-wale munduku konopu talo panjiku nambi semu-na molemeleye?” ˻nirimu.˼ 39Nanga kitolo kinia kimbuma kanoko ‘Imu na nanu.’ ningu kanayo. Ambolko piliame. Nanga kangi kinia bele kinia gilkimu mele minimanga aku sipa gilimúye? ˻Aku sipa naa gilimú kanumu.˼” nirimu.

40Aku nimbale yunga kimbu-ki pirimu toringima ono lipa ora sirimu.

41Kanu-kinia ono yu kanokole pondeanga konopu siku paa konopu kimbu siringi-na-kolo ‘Sikanje molo nambolkare kanokomolonje?’ ningu konopu talo panjiku we moloringi-kulu yuni ono mawa sepa nimbale: “Kere-langi nombó se ya lemoye? Siee.” nirimu. 42Onone yu oma kaloli se liku siringi, 43akumu lipa ono kanoko molangi norumu. ˻‘Minimu naa molopo yombomo molkoro kanangi.’ nimba aku serimu.˼

44Yuni onondo nimbale: “Na u naa kolopo ono-kinia molopole ono ulu wendo ombá mele nimbu sirindu kanu ulumu i wendo okomo. “Mosisi kinia Pulu Yemone ungu-umbu tondorumuma pilku yomboma ningu siringi yema kinia onone nando ningu boku marenga toringi uluma kinia, Pulu Yemonga konane niringi bokuna molemo konanemane nando nilimú uluma kinia, kanu uluma sika wendo ombá.” nirindu kanumu.” nirimu.

45-46Aku nimbale ‘Pulu Yemonga bokumuni nilimú mele pilku kondangi.’ nimba yuni ungu-pulumu ono nimba sipa nimbale:

“Bokuna toringi molemo mele i-sipa: ‘Pulu Yemone “Ono nokopa kondomba ye se lipu mundumbu.” u nimba taltorumu ye nokoli Karasimu mindili nomba kolopale wale yopoko-sipamonga óno-koleana lomboropa ola molomba. 47Aku sembá kinia kanu ye Karasimu yunga talape yombomane yunga tondolomone yomboma ulu-pulu-kiri sengema pilku kiri pilku konopu topele tonge mele kinia, ulu-pulu-kiri sengema Pulu Yemone siye kolopa kelepa naa pilipa “Aku siku seko kinjeringimunga mindili nangi.” naa nimbá mele kinia, ningu singíndu Isirele yombomanga kolea-awili Jerusalleme pulu polko ningu siku koleamanga pali punguli ningu siliku andonge.’, 48aku mele nando u ningu boku toringi.

“Pe kiniá nane serindu uluma kinia na-kinia seringi uluma kinia kanoringi seringi kanokomelemonga yomboma manda ningu singí. 49Aku-sipa na-kolo we naa sangi. Pulu Yemone “Simbu.” nimba, nimba panjerimu Minimu nane olando pumbuli lipu mundumbu kene aku Mini Tondolomo yu mulu-koleana mania omba ‘Ono tondolo pupili molangi.’ nimba ono-kinia molomba kene u senga lupa naa pungu Jerusalleme sukundu we nokoko molaa.” nirimu.

Yesusi Mulu-Koleana Kelepa Olando Purumu Semanemo

(24:50-53)

50Yesusi yu lombili andoringi yomboma kolea-kanga Betani lierimuna nondopana memba pumbale nirimumuni, ‘Pulu Yemone ono sewi anjepili.’ nimba yunga kitolo ola mundupa, “Pulu Yemone ono nokopa kondopa ‘Ono konopu enge nipili molangi.’ nipili.” nirimu. 51Onondo aku sipa nimba molopili ˻Pulu Yemone˼ yu mulu-koleana olando liltimu kinia ono mundupa kelepa mulu-koleana olando purumu.

52Kanu-kinia onone ˻Yesusi˼ yu kape ningu imbi ambolko paka tondokole kamelé paa koke sepili, Jerusallemendo kelko yando oringi. 53Akuna punguli ˻Pulu Yemo popo toko kaloringi˼ ulka-tembelena alieli-alieli molko, Pulu Yemone serimumunga “Ange.” ningu yu kape ningu yunga imbi ambolko paka tondoringi.

˻Yesusinga semane peanga ekendo topo pora sikiru.˼

Currently Selected:

Lluku 24: ubuA

Highlight

Copy