Genesis 28

1Yan impeangay i Isaac si Jacob, aw migtawal-tawal sikandin amon mèpiya se ibegay te Timanem diyà kandin. Penga niyan, migpunù sikandin diyà ki Jacob, “Ikà egpengognan te bayi dini tege Canaan. 2Doton ka den beling te Mesopotamya kidoen te balay te apò no si Betuel. Mèpiya aw pengognanen no se batà te emayen no si Laban. 3Ibeg ko, mèpiya se ibegay te Timanem diyà kamno, aw inangen din medita se bowad-bowad no lamig meinang ka kemonaan te medita pongan te otaw. 4Ibeg ko, tomanen te Timanem se impakang din diyà ki Abraham amon tig-epoen no sipat te menge bowad-bowad no se tanà seini inogpaan tadon, sìyan tanà impakang din diyà ki Abraham.”

5Penga niyan, impekesayo i Isaac si Jacob, aw dimoton sikandin te Mesopotamya taman ki Laban batà i Betuel tege Aramea. Si Laban se meama i Rebecca, aw emayen sikandin i Jacob aw si Esau.

6Nayan, netaga-taga si Esau te migtawal-tawal si Isaac amon mèpiya se ibegay te Timanem diyà ki Jacob, aw insogò din sikandin doton te Mesopotamya amon mengognan kidoen. Netaga-taga heman sikandin te pegtawal-tawal i Isaac tepad kandin, migpunù sikandin te eked din pengognani se bayi tege Canaan. 7Netaga-taga heman sikandin te timolò si Jacob te amay aw inay din aw dimoton sikandin te Mesopotamya. 8Pegketaga-taga i Esau te wedà keluba se amay din tepad te menge bayi tege Canaan, 9dimoton sikandin te emayen din si Ismael batà i Abraham, aw pinengognan din se batà din si Mahalat adi i Nebaiot.

Pegtegeinep i Jacob doton te Betel

10Nesayo si Jacob lekat te Berseba aw minipanaw sikandin migpesalo doton te Haran. 11Meneng pegsallep te aldaw, minidegà sikandin diyà te dalan. Minibat sikandin diyà te tanà amon tomedogi, aw bato se inolonan din. 12Migtegeinep sikandin. Kinità din se lelebangan impetindeg diyà te tanà aw minapet iyan te langit, aw medita se anghil egpenayit aw egtenà kidoen. 13Kinità din heman se Timanem timindeg kidoen, aw minikagi sikandin diyà ki Jacob, “Siak se Timanem gayed egseligan te apò no si Abraham, aw amay no si Isaac. Se tanà seini inibatan nikaw, yan se ibegay ko diyà kamno aw diyà te menge bowad-bowad nikaw. 14Inangen ko medita se bowad-bowad nikaw igsà eked dan kebilang iling te menge napò te tanà. Meg-ogpà se menge bowad-bowad no doton te kebelad te tanà pengkey kenan nikaw kitai. Mèpiya se ibegay ko diyà te kedita te otaw dini te keneyonan pineokit kamno aw bowad-bowad nikaw. 15Na, domoma a kamno aw meg-ipat a kamno pengkey kenan ka pesalo. Siak se megpeolì kamno dini te tanà seini. Gayed a domoma kamno lamig tomanen ko se kedita te impakang ko diyà kamno.”

16Neloka si Jacob, aw minikagi sikandin, “Dini se Timanem te ogpeanan seini, meneng wedà a ketaga-taga kenyan.”

17Migpeso sikandin, aw minikagi, “Kelemitanan se ogpeanan seini. Balay ini te Timanem. Seini se tetakep te lelebangan te langit.”

18Pegkeiselem niyan, inabat i Jacob se bato inolonan din, aw impetindeg din iyan amon inangen din iyan kekitaan. Penga niyan, tinoyongan din iyan te lana te olibo, so yan se pengilala te ininang din iyan simbahan te Timanem. 19Iningedanan din se tanà sìyan Betel (kelebadan niyan, balay te Timanem). Meneng iningedanan Luz se lonsod kidoen kedengan.

20Penga niyan, migpakang si Jacob diyà te Timanem, kagi din, “Aw domoma ka kanak, aw meg-ipat ka kanak te peg-ipanaw ko, aw memegay ka te kànen aw penenaktun diyà kanak 21lamig molì a doton te balay te amay ko, yan sikona Timanem se gayed ko seligan. 22Se bato seini impetindeg ko, yan se inangen ko simbahan kamno, aw ibegay ko heman diyà kamno se ikesempolò ketengà te keyemanan ibegay no diyà kanak.”

Currently Selected:

Genesis 28: mbs

Highlight

Copy