Genesis 27
27
Pegtawal-tawal i Isaac tepad ki Jacob
1Nayan, migketemoay den si Isaac, aw wedà den kità. Impeangay din se penganay batà din si Esau, aw minikagi sikandin, “Atò.”
Timaba si Esau, “Seini a, Amà.”
2Minikagi si Isaac, “Temoay a den, aw agpet a den matay. 3Na, ebati se kekamang nikaw, menge tonod aw bosog nikaw, aw doton ka te kebenesan amon megdansal ka. 4Peg-elomo ka te pengelapen mèpiya se nanam iling te egkeibegan ko amon kànen ko iyan. Penga niyan te eked a pa kematay, megtawal-tawal a amon mèpiya se ibegay te Timanem diyà kamno.”
5Dalem te peg-ikagi i Isaac diyà ki Esau, dinineg i Rebecca se kagi din. Pegkesayo i Esau amon megdansal, 6minikagi si Rebecca diyà te batà din si Jacob, “Na, dinineg ko gina se inikagi te amay no diyà te kakay no si Esau. 7Minikagi sikandin, ‘Pegdansal ka aw peg-elomo ka te pengelapen mèpiya se nanam amon kànen ko, aw penga niyan te eked a pa kematay, megtawal-tawal a amon mèpiya se ibegay te Timanem diyà kamno.’
8“Na, Atò, penenalan ka den diyà kanak amon tomolò ka te ipunù ko den kamno seini. 9Doton ka den te menge ayam-ayam, aw ebati se dowa nati te kambing melambò, aw siak se meg-elomo te kànen din mèpiya se nanam iling te egkeibegan te amay nikaw. 10Penga niyan, sikona se mengibing te kànen doton te amay no amon sikona beling se begayan te mèpiya aw megtawal-tawal sikandin te eked pa kematay.”
11Meneng minikagi si Jacob diyà te inay din, “Ontò bolbolen si Esau, meneng ontò a melenas. 12Megmeno a aw pemàdan a i Amà? Meg-aneng-aneng sikandin te meg-alo-alo a kandin, aw yan wedad ontong ko kandin, meneng detengan a beling te medaet pineokit kenyan.”
13Minikagi se inay din, “Atò, aw doen medaet domateng, siaken se detengan niyan. Tolò ka olò kanak. Engayi den se menge kambing.”
14Yan inangay i Jacob se menge kambing aw in-ated din iyan doton te inay din. Mig-elomo sikandin te kànen mèpiya se nanam iling te egkeibegan i Isaac. 15Penga niyan, inabat i Rebecca se mèpiya saol i Esau intagò kidoen te balay, aw impesaol din iyan ki Jacob. 16Insawol din se kindal te kambing sipat bolbol niyan diyà te bebenayen aw lieg i Jacob. 17Imbegay din diyà ki Jacob se mèpiya kànen aw pan ininang din.
18Dimoton si Jacob te amay din, aw minikagi sikandin, “Amà.”
Minikagi si Isaac, “Ee, Atò. Sinu ka lay?”
19Timaba si Jacob, “Siak se penganay batà no si Esau. Timolò a den te impunù no kanak. Enaw ka den, aw kaen ka den te pengelapen inibing ko, amon megtawal-tawal ka amon mèpiya se ibegay te Timanem diyà kanak.”
20Mig-insà si Isaac, “Atò, nengà lay wedà kenamay se pegdansal nikaw?”
Timaba si Jacob, “Tinebangan a te Timanem egseligan nikaw.”
21Penga niyan, minikagi si Isaac diyà ki Jacob, “Atò, pegpedapag ka diyà kanak amon pemàdan ta. Ontò ka lay batà ko si Esau?”
22Migpedapag si Jacob diyà te amay din, aw nemaed si Isaac kandin aw minikagi sikandin, “Iling te kagi i Jacob se kagi nikaw, meneng iling te bebenayen i Esau se bebenayen nikaw.”
23Wedà din kilelai si Jacob so bolbolen se bebenayen din iling te bebenayen i Esau. Yan se doun te timetoo si Isaac migpeketagad te pegtawal-tawal din tepad kandin.
24Mig-insà si Isaac, “Ontò ka lay batà ko si Esau?”
Timaba si Jacob, “Ee.”
25Minikagi si Isaac, “Begayi a den te kànen. Penga te pegpengaen ko, megtawal-tawal a amon mèpiya se ibegay te Timanem diyà kamno.”
Nemegay si Jacob kandin te kànen aw kimaen si Isaac. Inibing din heman se bino, aw mininem sikandin. 26Penga niyan, minikagi si Isaac, “Diyà ka Atò, aw pengadek ka kanak.”
27Dimoton si Jacob aw nengadek te amay din. Peg-adek i Isaac te penenaktun din, migtawal-tawal sikandin, “Mèpiya se nadeg te batà ko, iling te nadeg te tanà binegayan te Timanem te mèpiya. 28Begayan ka te Timanem te tanà melambò gayed egkeelem te namog, amon dakel se geniyen nikaw, aw amon dakel se bino inangen nikaw. 29Ibeg ko medita se pongan meinang sineligan nikaw, aw medita se otaw lomongken diyà kamno. Mengolo ka diyà te kedita te kedomaan nikaw, aw toloen ka te kedita te kedowa nikaw. Ipelumun te Timanem se kedita te otaw megtompuyus kamno, aw mèpiya se ibegay din diyà te kedita te otaw memegay te mèpiya diyà kamno.”
30Penga te pegtawal-tawal i Isaac tepad kandin, nesayo si Jacob, aw dimateng si Esau lekat te pegdansal din. 31Mig-elomo heman sikandin te kànen mèpiya se nanam, aw inibing din iyan doton te amay din. Minikagi sikandin, “Amà, enaw ka den aw kaen ka den te pengelapen inibing ko, amon megtawal-tawal ka amon mèpiya se ibegay te Timanem diyà kanak.”
32Mig-insà si Isaac, “Sinu ka lay?”
Timaba sikandin, “Siaken se penganay batà no si Esau.”
33Ontò tinegangtang si Isaac tandà te kepela din, aw mig-insà sikandin, “Aw sikona si Esau, sinu lay se nekeabat gina te pengelapen, aw nemekaen kanak? Te wedà ka pa dateng, kimaen a kenyan, aw migtawal-tawal a amon mèpiya se ibegay te Timanem diyà kandin, aw eked ko den iyan todai.”
34Pegdineg i Esau te inikagi te amay din, ontò sikandin migkelag aw migkoliyà, aw minikagi sikandin, “Amà, pegtawal-tawal ka heman amon mèpiya se ibegay te Timanem diyà kanak.”
35Meneng minikagi si Isaac, “Neekalan a te adi nikaw, aw neabat din den se itawal-tawal ko peden tepad kamno.”
36Minikagi si Esau, “Neketepad se ngadan din si Jacob (kelebadan niyan, eg-akal), so mekedowa den sikandin peg-akal diyà kanak. Kedengan nengagaw sikandin te ontong kinewaen te penganay batà no aw matay ka, aw nengagaw den heman sikandin te mèpiya ibegay peden te Timanem diyà kanak. Doen lay peden mèpiya wedà no pa pemoyoi ibegay te Timanem diyà kandin?”
37Timaba si Isaac, “Migtawal-tawal a amon meinang sikandin pengolo nikaw, aw meinang heman allang din se kedita te kedomaan din. Nemoyò a diyà te Timanem te dakel se geniyen din aw bino din. Atò, wedad den mèpiya pemoyoen ko ibegay te Timanem diyà kamno.”
38Minikagi si Esau, “Amà, wedad lay palos nesamà wedà no pemoyoi ibegay diyà kandin? Amà, pegtawal-tawal ka bag heman amon mèpiya se ibegay te Timanem diyà kanak.”
Penga niyan, migkelag sikandin.
39Minikagi si Isaac diyà kandin, “Meg-ogpà ka doton te tanà wedad kelambò aw eked elemi te namog. 40Keilangan mengabat ka te kelidoan pineokit te pegbolaw nikaw. Meinang ka allang te kedowa nikaw. Meneng aw eked no iyan keteyodi, mekelowà ka lekat te peglowan din.”
Pegkadas i Jacob doton ki Laban
41Gayed nebensi si Esau ki Jacob so migtawal-tawal se amay dan amon si Jacob se begayan te Timanem te ontò mèpiya. Minikagi si Esau, “Eked den kenamay matay si Amà, aw penga niyan imetayan ko si Jacob.”
42Pegketaga-taga i Rebecca tepad te inikagi i Esau, impeangay din si Jacob, aw minikagi sikandin, “Miglalang den ekon si Esau mengimatay kamno amon meabat se kebensi din. 43Na Atò, tolò ka den kanak. Kadas ka den, aw doton ka te meama ko si Laban kidoen te Haran. 44Làno-làno ka peg-ogpà doton lamig megkewedad se keopal te kedowa nikaw. 45Aw kelibelan din se ininang no diyà kandin, ipeangay ta amon mekeolì ka dini. Keilangan komadas ka den, so eked a keibeg aw dowa kaw telekedowa se matay dalem te sebad se aldaw.”
46Minikagi heman si Rebecca diyà ki Isaac, “Ontò melima se peg-ogpà ko doma te menge ogangan ta tege Heti. Aw pengognanen i Jacob se tege Heti iling te didowa bayi pinengognan i Esau, labi pa mèpiya aw matay a.”
Currently Selected:
Genesis 27: mbs
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc. All rights reserved.
