Genesis 21

Pegtebaw i Isaac

1Nayan, tinoman te Timanem se impakang din, aw mèpiya se imbegay din diyà ki Sara. 2Miglaman sikandin, aw tinebawan sikandin te batà meama i Abraham, pengkey temoay den sikandin. Timebaw se batà te aldaw tapay impakang te Timanem tepad kenyan. 3Iningedanan i Abraham se batà din ki Isaac (kelebadan niyan, nebebayat). 4Pegdateng te ikewalo te aldaw lekat te pegtebaw i Isaac, tinolì sikandin i Abraham iling te impunù te Timanem kandin. 5Sebad gatos se omay i Abraham te pegtebaw i Isaac.

6Minikagi si Sara, “Binegayan a den te Timanem te keluba, aw yan egkebebayat a den. Mebebayat heman se kedita te otaw domineg tepad kani tandà te keluba dan.”

7Minikagi heman sikandin, “Kedengan, wedad palos otaw mekeikagi diyà ki Abraham te doen aldaw megpesoso a te batà. Meneng tinebawan a den beling te batà din, pengkey temoay den sikandin.”

Pegpekesayo ki Agar aw si Ismael

8Timilles si Isaac, aw biningà sikandin. Dakel se kànen ininang i Abraham te aldaw te pegbingà kandin. 9Meneng se batà i Abraham si Ismael timebaw diyà ki Agar tege Ehipto, yan se gayed migbidò te batà i Sara si Isaac. Pegkità i Sara kenyan, 10minikagi sikandin diyà ki Abraham, “Pekeseyowi se allang sìyan sipat te batà din, so eked kepakay aw kebegayan se batà te allang te ketengà te keyemanan nikaw aw matay ka, so keilangan ibegay se kedakel niyan diyà te batà ko si Isaac.”

11Ontò nepuluk se pedowan i Abraham tepad kenyan, so batà din heman si Ismael. 12Meneng minikagi se Timanem diyà ki Abraham, “Ikà egkepuluk tepad te telaki aw allang no si Agar. Tolò ka te impunù i Sara kamno, so se menge bowad-bowad te batà no si Isaac, yan olò se eneng-enengen ko te ontò bowad-bowad nikaw. 13Inangen ko heman dakel pongan se menge bowad-bowad te batà te allang, so batà no heman sikandin.”

14Pegkeiselem niyan, limapos si Abraham nemegay te kànen aw sesalok nepenò te wayeg diyà ki Agar amon bebaen din, aw impekesayo din si Agar aw batà din. Dimoton dan te kebigtilan te Berseba, aw miglegeb-legeb dan kidoen.

15Pegkeamin te wayeg inibing dan, timanan si Agar te batà din doton te pinonoan te kayo mebabà. 16Minalin sikandin te menge sebad pawà lekat te batà din aw nenenoo kidoen. Mig-aneng-aneng sikandin, “Eked a keibeg komità te pegkematay te batà ko.”

Dalem te pegpenenoo din kidoen, migkelag sikandin.

17Dinineg te Timanem se pegkelag te batà, aw minikagi se anghil te Timanem lekat te langit, “E Agar, nengà lay migkelag ka? Ikà egkelemitan. Dinineg te Timanem se pegkelag te batà no doton sida. 18Enaw ka den, aw doton ka te batà nikaw, aw sinelayi sikandin, so inangen ko dakel pongan se menge bowad-bowad din.”

19Penga niyan, impekità te Timanem se sokian diyà ki Agar. Yan dimoton sikandin, aw inipenò din se sesalok, aw impeinem din se batà din.

20Mèpiya se imbegay te Timanem diyà te telaki sìyan. Pegtilles din, mig-ogpà sikandin doton te kebigtilan, aw ontò sikandin metomawan egpemanà. 21Peg-ogpà din doton te kebigtilan te Paran, impepengognan sikandin te inay din diyà te bayi tege Ehipto.

Pegpepekangay i Abraham aw si Abimelec

22Nayan, migpetaking si Abimelec te pengolo te menge sondalo din si Picol, aw dimoton dan ki Abraham. Minikagi si Abimelec, “Netegahan ko te gayed ka egtebangan te Timanem, pengkey eden se inangen nikaw. 23Yan ibeg ko megsapà ka den diyà te Timanem te eked ka palos peg-akal kanak, menge batà ko, aw menge bowad-bowad ko. Gayed mèpiya se ininang ko diyà kamno, aw yan pegpakang ka den te gayed mèpiya se inangen no diyà kanak aw menge doma otaw eg-ogpà dini te tanà inogpaan nikaw.”

24Minikagi si Abraham, “Yan se ipakang ko den diyà kamno.”

25Penga niyan, mig-indan si Abraham kandin te doen sokian pig-agaw te menge sineligan i Abimelec. 26Meneng minikagi si Abimelec, “Wedà ko ketegahi aw sinu se mig-agaw kenyan. Wedà a no indani, aw wedà ko iyan ketegahi lamig seini.”

27Penga niyan, nemegay si Abraham te menge karniro aw baka diyà ki Abimelec, aw migpepekangay dan. 28Meneng tinani i Abraham se pito nati bayi te karniro diyà te menge doma karniro din. 29Mig-insà si Abimelec, “Nengà lay tinani no iyan?”

30Timaba si Abraham, “Kinewai se pito nati te karniro seini, aw yan doen pengilala te siak se migpebangbang te sokian seini.”

31Yan se doun te iningedanan se ogpeanan sìyan Berseba (kelebadan niyan, sokian te pakang), so migpepekangay dan kidoen.

32Penga te pegpepekangay dan kidoen te Berseba, minolì si Abimelec aw si Picol doton te tanà te menge tege Filisti. 33Penga niyan, nenanem si Abraham te kayo tamarisko doton te Berseba, aw migtawal-tawal sikandin diyà te Timanem wedad temanan. 34Nenamay mig-ogpà si Abraham doton te tanà te menge tege Filisti.

Currently Selected:

Genesis 21: mbs

Highlight

Copy