Genesis 12

Pegtawal te Timanem ki Abram

1Nayan, minikagi se Timanem diyà ki Abram, “Tanan ka den te tanà inogpaan no seini. Tanan ka den heman te menge kedomaan nikaw aw pamilya te amay nikaw. Doton ka den te ogpeanan tedoan ko kamno. 2Medita se bowad-bowad ibegay ko diyà kamno, aw meinang dan dakel pongan. Mèpiya se ibegay ko diyà kamno, aw inangen ko medengeg se ngadan nikaw. Mèpiya heman se ibegay ko diyà te menge doma otaw pineokit kamno. 3Mèpiya se ibegay ko diyà te kedita te otaw memegay kamno te mèpiya. Meneng ipelumun ko se kedita te otaw megtompuyus kamno. Pineokit kamno, mèpiya se ibegay ko diyà te kedita te otaw dini te keneyonan.”

4Yan timolò si Abram te punù te Timanem, aw nesayo sikandin tinekingan i Lot. Kepitowan teg lima se omay i Abram te pegkesayo din lekat te Haran. 5Impetaking i Abram se esawa din si Sarai, aw anak din si Lot, aw inibing din se kedakel te kedònan aw kedita te allang neabat din doton te Haran, aw nesayo dan pesalo doton te Canaan.

Pegdateng dan doton te Canaan, 6dimeleg si Abram lamig dimateng sikandin doton te kayo olayan i More doton te ogpeanan te Sikem. Pegdoton din te Sikem, doen pa menge tege Canaan mig-ogpà kidoen. 7Migpekità se Timanem diyà ki Abram, aw minikagi sikandin, “Seini se ogpeanan ibegay ko diyà te menge bowad-bowad nikaw.”

Yan mig-inang si Abram te sonoganan te ayam-ayam ibegay diyà te Timanem migpekità diyà kandin. 8Penga niyan, dimeleg sikandin pesalo doton te menge bontod lenged te eglibtakan te lonsod te Betel. Mig-ogpà sikandin diyà te tengà-tengà te lonsod te Betel aw Ai. Lenged te egsellepan se lonsod te Betel, aw lenged te eglibtakan se lonsod te Ai. Mig-inang heman sikandin te sonoganan te ayam-ayam kidoen, aw migsimba sikandin te Timanem. 9Penga niyan, gayed sikandin mig-alin-alin pesalo doton te Negeb.

Pegdoton i Abram te Ehipto

10Nayan, doen bitil doton te Canaan, aw dimeleg si Abram doton te Ehipto amon meg-ogpà dan doton te menamay-namay, so ontò dan nebitilan. 11Pegkedapag dan doton te Ehipto, minikagi si Abram diyà te esawa din si Sarai, “Mèpiya ka bayi tengtengen. 12Yan aw komità se menge tege Ehipto kamno, meg-aneng-aneng dan te teleesawa ki, aw yan mengimatay dan kanak amon egawen ka dan. 13Yan ikagi ka kandan te telekedowa ki amon eked a dan imetayi, meneng segmanen a dan beling so etebay ta.”

14Pegdateng dan doton te Ehipto, kinità te menge otaw kidoen te mèpiya bayi tengtengen se esawa din. 15Pegkità te menge opisyal te selotan kandin, mig-indan dan te selotan tepad te kèpiya din, aw yan impeogpà din si Sarai doton te balay din. 16Mèpiya se imbegay te selotan diyà ki Abram so etebay din si Sarai. Yan binegayan sikandin te medita karniro, kambing, baka, asno, allang, aw kamilo.

17Meneng so impeogpà te selotan se esawa i Abram si Sarai doton te balay din, doen menge medaet mesakit imbegay te Timanem diyà te selotan aw kedita te doma otaw mig-ogpà kidoen te balay din. 18Yan impeangay te selotan si Abram, aw minikagi sikandin, “Medaet se ininang no diyà kanak, so wedà a no indani te teleesawa kaw. 19Meneng minikagi ka beling te telekedowa kaw, aw yan nengognan a kandin. Na, dini den se esawa nikaw. Petekingi sikandin, aw kesayo kaw den.”

20Penga niyan, insogò te selotan se menge sondalo meg-ated ki Abram, aw esawa din, aw kedakel te kedònan din te pegkesayo dan.

Currently Selected:

Genesis 12: mbs

Highlight

Copy