Ann Bokwakwarin 29

Jacob Inat Laban An Go Mafamai Igat

1Jacob nana ibib inai ato inat sabu au wera matan tafanamai nan simama on auris igat. 2On matan iyeit on dogu sareu it, ato sheep kuayo matas engon ton on nan sikibubuai siyen. Osi sheep min on dogu sareu emon sareu sitotoman, ato agim gagamin on dogu sareu awan siyayafotai. 3On an rai sheep engon si nat sibikaita weie sheep kaifarotis dogu awan emon agim sirurukou i gat ato sareu sibites sitotoman isasawar weie agim sirurukou irur men an efanai.

4Jacob sheep kaifarotis itetemis iyau, “Yau tuturau, omi on men emon?” Osi siyafotai siyau, “Wei on Haran yangan.”

5On itetemis iyau, “Omi Nahor wawan Laban min wosagobai i?” Osi siyafotai siyau, “Aee, wei wasagobai.”

6Jacob on itetemis iyau, “On min basit emama i?” Osi siyafotai siyau, “On basit emama, ato eit, on natun jeverei Rachel on ato an sheep mat sibib senat.”

7Jacob iyau, “Ari on aiyet ato wera men ibo on sheep unboes unar asi goai, om sareu eites setoman ato eboes ematabir men wayo sinam.”

8Osi siyafotai siyau, “Wei men fofonin nanaba waniyamai, ainau on sheep engon sinat nin sinikaita weie dogu awan emon agim wanrukou inan ato sheep sareu wanites sintoman.”

9Jacob on nana sheep kaifarotis auris ibikakafun ato Rachel taman Laban an sheep mat sinat. 10On an werai Jacob on Rachel a abun Laban an sheep mat ites on, on totor inai dogu sareu awan agim irukou ato sheep sareu ites sitoman. 11Namon Jacob on Rachel iboyayanin ato aumiet itou. 12On iyawur iyau, “Yau on om tamam an tara, Rebecca natun orot.”

Ato jeverei iyayai inai taman ikasonai. 13On an werai Laban abun Jacob duran itatam, on iyayai inat inefotai, irous iboyayanin ato ibo inat goa amonai sirui. Jacob bobo aifan simamatar on engon abun Laban aurin idudur. 14Laban iyau, “Ai, dura bag, om on yau biou au tara turin.” Ato Jacob nan roke kaitamom ima.

Jacob On Rachel Leah Rus Auris On Laban Iagirai

15Laban imisir Jacob iyawur iyau, “Om men yau au dam warar on mes bobo asir unabo on. Om ekasoneu am baiyan biyam egogoi unboai?” 16Laban nanatun jeverig ruam; ainau jeverei on wabin Leah, ato giya jeverei wabin on Rachel. 17Leah on matan obis, ato baise Rachel on mamarag.

18Jacob on Rachel inuaboai kwakwan, on mes iyau, “Yau arimon kwanda nimtereban ruam aurim anabo ato angaramin on natum giya jeverei Rachel on uniteu aniawan.”

19Laban iyafotai iyau, “Iyobin bag, yau om anitem uniawan ato men orot tani abinonotai on, on mes nana bisiwui ema.” 20Jacob on kwanda nimtereban ruam bobo iboen onai Rachel itboai. Ato Jacob ibobo an nanianai on sitau on ra ton o bat nanaba iboen bait, yabin on Rachel inuaboai kwakwan on mes.

21Namon Jacob on Laban iyawur iyau, “Wera ato abobo on aisawarai nono, om natum jeverei eiteu aniawan.” 22On mes Laban tabin an forag ibotitiwag ato sabu engon ibebegis sinat. 23Baise on fom Laban on rouser Leah on ibo inai Jacob itai rus siyen. 24Laban an agir jeverei Zilpah on natun Leah itai an bobo jeverei mes. 25Ra itom fomenei weie Jacob it isagob on Leah ato Laban iyawur iyau, “Om aibo mes on nanaba aurim ufour? Yau Rachel aurin on aboen ato aibo mes uisigoweu?”

26Laban iyau, “Wei nin ai kik on men nanaba yen gigiawan ainau setatabin weie ainauan on gibui. 27Om emousin atonio tabin forag tafaror kaitamom on insawar weie giya jeverei Rachel ba wanitem, on an garamin on kwanda nimtereban ruam ba auriu unabo.”

28Jacob ibasit ato tabin an forag yasisir tafaror kaitamom isawar gibunai Laban natun jeverei Rachel ba itai awan mes. 29Laban an agir jeverei Bilhah on natun jeverei Rachel itai on an bobo jeverei mes. 30Jacob on Rachel ba rus siyen a on inuaboai kwakwan bag men Leah ba. Namon Laban aurin kwanda nimtereban ruam ba iboen.

Jacob Nanatun Sirat

31On an werai BADA it on Jacob an nuabo Leah aurin on kafakakai wat ato Rachel on ibinuaboai kwakwan, on mes iyamai Leah on fofonin fifirig initu, baise Rachel on fifirig ambin. 32Leah inafot ato natun orot irat. On iyau, “BADA au yababan it ato ari weie yau awau arimon ininuaboiu.” On mes iwabai Reuben. 33On inafot men ato natun orot tani ba irat. On iyau, “BADA natu orot iteu men, yabin On itatam Jacob on yau men ebinuaboiu.” On mes iwabai Simeon. 34On min on inafot men ato natun orot tani ba irat. On iyau, “Ari weie awau arimon yau bisiwui wat, yabin nanatun orot ton aitu.” On mes iwabai Levi. 35Namon Leah inafot men ato natun orot tani ba irat. On iyau, “Ari weie yau BADA anifain aniduduranai.” On mes iwabai Judah. Namon on fifirig baitu ibotan.

Currently Selected:

Ann Bokwakwarin 29: ubr

Highlight

Copy