Ñwaè' Ruêm 13

1Ŋwɛ̀ wɛɛwɛ yu'ni nè bèe ce a ce sa' to' njobè' Nyʉ̀ a ŋwɛ̀ ce e gèe enɛ bèe mo' a sa' bèe mo'. Nyʉ̀ ka' tɛ fa ŋwɛ̀ ŋger à rsa' bèe ka', ŋgàŋ tʉr ŋger anà ka'. 2Banɛ ŋwɛ̀ ce e ka' tee tu nè bèe ce a ce sa' bèe, banɛ ŋgàŋ à tèe tu nè yuu ce Nyʉ̀ à gèe. Bèe ce a ka' gee wa'a, banɛ wowèe a ce kɛ' ŋgɛ' mbe wǎp btù. 3Àde' ŋwɛ̀ ce e ce gèe ŋgěe bòŋboŋ wɛp ŋwɛ̀ ce e ce sa' bèe ka'. Ŋwɛ̀ ce àde' e wɛp ye, yu ba ŋwɛ̀ ce e ce gèe ŋgěe bebep. Wɛ̀ ka' ce kòŋ à rwɛp ŋwɛ̀ ce e ce sa' bèe ka', à gee ŋgěe bòŋboŋ tɛ e bo yòŋshi wɛ̀. 4Ŋwɛ̀ ca ce fà' ba nè Nyʉ̀ tɛ e bo jà' wɛ̀. Wɛ̀ ka' gee yuu bebep, à wɛp ye, njobè' ŋger ce a fa ye anà yi yu à cicì ka'. Nyʉ̀ à fa ye ŋger à rkʉsi mcucu' nè bèe ce a ce gèe buu bbebep. 5Banɛ yi yu yɛɛnì à ryu'ni nè ŋgǎa rsa', ke' ku ba ba njobè' à ce wɛp ŋgɛ' ka'. Gèe wa'a fà dì' yo ntee yi bo ce sa' wɛ̀ ka'.

6A mbùu ce wěe ke là' mbǎa bàrà' foŋ, njobè' bèe ce a ce kùu mbǎa bàrà' a ce fà' ba nè Nyʉ̀. 7Fa nè yuu ce wèe à ba fa nè ŋwɛ̀ wɛɛwɛ. Kɛ̀ yu mbǎa bàrà' ɛ̀, kɛ̀ yu mbàa ce a làa enɛ à la' àtu buu ce wɛ̀ tʉr ɛ̀, là' yuu ce wɛ̀ ba là'. Wɛp bèe ce wɛ̀ ba wɛp, yu'ni nè bèe ce wɛ̀ ba yu'ni nè wowèe.

8Wèe ŋwɛ̀ mò' fa ba nè rkaa ka'. Rkaa ce àde' à tʉr wèe ŋwɛ̀ li yu enɛ à kòŋ ŋgàŋ. Ŋwɛ̀ à ka' koŋ bèe, banɛ e lɛ̀ mncir wɛɛwɛ. 9Mncir Nyʉ̀ vi ce làa enɛ̂, “Fa koo ŋgwa ŋwɛ̀ mò' kɛ̀ nduu ŋwɛ̀ mò' ka', fa yʉ ka', fa yɛ̀ɛ ka', fa gani ka'.” Mncir ca wɛɛwɛ ker ba mncir mo' vi tɛɛ ba mbendù ncir e mo'sir. Ncir anà yi yu enɛ̂, “Kòŋ nfʉrò àmbò wɛ̀ kòŋ yò nyor.” 10Ŋwɛ̀ à ka' koŋ nfʉr yì, e ker gee yu bebep nè ye ka'. Ŋwɛ̀ à ka' koŋ ŋwɛ̀ banɛ e lɛ̀ mncir wɛɛwɛ.

11Wèe ce koŋni wa'a njobè' wèe rìŋ enɛ nfè' ce wèe à ba lɛ' efa mmirlò à ghɛɛ. Nfè' ce Nyʉ̀ be gèe tɛ sèe luŋ yu sè'ni àtʉtʉ a caa àmbò e m ba à nfè' ce sèe à m kɛ̀' byemi nè Jisos Krǎis nà. 12Mbèr à lò, tʉ̀' à kɛ' a ce raa. Banɛ sèe ma' ŋgěe nètʉ', lor buu bìr e nèmootì, yar. 13Sèe gee ŋgèe àmbò bèe ce a ce cu ba à rraa. Sèe fa ce dù mŋkǎ' bghaa, kɛ̀ ce no buu tɛ vi ce koo sèe ka'. Sèe borni bsàkì ba mkɛ'ni. Sèe borni mlap ba ŋko'ndoŋ. 14Lòr nè ba ndèe Tata Jisos Krâis. Fa fa nè njì nè buu bebep ce ŋwɛ̀ e ke kòŋ à rgèe nà ka'.

Currently Selected:

Ñwaè' Ruêm 13: LNT

Highlight

Copy