Ñwaè' Maêk 9

1E m làa nè wowèe enɛ̂, “M ce suŋ wèe nè mini-ŋwɛ̀ enɛ bèe mo' a yu à mʉ̀ bèe ce a tɛɛte na ce rkwe li be jòo wowèe ka'. Wowèe a be kù cu caar yɛ kʉʉ Nyʉ̀ àmbò yi vʉ̀ nè ŋger-ŋwɛ̀.”

2Mnòŋ vi ka' càa ntuunfu, Jisòs à lor Pità ba Jɛ̂ms, ker ba Jǒn, a ko' a wowèe mbe rtǔu rsàsap, à ku ba wowèe mbo cà'cà'. A m bà' mbo, Jisòs à kupsè a ba à njɛ̌ɛ jɛɛ. 3Vi bcɛ̀' vi beetì bbʉʉ, a ce là'ŋger sê, a fʉp ce àde' ŋwɛ̀ à m ba su'si vi fʉp wa' ka'. 4Ka' cu, Àlajà ba Musìs a nyɛɛ, a ce de' a Jisòs. 5Awɛ Pità à laa nè Jisòs enɛ̂, “Rabài yi bòŋ àmbò sèe yu àfa na. Mà'shi tɛ wèr ba'ri btǎp btaar, tɛ mo' ba yo, tɛ mo' ba yi Musìs, tɛ mo' ba yi Àlajà.” 6E m yi yuu ce e laa ka' njobè' wowèe a m ce wɛp sê. 7Mmbà' vi vʉ̂, a cete wowèe, njèndoŋ à laa enjep mʉ̀ mo enɛ̂, “Cena yu muu wà ce m kòŋ sê. Ce yu' nè yuu ce e ce làa.” 8Wowèe a ke'sè ŋgòŋ, a ker yɛ ŋwɛ̀ mò' caa efa Jisòs ka'.

9Wowèe a ka' ce sùu embe rtùu, Jisòs à ciisì nè wowèe enɛ a fa suŋ ŋwɛ̀ yuu ce wowèe a yɛ nà ka', caar tɛ Muu Ŋwɛ̀ ke fʉʉ efa rkwe. 10Wowèe a m suŋ ŋwɛ̀ ka', geewa'a, a ce tarni enɛ nfʉʉ efa rkwe ca yu ba kɛ lɛ. 11Wowèe a m bipshi nè ye enɛ̂, “Ŋgǎa ryɛ'ni mncir a ce làa enɛ Àlajà be vʉ̀ entombì njokɛ?” 12E beesì a laa enɛ̂, “Rtarnì li yu njo ka', Àlajà be vʉ̀ wɛɛ, gèe tɛ buu wɛɛwɛ kʉti àmbò vi m ba. Banɛ a saŋ mbe Ŋwǎ' Nyʉ̀ enɛ Muu Ŋwɛ̀ be kù yɛ ŋgɛ' sê, tɛ bèe a jaasi ye njokɛ? 13M ce suŋ wee mɛnɛ Àlajà à vʉ̀ war, bèe a gee buu ce a m ce kòŋ à rgèe nè ye, àmbò a saŋ mbe Ŋwǎ' Nyʉ̀.”

14Wowèe a m vʉ̀ a yɛ bɛr ŋgǎa yɛ'ni yì buu, ku' bèe a sir wowèe, ŋgǎa ryɛ'ni mncir a ce sɛr nsɛr a wowèe. 15Ku' bèe ca a ka' kù yɛ ye, a bɛɛŋger sê, a caŋse a du à rcà'ni ye. 16E bipshì nè ŋgǎa yɛ'ni yì buu enɛ̂, “Wèe ce sɛr ba kɛ wèe wowèe?” 17Ŋwɛ̀ mò' efa mʉ̀ bèe anà à beesì enɛ̂, “Ŋwɛ̀ Ryɛ'nì, mɛ̀ ba vʉ nè muu wà à ryɛ wɛ̀. Yʉ' bebep yi yu njep ye, a gêe, e ke' ce làa ka'. 18Yi lò gee ye, e gwe à nshè, bdʉdʉ' vi fʉʉ ye à cùu, e ce kʉr msòŋ, tee mbà yɛɛ. Mɛ̀ laa nè ŋgǎa yɛ'ni yò buu mɛnɛ a fʉr yʉ' anà, wowèe a moo làr.” 19E laa nè wowèe enɛ̂, “Haba! Wěe bèe e lùuni ce wèe buu rbyemì! M be cu wèe sèe dù bà' fɛ? M be kur ntee nè wèe dù bà' fɛ? Vʉ̀ nè muu anà fa nè mɛ̀.” 20A m vʉ̀ nè muu anà a fa nè ye. Yʉ' cà yi ka' yɛ Jisòs, a gêe, muu anà à gwe kà', a ce biŋri a ce fʉr bdʉdʉ' à cùu. 21Jisòs à bipshi nè tar muu enɛ̂, “Muu ca à m kɛ̀' yaŋ ca à se'kɛ?” E beesì enɛ̂, “Yi m ku kɛ' à nfè' e m bii ŋkɛ'. 22Yi m lò ku ce mà' ye njep mor ba njep rò à ryʉ ye. Ka' ba enɛ àde' à gee yuu mo', à koosìmnse nè wèr, ja' wèr.” 23Jisòs à laa nè ye enɛ̂, “À ce làa wɛnɛ, ‘ka' ba enɛ àde' à gee yuu mo'’ wa'a, a ce làa ba enɛ kɛ? Buu wɛɛwɛ yu àtɛ̀r nè ŋwɛ̀ ce e byemi.” 24Tar muu anà à ku waa à cùu anà, a laa enɛ̂, “Mɛ̀ byemi. Gèe tɛ la rbyemì li tap.” 25Jisòs à m yɛ enɛ ku' bèe a ce vʉ̀se, e waa yʉ' bebep anà a laa enɛ̂, “Wɛ̌ yʉ' ce yi ke gèe ŋwɛ̀ e fuŋrè ker ba lʉr, mɛ̀ laa nè wɛ̀: fʉʉ enjep ye. Fa kèr niŋ njep ye nyʉ̀ mò' ka'.” 26Yʉ' anà yi waa, e ker gwe kà', yi fʉʉ enjep ye, e noŋ àmbò gʉ̀ʉ ŋwɛ̀ wa'a. Wèe mo' a ce làa enɛ e kwe. 27Jisòs à ghashì ye à rkoo, a naa mbekì, e natì a tɛɛ.

28E ka' niŋ mbe ndàp, ŋgǎa yɛ'ni yì buu à ku ba Jisòs a wowèe, wowèe a bipshì nè ye enɛ̂, “Wèr à ba moo a rfʉr yʉ' anà enjep ye làr njokɛ?” 29E laa nè wowèe enɛ̂, “Yuu ce àde' yi fʉr njɛ̀ɛ yʉ' ca enjep ŋwɛ̀ ku ba rloo rtatap cà'cà'.”

30Wowèe a m nàti a caa njǐ à ŋgǒŋ Galèlê. Jisòs à koŋ enɛ ŋwɛ̀ mò' yi ka', 31njobè' e m ce yɛ'ni ŋgǎa yɛ'ni yì buu, a ce laa nè wowèe enɛ̂, “A be lòr Muu Ŋwɛ̀ fa mbà mmbo bèe, tɛ a yʉ ye, tɛ e fʉʉ efa rkwe mbenjì mnǒŋ btaar.” 32Geewa'a wowèe a m rìŋ yuu ce e m làa ka', a ce wɛp à rbipshi nè ye.

33Wowèe a m dù a ba' à rla' Kàpanùm, a ka' niŋ mbe ndàp, e bipshì nè wowèe enɛ̂, “Wèe à ba ce sɛr ba kɛ à nduunjì?” 34Wowèe a beesì ka', njobè' wowèe a m ce sɛr enɛ ŋwɛ̀ ce e yu ŋwɛ̌ ŋgòr efa wowèe a nda lɛ? 35E cu à nshè, a kɛ' yì bèe ce ncòp-baa-à-rrʉ̀ʉ, a laa nè wowèe enɛ̂, “Ŋwɛ̀ ce e ka' ce kòŋ à rba ŋwɛ̀ e kùntombì, banɛ e be lòr yi tu à ŋwɛ̀ embà lʉ̀simbùu, ba à ŋwɛ̀ rfà' nè bèe wɛɛwɛ.” 36E m lòr mʉ ghàrŋwɛ̀ a tɛr mbe wǎp mʉ, a koo ye nje nyòr, a laa enɛ̂, 37“Ŋwɛ̀ ce e ka' koni mʉ ghàrŋwɛ̀ àmbò ca fa mɛ̌ rlii, banɛ ŋgàŋ à koni mɛ̀. Ŋwɛ̀ ce e ka' koni mɛ̀, banɛ e koni ba mɛ̀ ka', e koni ba ŋwɛ̀ ce e m tuu mɛ̀.”

38Jǒn à laa nè Jisòs enɛ̂, “Ŋwɛ̀ Ryɛ'nì, wèr à mʉ yɛ ŋwɛ̀ mò' e ce fʉshi byʉ' mnyʉ̌mkà' enjep bèe fa wɛ̌ rlii. Wèr à laa nè ye enɛ e fa kèr gèe wa' ka' njobè' e yu mo' efa sěe mʉ ka'.” 39Jisòs à laa nè wowèe enɛ̂, “Wèe fa làa enɛ ŋgàŋ borni ka'. Ŋwɛ̀ ce e ka' gee rfǎ' rghagha' fa mɛ̌ rlii banɛ àde' e laa yuu bebep kuu mɛ̀ ka'. 40Ŋwɛ̀ ce e ka' ba yìsèe ŋwɛ̀ bbàa ka', banɛ e yu yìsèe ŋwɛ̀. 41M ce suŋ wèe nè mini-ŋwɛ̀ mɛnɛ ŋwɛ̀ ce e ka' fa wèe ndoŋ mdip njobè' wèe yu bèe Krâis, àde' e bɛ vi blà' ka'.”

42“Ŋwɛ̀ ce e ka' gee mò' efa boo bkɛ' ce a byemi nè mɛ̀ na, e gee yuu bebep, banɛ yi be ba àndèe nè ye ce a ka' lor ma lǔr ŋgò' baa cʉʉ ye kù ndoŋ, ma' njep rdip rgòr. 43Yo bo yi ka' gee wɛ̀ à gee yuu bebep, à tee yi ma'; yi yu àndèe enɛ à niŋ mbe dǐ' rcu ce nfesè, buu bo, nè ce enɛ à tʉr mmbo mmbaa dù njep mor ce àtà a liisì ka'. 44-45Yo kùu yi ka' gee wɛ̀ à gee yuu bebep, à tee yi ma'; yi yu àndèe enɛ à niŋ mbe dǐ' rcu ce nfesè, buu kùu, nè ce enɛ à tʉr mkùu mmbaa, tɛ a ma' wɛ̀ njep mor. 46Mor anà yi be kè liiti nyʉ̀ mò' ka'. 47Lo rlir li ka' gee wɛ̀ à gee yuu bebep, à so'ni li enje tù, ma'; yi yu àndèe enɛ à ba ntò' rlir, niŋ mbe dǐ' kʉʉ Nyʉ̀ nè ce à tʉr mmir mmbaa tɛ a ke koo wɛ̀, mà' njep mor. 48Mŋgʉ̌r ce mi ce ye wowèe njo mi be kweŋger ka', tɛ mor anà yi liiti ka'. 49A be kè yo' ŋwɛ̀ wɛɛwɛ nè mgwaŋ ce yu ba mor. 50Mgwaŋ mi bòŋ. Geewa'a mi ka' cir, àde' wèe gee weekɛ mi ka' ker lêe? Banɛ wèe ba àmbò mgwaŋ mlèelee. Cu nè nè rfʉtè-ŋwɛ̀.”

Currently Selected:

Ñwaè' Maêk 9: LNT

Highlight

Copy