Ñwaè' Maêk 10

1Jisòs à natì a du à ŋgǒŋ Jùdiyà, a ker du à ŋgǒŋ nèŋguu rdip Jodàn. Ku' bèe a ker vʉse à ryɛ ye, e yɛ'ni wowèe àmbò e m ku ce yɛ'ni bèe nà. 2Bèe Farìsi mo' a vʉ̂, a mooshi ye, a bipshi nè ye enɛ̂, “Wà' ncir yi byemi enɛ ŋwɛ̀ juu ŋgwa yì a?” 3Jisòs à beesì nè wowèe enɛ̂, “Musìs à m làa nè wèe enɛ kɛ?” 4Wowèe a laa enɛ̂, “Musìs à m fa njì enɛ ŋwɛ̀ à ka' kòŋ à rjùu ŋgwa yì, e saŋ ŋwà' fa nè ye à rdùŋshi enɛ e sà'si gùu, ka' jùu ye.” 5Jisòs à kʉsì nè wowèe enɛ̂, “Musìs à m saŋ ncir ca nè wèe njobè' wèe tèe btu. 6Geewa'a à m ba efa rkɛ̀' Nyʉ̀ à boo mbaŋrùŋwɛ̀ ba njeŋwɛ̀. 7A mbùu ce yi yu enɛ mbaŋrùŋwɛ̀ be mà'shi yì ta ba yì mâ, cu a ŋgwa yì, 8tɛ a ye a ba à ŋwɛ̀ mò'sir. Banɛ wowèe a ker ba a baa ka', a yu ba ŋwɛ̀ mò'sir. 9Banɛ yuu ce Nyʉ̀ à ka' tarshi, ŋwɛ̀ mò' fa gàpse ka'.”

10Wowèe a ka' kʉti mbe ndàp, ŋgǎa yɛ'ni yì buu a ker bipshi yuu kuu yuu ce e m làa anà. 11E beesì nè wowèe enɛ̂, “Ŋwɛ̀ ce e ka' juu ŋgwa yì, lor mò', banɛ e koo njeŋwɛ̀ ce e yu ŋgwa yì ka', 12njeŋwɛ̀ ye ye ka' ma'shi nduu yì du bgùu a mbaŋrùŋwɛ̀ mò', banɛ e nòŋ a mbaŋrùŋwɛ̀ ce yu nduu yì ka'.”

13Bèe a m vʉ̀ nè bghàrbèe enɛ Jisòs bo jòo wowèe, ŋgǎa yɛ'ni yì buu a lapnì bèe anà. 14Jisòs à ka' yɛ wa'a, nyòr à bep ye sê. E laa nè wowèe enɛ̂, “Mà'shi tɛ boo anà a vʉ yɛ mɛ̀, wèe fa jepsi wowèe ka', njobè' kʉʉ Nyʉ̀ yi yu ba nè bèe ce a yu àmbò boo ca. 15Mɛ̌ suŋ wèe nè mini-ŋwɛ̀ mɛnɛ, ŋwɛ̀ ce e ka' tɛ koo kʉʉ Nyʉ̀ àmbò muu ŋkɛ' ka', àde' e ke niŋ mbe dǐ' kʉʉ Nyʉ̀ anà ka'.” 16E ka' làa wa'a, a koo wowèe nje nyòr, a la' mmbo mbe wǎp ndù, a ghoni wowèe.

17Jisòs à ka' ce dù rjɛ̀r, ŋwɛ̀ mò' à caŋ a vʉ a gʉ'shi njep yě tìi, a bipshi nè ye enɛ̂, “Ŋwɛ̀ ryɛ'nǐ mbòŋmboŋ, yuu ce àde' m gee ka' koni ryòŋ ce nfesè a kɛ?” 18Jisòs à beesì nè ye enɛ̂, “Wɛ̌ too mɛ̀ enɛ ŋwɛ̌ mbòŋmboŋ njokɛ? Ŋwɛ̀ mò' yu ŋwɛ̌ mbòŋmboŋ ka', ŋwɛ̌ mbòŋmboŋ ku ba Nyʉ̀ cà'cà'. 19To à ku riŋ mncir ce vi làa enɛ̂, ‘Fa yʉ ka', fa koo ŋgwa ŋwɛ̀ kɛ̀ nòŋ wèe nduu ŋwɛ̀ ka', fa yɛ̀ɛ ka', fa tɛɛ njìnsa' mnàŋ ka', fa fìp ŋwɛ̀ ka', yu'ni nè yò ta ba yò mâ.” ’ 20Ŋwɛ̀ anà à beesì nè ye enɛ̂, “Ŋwɛ̀ ryɛ'nì, mɛ̀ lɛ̀ mncir ca wɛɛwɛ kɛ̌' à nfè' ce mɛ̀ m ba muu ŋkɛ'.” 21Jisòs à fyɛ' ye, a koŋ ye. A laa nè ye enɛ̂, “Yuu mo' yi bɛti ce à tʉr à rgèe. Dù fyeni yò buu wɛɛwɛ, lor mbàa efa gho gapshi nè ŋgǎa fùp, tɛ à bo tʉr bkù' mbe bùu. Wɛ gèe wa' wɛɛ, à vʉ fa mɛ̌ mbùu.” 22Ŋwɛ̀ ca à ka' yu' yuu ce Jisòs à làa, a sɛ sê, a kar bsii a dû, njobè' e m tʉr ku' buu sê.

23Jisòs à fyɛ' ŋgòŋ, a laa nè ŋgǎa yɛ'ni yì buu enɛ̂, “Yi yu tatap se nè ŋgǎa mbàa à rniŋ mbe dǐ' kʉʉ Nyʉ̀.” 24Ŋgǎa yɛ'ni yì buu a bɛɛŋgèr. E ker laa nè wowèe enɛ̂, “Boo wâ, yi yu tatap se à rniŋ mbe dǐ' kʉʉ Nyʉ̀. 25Yi yu àtɛ̀r nè kàmɛ̂l à rtose nje rlir nsàrà' caa nè ŋwɛ̀ mbàa à rniŋ mbe dǐ' kʉʉ Nyʉ̀.” 26E ka' làa wa'a, wowèe a bɛɛŋgèr sê, a laa fa wǎp mʉ enɛ̂, “Banɛ ŋwɛ̀ ce àde' e luŋ yu ba nda?” 27Jisòs à fyɛ' wowèe, a laa enɛ̂, “Buu ca vi yu btatap se nè ŋwɛ̀, ke' ba nè Nyʉ̀ ka', njobè' buu wɛɛwɛ vi yu àtɛ̀r nè Nyʉ̀.”

28Pità à laa nè Jisòs enɛ̂, “Yɛ̂, wèr à mà'shi yèr buu wɛɛwɛ, a vʉ fa wɛ̌ mbùu.” 29Jisòs à beesì nè ye enɛ̂, “M suŋ wèe nè mini-ŋwɛ̀ mɛnɛ, ŋwɛ̀ ce e ka' ma'shi yì ndap, kɛ̀ bfʉr vi, kɛ̀ bjar vi, kɛ̀ yì tâ, kɛ̀ yì mâ, kɛ̀ boo vi, kɛ̀ vi mŋkʉ̀, àtu mɛ̀, ker ba njobè' Nsuŋ Mbòŋmboŋ, 30e be koni buu à nfè' e sè'ni càa àmbò e m tʉr nà kàŋ rjèe. E be koni mndap, bfʉr, bjàr, mma, boo, ba mŋkʉ̀. Geewa'a bèe a be kù ce fa ye ŋgɛ'. E ba mbe nfè' ce e be kè vʉ̀, e koni ryòŋ ce nfesè. 31Bèe magòr ce a yu entombì sè'ni na, a be kè ba elʉ̀simbùu, tɛ bèe magòr ce a yu lʉ̀simbùu sè'ni na, a ba entombì.”

32Wowèe a m ce dù à rla' Jɛ̀rusalɛ̀m. Jisòs à ce dù kùntombì nè wowèe. Ŋgǎa yɛ'ni yì buu a ce bɛ̀ɛŋger. Bèe ce a m ce jɛ̀r mbe wǎp njì a ce wɛp. Jisòs à ker fʉr yì bèe ce ncòp-baa-à-rrʉ̀ʉ embe mʉ̀ bèe, a kɛ' a ce suŋ wowèe buu ce vi be koni ye. 33E m làa nè wowèe enɛ̂, “Sèe ce dù wa'a tɛ a du fa Muu Ŋwɛ̀ mbà mmbo běe bgòrgòr efa mʉ ŋgǎa taŋshi taŋshì ba ŋgǎa ryɛ'ni mncir. Wowèe a be sa' ye, teni enɛ a yʉ ye, kèr lòr ye fa mbe mmbo bèe enje jɛɛ. 34Wowèe a be coosi ye, ce ye nè mce, lìp ye nè byɛɛnsò, yʉ ye. Mnòŋ vi ba btaar e fʉʉ efa rkwe.”

35Jɛms ba Jǒn ce boo Sɛbɛ̀di a vʉ a laa nè Jisòs enɛ̂, “Ŋwɛ̀ Ryɛ'nì, wèr ce kòŋ wernɛ à gee yuu mo' nè wèr.” 36E beesì nè wowèe enɛ̂, “Wěe kòŋ enɛ m gee mɛkɛ nè wèe?” 37Wowèe a làa nè ye enɛ̂, “Wer ce kòŋ wernɛ e ba à nfè' ce à cu mbe wɛ̌ kàbàrà' nà, tɛ wèr cute àgee wɛ̀, mò' cu a yo bo mà', tɛ mò' cu à yo bo ŋkòp.” 38Jisòs à beesì nè wowèe enɛ̂, “Wèe yi yuu ce wèe ce bipshi ka'. Àde' wèe no enjep ndoŋ ce m be no enjo a? Kɛ̀ àde' wèe koo njɛ̀ɛ bàptir ce m be koo a?” 39Wowèe a beesì nè ye enɛ̂, “Àde' wèr no.” E laa nè wowèe enɛ̂, “Wèe be no enjep ndoŋ ce m be no enjo, koo njɛ̀ɛ bàptir ce m be koo. 40Ka' yi yu wa'a, mɛ̀ tʉr ŋger à rlàa enɛ ŋwɛ̀ cu a mɛ̌ bo mà' kɛ̀ a mɛ̌ bo ŋkòp ka'. Bdì' anà vi yu ba nè bèe ce Nyʉ̀ à kupshi a lɛ nè wowèe.”

41Bɛr yì bèe ce rʉʉ a ka' yu' yuu ce Jɛms ba Jǒn a m làa na, nyor à bep wowèe sê. 42Jisòs à kɛ'shì wowèe àbee, a laa nè wowèe wɛɛwɛ enɛ̂, “Wèe yi weenɛ ŋgǎa rsa' bèe enje jɛɛ a ke sa' yap bèe nè ŋger-ŋwɛ̀ sê. Běe bgòrgòr mo' a lòr yap ŋger nyʉ' bèe agho foŋ. 43Njɛ̀ɛ ŋgèe ca yi fa kè ba fa wěe mʉ ka'. Yi yu ba enɛ ŋwɛ̀ efa wěe mʉ ce e ka' kòŋ à rba ŋwɛ̌ ŋgòr, banɛ ŋgàŋ ba ŋwɛ̀ rfà' nè wèe, 44tɛ ŋwɛ̀ ce e kòŋ à rba entombì ba ŋkwàa nè bèe wɛɛwɛ. 45Njobè' Muu Ŋwɛ̀ ye ye à m vʉ̀ enɛ bèe a bo ce fà' nè ye ka', e m vʉ̀ tɛ e bo fà', kèr fa li ryòŋ, tee bèe magòr efa rkwe.”

46Wowèe a m vʉ̀ ba' à rla' Jɛ̀rikù. E ka' ce lǒ àfo a ŋgǎa yɛ'ni yì buu ker ba ku' bèe mo', nfèp mò' à cu àwǎa nduunjì, a ce loo buu. A m too nfèp ca enɛ Bàtimòs ce muu Timòs. 47E ka' yu' enɛ a Jisǒs à rla' Nasarɛ̀t, e kɛ' a ce làa mbekì enɛ̂, “Jisòs, Muu Dɛvìd, koosimnse nè mɛ̀.” 48Bèe magòr a m lapni ye enɛ e cu nyaŋ. E ker misi a waa sè'ni magòr sê, a laa enɛ̂, “Muu Dɛvìd, koosimnse nè mɛ̀.” 49Jisòs à tɛɛ, a laa enɛ̂, “Kɛ' nè ye.” Wowèe a laa nè nfèp anà enɛ̂, “Kur ntee, nati mbekì, e ce kɛ' wɛ̀.” 50E ma' yi cɛ̀' njep nshè, a nyɛɛ mbekì, a du a yɛ Jisòs. 51Jisòs à bipshì nè ye enɛ̂, “À ce kòŋ enɛ m gee ba kɛ nè wɛ̀?” Nfèp anà à bèesi nè ye enɛ̂, “Ŋwɛ̀ ryɛ'nì, gèe tɛ m ker yɛ buu.” 52Jisòs à laa nè ye enɛ̂, “Dù, lo rbyemì li gee wɛ̀ ke'sè.” E ku kɛ' a ce yɛ buu, a nati a du a yě mbùu.

Currently Selected:

Ñwaè' Maêk 10: LNT

Highlight

Copy