Ñwaè' Matïìyoè 23

1Jisòs à laa nè bèe ker ba ŋgǎa yɛ'ni yì buu enɛ̂, 2“Ŋgǎa ryɛ'ni mncir ba bèe Farìsi a cu mbe nta' Musìs. 3Banɛ wèe yu'ni nè wowèe, gee yuu ce wowèe a ce suŋ wèe. Wèe fa gèe yuu ce wowèe a ce gèe ka' njobè' wowèe a ke gèe yuu ce wowèe a ke fè'shi ka'. 4Wowèe a ke kur mntɛ̀r ce vi ce rìr sê, lɛ mbe mkɛ̌ɛmbɛ̀' bèe, ke' koŋ à rnàa ntubo jà' wowèe àgho ka'. 5Buu wɛɛwɛ ce wowèe a ce gèe, a ce gèe ba enɛ bèe a bo yɛ wowèe. Wowèe a lò tar bbàa guru wap ce a ke lɛ̀ Blǎa Nyʉ̀ njo, cʉʉ nje tù, vi bɛrŋgèr sê, gee mcʉ̀ŋcʉŋ efa wap bcɛ̀' vi sapŋgèr sê. 6Wowèe a kòŋ à rcu à mnta' běe bgòrgòr à mŋkà', a koŋ à rcu à mnta' bbòŋboŋ à mndap mloo. 7Wowèe a kòŋ enɛ bèe a ca'ni wowèe à mntaa, a ker koŋ foŋ enɛ bèe a too wowèe enɛ Rabài. 8Wèe fa mà'shi tɛ bèe a too wèe enɛ Rabài ka', njobè' wèe tʉr ŋwɛ̀ ryɛ'nì mò'sir cà'cà'. Wèe yu ba bfʉr. 9Wèe fa too ŋwɛ̀ mò' enjep ŋgòŋ na enɛ Tàr ka', njobè' wèe ku tʉr Tàr mò'sir cà'cà', e ba mbe bùu. 10Wèe fa mà'shi tɛ ŋwɛ̀ mò' too wèe enɛ ŋwɛ̀ ryɛ'nì ka', njobè' wèe ku tʉr ŋwɛ̀ ryɛ'nì mò'sir cà'cà', ce yu Krǎis anà. 11Ŋwɛ̌ ŋgòr se efa wěe mʉ be ba ba ŋwɛ̀ rfà' nè wèe. 12Ŋwɛ̀ ce e ka' naa yì nyor mbekì banɛ a be sùusi ŋgàŋ njep nshè. Ŋwɛ̀ ce e ka' suusi yì nyor njep nshè banɛ a be nàa ye mbekì.

13“Ndòo à co' wèe ce ŋgǎa ryɛ'ni mncir ba bèe Farìsî. Wèe yu ŋgǎa bo' wee btu njobè' wèe à cete ncʉ̀ʉndʉ̀' ce yi ce dù mbe dǐ' kʉʉ Nyʉ̀ à bsii bèe. Wèe ce dù mbo ka', a ma'shi enɛ bèe ce a ce ghèter à rdù mbo nà a du ka'. 14Ndòo à co' wèe ce ŋgǎa ryɛ'ni mncir ba bèe Farìsî, wèe yu ŋgǎa mbo'ni. Wee ke bo' byepkʉʉ, ye yàp buu wɛɛwɛ. Wee ke gèe mloo msàsap à rdùŋshi nè bèe enɛ wèe rìŋ à rloo sê. Banɛ yè ŋgɛ' be kèe ba gòr sê. 15Ndòo à co' wèe ce ŋgǎa ryɛ'ni mncir ba bèe Farìsî. Wèe yu ŋgǎa mbo'ni njobè' wèe ce jɛ̀r à mŋgòŋ a ce jɛ̀r à bkeŋ tɛ wèe bo gèe ka' ŋwɛ̀ mò'sir ɛ̀, kupse byemi nè Nyʉ̀. E ce kupse, wèe gee ye e misì bep caa wèe ŋkàrà' baa. 16Ndòo à co' wèe ce mnfèp ce wèe ce dùŋshi bèe nduunjì. Wèe ce làa weenɛ ŋwɛ̀ à ka' ye lè', kaa à rlii Ndap Nyʉ̀, yì anà ba yuu ka'; ŋwɛ̀ à ka' ye lè', kaa ba à rlii buu embe Ndàp Nyʉ̀ ce a gèe nè njɛ̀ɛ bco' mo' ce a too enɛ gûl, banɛ lè' anà yi kur ŋgàŋ. 17Wèe ce wèe yu blʉr, a ba mnfèp, yuu ce yi yu gòr yu ba yǐ fɛ? Yu ba buu embe Ndàp Nyʉ̀ ce a gèe nè gul kɛ̀ yu ba Ndap Nyʉ̀ ce e gèe buu ca à ba buu Nyʉ̀? 18Wèe ce làa foŋ enɛ ŋwɛ̀ à ka' ye lè', kaa à rlii dǐ' ntòo rfa, yì anà ba yuu ka'; ŋwɛ̀ à ka' ye lè', kaa ba à rlii rfa embe dǐ' ntòo rfa, lè' anà yi kur ye. 19Wèe yu mnfèp ghup. Yuu ce yi yu gòr yu ba yǐ fɛ? Yu ba rfa kɛ̀ yu ba dǐ' ntòo rfa ce yi gèe rfa li ba yuu Nyʉ̀? 20Banɛ ŋwɛ̀ ce e ka' ye lè', kaa à rlii dǐ' ntòo rfa banɛ e kàa à rlii dǐ' ntòo rfa ba à rlii buu embo. 21Ŋwɛ̀ à ka' ye lè', kaa à rlii Ndap Nyʉ̀, banɛ e kàa à rlii Ndap Nyʉ̀ ba à rlii ŋwɛ̀ ce e ce cu mbo. 22Ŋwɛ̀ ce e ka' ye lè', kaa à rlii rbuu, banɛ e kaa à rlii kàbàrà' Nyʉ̀, ba à rlii ŋwɛ̀ ce e cu mbo. 23Ndòo à co' wèe ce ŋgǎa ryɛ'ni mncir, ba bèe Farìsî. Wèe yu ŋgǎa mbo'ni. Wee ke fa ŋgʉ̀' mò'sir efa rrʉʉ efa mʉ buu jɛɛ jɛ̀ɛ jɛɛ ce a ke lɛ̀ njep njàp. Ka' yi yu wa'a, wèe à lòr buu mncir Nyʉ̀ ce vi yu tatap a caa rfa anà àtɛ̀r. Buu anà yu à rgèe ŋgěe mini, ba ŋkoosimnse ker ba à rba mini à buu. Wèe à ba gèe buu ca kèr gèe mmo' ca foŋ. 24Wěe mnfèp ce a ce dùŋshi bèe nduunjì! Wee ke kàr buu wɛɛwɛ ce wee ke no, fà dì' wèe no mʉ yuu tèe njo ka', ce mì jù'. 25Ndòo à co' wèe ce ŋgǎa ryɛ'ni mncir, ba bèe Farìsî. Wèe yu ŋgǎa mbo'ni njobè' wěe ke sù'si ndoŋ ba kaŋ embe ndù, geewa'a, a fyɛ' njep mʉ vi ruu nè buu ce wèe à koo ese bèe à ŋger, ker ba buu ce wèe ku ce gèe ba àmbò wèe à gwɛɛ. 26Wěe bèe Farìsi ce wèe à fèp, sù'si ndoŋ ba enjep mʉ entòmbì tɛ e bo ba nrara embe ndù. 27Ndòo à co' wèe ce ŋgǎa ryɛ'ni mncir, ba bèe Farìsî. Wèe yu ŋgǎa mbo'ni njobè' wèe yu àmbò mshè ce a boo a yo' mi ce kè' mmbòŋmboŋ enjep mbè, wɛ fyɛ' njep mʉ, mi ruu nè bvʉp bèe ce a kweŋger, ba buu ce vi yu bjàpri. 28A mbò wèe ku ba wa' foŋ. Bèe a yɛ wèe efa mmìr, wèe yɛɛtì à běe byɛɛnì, a fyɛ' enjep mʉ, wèe ba ŋgǎa mbo'ni, a ba ŋgǎa bsàrbuu. 29Ndòo à co' wèe ce ŋgǎa ryɛ'ni mncir, ba bèe Farìsî. Wèe yu ŋgǎa mbo'ni njobè' wèe à boo mshě mmbòŋmboŋ nè ŋgǎa ncep ntuu Nyʉ̀, ba bèe ce a m ce cu rcu yɛɛnì, a kupshi mi, mi ba yɛɛnì. 30A laa weenɛ̂, ‘Wèr à m ba ba à ŋgòŋ à nfè' ce wêr bta a m ba nà, wèr à m ba cʉ' mmbo wèr wowèe, yʉshi ŋgǎa ncep ntuu Nyʉ̀ ka'.’ 31Banɛ wèe ce làa weenɛ wèe yu boo bèe ce a m yʉshi ŋgǎa ncep ntuu Nyʉ̀. 32Gèe nè yuu ce wêe bta a m kɛ̀' a ce gèe nà, misi yi. 33Wèe ce wèe yu àmbò mnyo, a ba boo bfî, wèe be gèe weekɛ ka' caŋ ŋgɛ' mor? 34Banɛ m ce tuu ŋgǎa ncep ntuu Nyʉ̀ nè wèe, ba ŋgǎa bfee, ba ŋgǎa ryɛ'ni mncir, tɛ wèe yʉshi bèe mo' efa wowèe, taa bèe mo' mbe kìntaa, lìp bèe mo' efa wowèe à wee mndap mloo, fa wowèe ŋgɛ' à mla' jɛɛ jɛ̀ɛ jɛɛ, 35tɛ wèe yɛ ŋgɛ' njo' bèe ce a yʉshi à cicì njep ŋgòŋ na, kɛ' embe nfè' ce a m yʉ Ɛbɛ̀l ce e m gèe fàa ka' nà, du ba' à nfè' ce wèe à m yʉ Sàkàriyà muu Bàràkuyà mbetar dǐ' rara ba dǐ' ntòo rfa embe Ndàp Nyʉ̀ nà. 36M ce suŋ wèe nè mini-ŋwɛ̀ enɛ ŋgɛ' be koni ŋgʉ̀ bèe ce e sè'ni na njo' buu ca.

37“Jɛ̀rusalɛ̀m, Jɛ̀rusalɛ̀m, wee ke yʉshi ŋgǎa ncep ntuu Nyʉ̀, a ce tʉʉshi bèe ce a tuu enɛ a vʉ yɛ wèe nè blùr, yu nfè' sɛ' ce mɛ̀ kòŋ à rbaashi boo wee àmbò maŋgʉp e ke ku'ri boo nà, wèe à koŋ ka'. 38Yɛ̂, a mà' yè Ndap Nyʉ̀ e tɛɛ mbòmmbo. 39M ce suŋ wèe mɛnɛ wèe be kèr yɛ mɛ̀ ka', caar tɛ nfè' ghɛɛ ce wèe be làa enɛ̂, ‘Nyʉ̀ ghoni ŋwɛ̀ ce e vʉ̀ à rlii Tata Nyʉ̀.” ’

Currently Selected:

Ñwaè' Matïìyoè 23: LNT

Highlight

Copy