Ñwaè' Luêk 15

1Ŋgǎa ŋkùu mbǎa bàrà' ba ŋgǎa ŋgèe buu bbebep a m ce vʉ̀ àtʉtʉ nè Jisòs à ryu' buu ce e m ce yɛ'ni. 2Bèe Farìsi ba ŋgǎa ryɛ'ni mncir a kɛ' a ce de'ŋger a ce làa enɛ̂, “Ŋgǎa ŋgèe buu bbebep a vʉ̀, ŋwɛ̀ ca à konì wowèe, a ce yeŋger a wowèe.”

3A ka' làa wa'a, Jisòs à ma' ŋgàa nè wowèe enɛ̂, 4“Ŋwɛ̀ efa wěe mʉ ce e ka' tʉr njèe rjèe, mò' efa gho bʉ, e ke' ma'shì njèe yǐ ncòp-bʉ̀'ʉ-à-mmbʉ̀'ʉ à rtùu dù ròo yì ce e bʉ nà, caar yɛ ka', a nda? 5E ka' yɛ, banɛ e be lu'shi sê, koo, byɛ̀' mbe ntùumbɛ̀' kʉti àgho. 6E dù ba' àgho à là' banɛ e be kɛ' bkar vi, ba bèe ce a wowèe a ce cu mbe dǐ' mo'sir, làa nè wowèe enɛ̂, ‘Sèe lu'shi njobè' mɛ̀ yɛ yà njèe ce e m bʉ nà.’ 7M ce suŋ wèe mɛnɛ rlu'shì li be ba mbe bùu wa'a njo' ŋwɛ̀ mò'sir ce e kupse a ma' yì buu bbebep, caa bèe ncòp-bʉ̀'ʉ-à-mmbʉ̀'ʉ ce a yu yap běe byɛɛnì, mbùu mò' à ker ba àgho nè wowèe à rkupsè ka' nà.

8“Yu ba njɛ̀ɛ njeŋwɛ̀ kɛ ce e ka' tʉr mbàa rʉ̂ʉ, bʉsi mbʉ̀ mbàa, e ke' cʉ' lâm, yɛ̀r yì ndap, tambʉ ròo caar yɛ ka'? 9E ka' yɛ, banɛ e be kɛ' bkar vi, ba bèe ce a wowèe a ce cu mbe dǐ' mo'sir, làa nè wowèe enɛ̂, ‘Sèe lu'shi njobè' mɛ̀ yɛ yà mbʉ̀ mbàa ce e m bʉ nà.’ 10M ce suŋ wèe mɛnɛ bcìndap Nyʉ̀ embe bùu a ke lu'shi wa' foŋ, ka' nè ŋwɛ̌ ŋgèe buu bbebep mò'sir ce e kupse, a ma' yì buu bbebep.”

11E m ker ma' ŋgàa mò' enɛ̂, “Ŋwɛ̀ mò' à m tʉr boo mmbaŋrù a baa. 12Ŋwɛ̌ ŋkɛ' à laa nè yì ta enɛ̂, ‘Yà tâ, gàp bti' fa wa.’ E ka' làa wa'a, e lor yì buu a gap nè wowèe. 13Mʉ mnòŋ vi ka' tuuse, ŋwɛ̌ ŋkɛ' à lor buu wɛɛwɛ ce e m tʉr, a du à to' mo' ce yi m ba ànjìsàp sê, a jarsi buu anà àfo à buu bcicì. 14E ka' jarsi buu anà wɛɛ, njè à koo à to' anà sê, e ke' tʉr yuu ye ka'. 15E du a ce cu a ŋwɛ̀ mǒ' à to' anà, ŋwɛ̀ anà à tuu ye enɛ e du à mŋkʉ̀ du ce nyaŋ yi ŋkǔnyàm. 16E m ce kòŋ à rye ka' byee ŋkǔnyàm, ŋwɛ̀ mò' à ke' fa ye ka'. 17Bfee vi ka' vʉ̀ ye mbo, e laa nè yì nyor enɛ̂, ‘Ŋgǎa mfà' ce yà ta e ke là', ce a ke ye byee vi ce gha' wowèe, a yu bèe a m sɛ', mɛ̀ cu ya mbena ce kwe njè! 18M be nàti dù yɛ yà tâ, làa nè ye enɛ̂, Yà tâ, mɛ̀ gèe yuu bebep nè Nyʉ̀, ba nè wɛ̀ foŋ, 19m ker ghɛɛte ce àde' à too mɛ̀ enɛ muu wò ka', lòr mɛ̀ tɛ m ba ba àmbò yò ŋwɛ̀ rfà' mò'.’ 20E ka' làa nè yì nyor wa' wɛɛ, a nati a du a yɛ yì tâ. A ka' nyɛɛ ànjìsàp, yì ta à yɛ ye, a koosimnse nè ye, a caŋ a baa ye nje nyòr, a nyo'shi ye. 21Muu yì ca à laa nè ye enɛ̂, ‘Yà tâ, mɛ̀ gèe yuu bebep nè Nyʉ̀, ba nè wɛ̀ foŋ. M ker ghɛɛte ce àde' à too mɛ̀ enɛ muu wò ka'.’ 22Tàr à laa nè yi ŋgǎa mfà' enɛ̂, ‘Dù nè cɛrcɛr du lor mŋgàbʉlà vǐ bbòŋboŋ vʉ àgho ma' ye à nyòr, fa ye tee kù ntubo, yarsi ye blaba' à mkùu. 23Wěe mìsi wɛɛ, vʉ nè nà' ce e ruusi, sɛɛ, tɛ sèe ye ce lu'shi, 24njobè' muu wà ca à m kwe a ker kʉti ntèe, e m bʉ, a ker yɛɛti.’ Wowèe a ka' gèe wa' wɛɛ, a kɛ' a ce ye ŋkà'.

25“Muu nlee à m ba yi à mŋkʉ̀ à nfè' anà, a ka' vʉ̀ bà' àtʉtʉ, a yu' àmbò bèe a ce bu' mncùu a ce bii bii. 26E kɛ' ŋwɛ̀ rfà' mò' a bipshi nè ye enɛ a ce gèe ba kɛ lɛ. 27E laa nè ye enɛ̂, ‘Nfʉrò à vʉ̀, yò ta à fyɛ' nà' ce e ruusi, a sɛɛ njobè' e kʉti a ku ba yɛɛnì.’ 28Nyor à bep muu nlee ca, e kanì à rniŋ mbe ndàp. Yì ta à fʉʉ njepmbè a boose ye enɛ e nîŋ. 29E beesì a laa nè yì ta enɛ̂, ‘Yɛ̂, mɛ̀ fà' nè wɛ̀ àmbò ŋkwàa wa'a à bfè' àŋgoo, a be tee-tu nè wɛ̀ ka', koo mʉcàr. Geewa'a, wɛ̀ m be fa mɛ̀ ka' mʉ fǔu mbʉ enɛ m gee ŋkà' àgho nè bkar wa ka'. 30Muu wò ca à koo bti', a ye a bkwàrà wèe, a ker kʉti, wɛ̀ koo nà' ce e ruusi a sɛɛ nè ye.’ 31Tàr à laa nè ye enɛ̂, ‘Muu wà, sò ku cu yi sò àfa à nfè' wɛɛwɛ, buu wɛɛwɛ ce mɛ̀ tʉr, a yò buu. 32Yi yu yɛɛnì enɛ sèe gee ŋkà', lu'shi njobè' nfʉrò ca à m kwe a ker kʉti ntèe, e m bʉ a ker yɛɛti.”’

Currently Selected:

Ñwaè' Luêk 15: LNT

Highlight

Copy