Ñwaè' Luêk 13

1Bèe mo' a m ba àfo à nfè' ce Jisòs à m ce làa nè kʉr bèe anà, a suŋ Jisòs àmbò bèe mǒ' à ŋgǒŋ Galèlê, ce Pailɛ̀t à m yʉshi, wap blɛɛ vi fiŋshì nyor à mʉ̀ blɛɛ mnyàa ce wowèe a m vʉ̀ àgho, a taŋshì taŋshì àgho nè wowèe. 2Jisòs à beesì a laa nè wowèe enɛ̂, “Wà' wèe ce kwà'shi weenɛ bèe à ŋgǒŋ Galèle ca a m yɛ ŋgɛ' ca wa'a yi ba enɛ wowèe a m ba yap ŋgǎa ŋgèe buu bbebep a caa bèe wɛɛwɛ à ŋgǒŋ Galèle a? 3Yi yu wa' ka', m ce suŋ wèe enɛ wèe à ka' tɛ kupse, mà' yè buu bbebep ka', banɛ wèe wɛɛwɛ be kweŋger wa' foŋ. 4Yi yu yi kɛ àmbò bèe ncòp-waami-à-rrʉ̀ʉ ce ma ŋgʉ̀' ndap mò' ce e Silòm à m kɛ̀ɛti a yʉshi nà? Wà' wèe ce kwà'shi enɛ wowèe a m ba yap ŋgǎa ŋgèe buu bbebep a caa bèe wɛɛwɛ à rla' Jɛ̀rusalɛ̀m a? 5Yi yu wa' ka'. M ce suŋ wèe enɛ wèe à ka' tɛ kupse, mà' yè buu bbebep ka', banɛ wèe wɛɛwɛ be kweŋger wa' foŋ.”

6E ma' ŋgàa ca nè wowèe enɛ̂, “Ŋwɛ̀ mò' à m tʉr ce fik mbe yě ŋka'. E m nàti a du a ce fyɛ' enɛ yi yʉ lɛ, a ka' fyɛ', yi yʉ ka'. 7E laa nè ŋwɛ̀ ce e m ce fyɛ' yi ŋka' enɛ̂, ‘Yɛ̂, yu sè'ni bfě' btaar àmbò mɛ̀ vʉ̀ a fyɛ' mbe ce ca a yɛ yi yʉ ka'. Gwàr yi, yi ce bepsi nshe ca à cicì njokɛ.’ 8E beesì a laa nè ye enɛ̂, ‘Masà, mà'shi tɛ yi ku bè tɛɛ à fè' ca, tɛ m tuŋ bgeŋ efa gho, fa bbàr mbʉ àgho. 9Yi ka' yʉ mbàŋ à fè' e kǒo, yi ba yɛɛnì. Yi ka' nè yʉ ka', à gwâr.’ ”

10À m ba nyʉ̀ mmbomntaa Nyʉ̀, Jisòs à ce yɛ'ni mbe ndàp rloo mò'. 11Njeŋwɛ̀ mò' à m ba mbo ce yʉ' mo' yi m ba njep ye a gee ye e yaŋ à bfè' ncòp-waami-à-rrʉ̀ʉ, a gʉ'mi sê, a moo à rnàa nyor mbekì làr. 12Jisòs à ka' yɛ ye, a kɛ' ye a laa nè ye enɛ̂, “Njeŋwɛ̀, wɛ̀ lùŋ efa yo yaŋ.” 13E ka' làa wa'a, a lɛ mi mmbo mbe yě ndù, e ku naa nyor mbekì, a yoŋshi Nyʉ̀. 14Nyor à m bep ŋwɛ̀ ce e m ba ŋwɛ̌ ŋgòr embe ndàp rloo njobè' Jisòs à m gèe njeŋwɛ̀ anà à ke'sè nyʉ̀ mmbomntaa Nyʉ̀, e laa nè bèe enɛ̂, “Mnòŋ nfà' buu vi yu ntuunfu. Banɛ wèe à ba vʉ̀ à mnòŋ anà tɛ a gee tɛ wèe ke'se, ke' ba enɛ wèe vʉ ba nyʉ̀ mmbomntaa Nyʉ̀ ka'.” 15Tata à beesì a laa nè ye enɛ̂, “Wèe ce wèe yu ŋgǎa mbo'ni, wà' ŋwɛ̀ mò' yu fa wěe mʉ ce e ke buu efa rfyɛ̀ɛ yi nà' kɛ̀ yi jàaki' embe ŋka' nyʉ̀ mmbomntaa Nyʉ̀ du àgho à rò à rnosì a? 16Àmbò yi ba ba yɛɛnì enɛ a fyɛ̀ɛshi muu Abràham ca ce Satàn à kur nè yaŋ à bfè' ncòp-waami-à-rrʉ̀ʉ na efa yi yaŋ nyʉ̀ mmbomntaa Nyʉ̀ a?” 17E ka' làa ca, rìtu yi koo bèe wɛɛwɛ ce a m bàa ye, bɛr bèe wɛɛwɛ a yu' rbòŋ à buu bbòŋboŋ wɛɛwɛ ce e m gèe.

18Jisòs à làa nè wowèe enɛ̂, “Kʉʉ Nyʉ̀ yi yu àmbò kɛ? Àde' m be'nì yi à kɛ̌ nà? 19Yi yu àmbò ŋgʉ̀ mostà ce ŋwɛ̀ à m byè mbe yě ŋka', yi lo a ku' a ba à ce, bsiŋ vi ba'rì mndap à mnta' efa gho.”

20E ker laa enɛ̂, “Àde' m be'nì kʉʉ Nyʉ̀ ba à kɛ̌ nà? 21Yi yu àmbò yes ce njeŋwɛ̀ à m lòr a fe' mkʉ̀ŋ brɛ̌d mŋkǎa btaar, a top àgho caar mkʉ̀ŋ anà mi ko'.”

22Jisòs à m ker nati a ce dù à rla' Jɛ̀rusalɛ̀m. A ka' ce dù, a ce jɛr à mla' mŋgòrŋgòr ba à mla' mkɛ'kɛ', a ce yɛ'ni bèe. 23Ŋwɛ̀ mò' à bipshì nè ye enɛ̂, “Tatâ, wà' ku ba ba bèe mʉcàr ce a be kè lùŋ a? E laa nè wowèe enɛ̂, 24Ghèter nè niŋ à ncʉ̀ʉndʉ̀' ce yi yu yi'sè, njobè' m ce suŋ wèe mɛnɛ bèe magòr se a be ghèter à rniŋ, mòo làr. 25Ka' ba à nfè' ce ŋwɛ̀ ndap à nàti mbekì a cete kèŋ, a li', tɛ wèe tɛɛ ba njepmbè ce kùushi kèŋ ce làa weenɛ̂, ‘Tatâ, mʉ̀' kèŋ nè wèr,’ tɛ e beesi yi yu enɛ̂, ‘M rìŋ fàdì' ce wèe ce vʉ̀ ka'.’ 26Tɛ wèe kɛ' ce làa weenɛ̂, ‘To sèe à m ce yeŋger a ker ce noŋger àbee. Wɛ̀ m jɛ̀r à wer btase a ce yɛ'ni bèe.’ 27Wěe làa wa'a, tɛ e beesi enɛ, ‘M rìŋ fàdì' ce wèe ce vʉ̀ ka'. Lò nè efa mɛ̌ geŋ wɛɛwɛ, wèe ŋgǎa ŋgèe buu bbebep.’ 28Mwarsè mi be kè ba, tɛ mkʉrmsòŋ ba à nfè' ce wèe à yɛ Abràham ba Aisìk, ba Jakòp, ker ba ŋgǎa ncep ntuu Nyʉ̀ wɛɛwɛ mbe nto' Nyʉ̀, a fʉr yi wèe embo à ŋger nà. 29Bèe a be kè vʉ̀ ekù mbùuntii ba embà mbùuntii, ker ba ekù tuŋgòŋ ba embà mbùuŋgòŋ wɛɛwɛ cute tɛ a bo ye ŋkà' mbe nto' Nyʉ̀. 30Be kè ba à nfè' anà tɛ bèe mo' ce a yu bèe elʉ̀simbùu sè'ni na, a ba bèe entombì, tɛ bèe mo' ce a yu bèe entombì sè'ni na, a ba bèe elʉ̀simbùu.”

31Bèe Farìsi mo' a ku vʉ à nfè' anà a yɛ Jisòs a laa nè ye enɛ̂, “Lǒ àfa du à dǐ' jɛɛ njobè' ŋkʉʉ Hɛròd ce tà' à ryʉ wɛ̀.” 32E laa nè wowèe enɛ̂, “Dù nè du suŋ kwɛ̀ɛ anà enɛ m be fʉr byʉ' mnyʉ̌mkà' enje bèe, gèe tɛ ŋgǎa byaŋ a ke'se ntìni na ker ba àyàŋsè, tʉ̀' mò' e kèr raa, tɛ m misi la rfà'. 33M be kù ce jɛ̀r ce dù ya yu ntìni na, ba àyàŋsè, ker ba àyàŋsè cà njobè' àde' ŋwɛ̀ ncep ntuu Nyʉ̀ kwe à dì' mo' jɛɛ caa efa à rla' Jɛ̀rusalɛ̀m ka'. 34Jɛ̀rusalɛ̀m, Jɛ̀rusalɛ̀m! Wèe ce wěe ke yʉshi ŋgǎa ncep ntuu Nyʉ̀, ce tʉʉshi bèe ce a tuu enɛ a vʉ yɛ wèe nè blùr. Yu nfè' sɛ' ce mɛ̀ kòŋ à rbaashi boo wee àmbò ma ŋgʉp e ke ku'ri boo nà, wèe à koŋ ka'. 35Yɛ̂, a mà' yè Ndap Nyʉ̀ e tɛɛ mbòmmbo. M ce suŋ wèe mɛnɛ wèe be kèr yɛ mɛ̀ ka', caar tɛ nfè' ghɛɛ ce wèe be làa weenɛ̂, ‘Nyʉ̀ ghòni ŋwɛ̀ ce e vʉ̀ à rlii Tata Nyʉ̀.’ ”

Currently Selected:

Ñwaè' Luêk 13: LNT

Highlight

Copy