Ñwaè' Luêk 10

1Ca yi ka' mì wɛɛ, Tata à ce ŋgǎa yɛ'ni yì buu mò', bèe ncòp-baa-à-msàambâ, a tuu wowèe a baa a baa enɛ a du entombì nè ye, du du à mla' wɛɛwɛ ker ba à bdì' wɛɛwɛ ce e m ba à rdù àfo. 2E m làa nè wowèe enɛ̂, “Buu à bi à mŋkʉ̀ gòr, ŋgǎa rkep a ba mʉcàr. Banɛ wèe loo nè Tàr ce e tʉr ŋkʉ̀ enɛ e tuusi ŋgǎa mfà' tɛ a du kep yì buu efa mŋkʉ̀. 3Dù nè! M ce tuu wèe tɛ wèe du ba àmbò njèe à mʉ̀ bkuura. 4Ŋwɛ̀ fa lòr posà, kɛ̀ bàa, kɛ̀ blaba' ka'. Ŋwɛ̀ fa cà'ni ŋwɛ̀ à nduunjì ka'. 5Wèe à ka' du ba', ndap ce wèe à ka' niŋ mbo, wèe kɛ' laa weenɛ̂, ‘Cumʉnyaŋ ba mbe ndàp na.’ 6Ŋwɛ̀ cumʉnyaŋ à ka' ba mbe ndàp anà banɛ yè cumʉnyaŋ be dù nè ŋgàŋ. Ŋwɛ̀ cumʉnyaŋ à ka' tɛ ba mbo ka', yè cumʉnyaŋ kʉtì nè wèe. 7Kù cu nè ba mbe ndàp anà, ce ye ker ce no njɛ̀ɛ kɛ ce a ka' fa wèe, njobè' yi yu yɛɛnì enɛ a la' ŋwɛ̀ rfà'. Wèe fa lò embe ndàp mò' dù mbe mò' ka'. 8Wèe à ka' du niŋ à rla' mo', kɛ̀ yu mbe lǐ fɛ ɛ̀, běe àfo a ka' koni wèe, wèe ye yuu ce a ka' fa wèe. 9Gèe nè tɛ ŋgǎa byǎŋ àfo a ke'se, laa nè nè bèe wɛɛwɛ enɛ̂, ‘Kʉʉ Nyʉ̀ yi vʉ̀, a ba àtʉtʉ nè wèe.’ 10Wèe à ka' niŋ à rla', kɛ̀ yu ba lǐ fɛ, a ka' tɛ koni wèe ka', wèe du à btase à mʉ̀ mla' anà laa enɛ̂, 11‘Wèr ce kashi nfʉ̀nfʉ ce wèr à koo à mkùu fa wěe là' na, à rdùŋshi enɛ wèe à gèe yuu bebep. Ka' yi yu wa'a, rìŋ nè enɛ kʉʉ Nyʉ̀ yi vʉ̀ àtʉtʉ.’ 12M ce suŋ wèe mɛnɛ be kè ba à nòŋ anà tɛ ŋgɛ' yì běe à rla' Sodòm ba àndèe nè ŋgɛ' yì běe à rla' anà.

13“Ndòo à co' wèe ce wèe yu běe à rla' Kòrasìn, ndòo à co' wèe ce wèe yu běe à rla' Bɛ̀rsaidà njobè' a m ba gee buu bghagha' ce a m gèe fa wěe mʉ nà ba à rla' Tayà, ker ba à rla' Sidòn běe àfo a m ba nè kupse e sese', a ma' bcɛ̀' njì rkwe, a yo' bʉ à nyòr, a cute àgho. 14Geewa'a, be kè ba à nòŋ mnsa' tɛ ŋgɛ' běe à rla' Tayà ba à rlà' Sidòn ba àndèe nè yè. 15À ka' ba yi àmbò wèe ce wèe yu běe à rla' Kàpanùm, wà' a be ko'si wèe mbe bùu a? Yi yu wa' ka'. A be dù nè wèe ba mbà yir. 16Ŋwɛ̀ ce e ka' yu' yuu ce wèe ce làa banɛ ŋwɛ̀ anà à yu' ya nlàa. Ŋwɛ̀ ce e ka' kani banɛ ŋgàŋ à kani ya nlàa. Ŋwɛ̀ ce e ka' kani ya nlàa banɛ ŋgàŋ à kani nlàa ŋwɛ̀ ce e m tuu mɛ̀.”

17Bèe ncòp-baa-à-msàamba cà a du a kʉti nè rlu'shì-ŋwɛ̀ a laa enɛ̂, “Tatâ, mnyʉ̌mkà' foŋ a yu'ni nè wèr njo' lo rlii.” 18Jisòs à laa nè wowèe enɛ̂, “Mɛ̀ mʉ yɛ àmbò Satàn à gwè embe bùu àmbò mbèŋ à bàp wa'a. 19Yɛ̂, mɛ̀ fa wèe ŋger à rnyɛ̀ŋshi mnyo ba mnyobsaa, a fa wèe ŋger mbendù ŋwɛ̀ bbàa. Àde' yuu mo' yi joo wèe ka'. 20Ka' yi yu wa'a, wèe fa ce lu'shi enɛ mnyʉ̌mkà' vi yu'ni nè wèe ka', wèe lu'shi ba njobè' a saŋ me mlii mbe bùu.”

21À m ba à nfè' anà Yʉ' Rara yi gee Jisòs à ce lu'shi sê, a laa enɛ̂, “Tàr, Tata ce e tʉr rbuu ba nshe, m ce yòŋshi wɛ̀ njobè' wɛ̀ sʉ̀ti buu ca ese ŋgǎa bfee, ba bèe ce a rìŋ buu, a duŋshi vi ba nè boo bkɛ'. Ɛ̀no Tàr, ca yu ba yuu ce wɛ̀ m ce yu' rbòŋ à rgèe.”

22“Yà ta à fa buu wɛɛwɛ mba mɛ̌ mmbò. Ŋwɛ̀ mò' rìŋ ŋwɛ̀ ce muu yu caa efa Tàr ka'. Ŋwɛ̀ mò' rìŋ ŋwɛ̀ ce Tàr yu caa efa muu ker ba bèe ce muu à kòŋ à rdùŋshi ye nè wowèe ka'.” 23E ka' làa wa'a, a karsi nyor a laa ca ba nè ŋgǎa yɛ'ni yì buu cà'cà'. E m làa nè wowèe à bsʉ̀ti enɛ̂, “Mbǒŋtu mi yu nè bèe ce a ce yɛ buu ce wèe ce yɛ na. 24M ce suŋ wèe mɛnɛ ŋgǎa ncep ntuu Nyʉ̀ magòr ba bkʉʉ magòr a m ce kòŋ à ryɛ buu ce wèe ce yɛ na, a yɛ ka', a koŋ à ryu' buu ce wèe ce yu' na, a yu' ka'.”

25Ŋwɛ̀ ryɛ'ni mncir mò' à nàti mbekì à rmòoshi Jisòs, a bipshi enɛ̂, “Ŋwɛ̀ ryɛ'nì, yuu ce àde' m gee ka' koni ryòŋ ce nfesè a kɛ?” 26Jisòs à beesì enɛ̂, “A saŋ mbe ŋwǎ' mncir enɛ kɛ? Wɛ ke bè' mbo enɛ kɛ?” 27Ŋwɛ̀ anà à beesì a laa enɛ̂, “Kòŋ Tata ce e yu yò Nyʉ̀ nè yo ntee-ŋwɛ̀, ba nè lo ryòŋ-ŋwɛ̀, ba nè yo ŋger wɛɛwɛ, ba nè wo bfee wɛɛwɛ, ker koŋ nfʉrò àmbò wɛ̀ kòŋ yò nyor.” 28Jisòs à laa nè ye enɛ̂, “Wɛ̀ bèesi yɛɛnì. Gèe wa'a tɛ à bo cu nfesè.” 29Ŋwɛ̀ anà a m ce kòŋ enɛ tɛ bèe a riŋ enɛ yuu ce e bipshi anà yi yu yɛɛnì, a bipshi nè Jisòs enɛ̂, “Nfʉrà yu ba nda sê?” 30Jisòs à beesì enɛ̂, “Ŋwɛ̀ mò' à m lǒ à rla' Jɛ̀rusalɛ̀m a ce dù à rla' Jɛ̀rikù, a ka' bà' à nduunjì, a gwe mbe mmbo ŋgǎa byɛ̀ɛ. Ŋgǎa byɛ̀ɛ anà a fapshì buu ese ye wɛɛwɛ, a lip ye, a caŋse a duse, e noŋ mbo a ba yǐ ŋkwe. 31Ŋwɛ̀ taŋshi taŋshì mò' à lo a ce sùu njep nduunjì anà à nfè' anà foŋ, a ka' yɛ ye, a lɛ' yi yu a caa a dû. 32Ŋwɛ̀ mò' embe ntɛ̀' Lɛvì ye ye à ka' vʉ̀ bà' mbo yɛ ye, a lɛ' a caa a dû. 33Ŋwɛ̌ à ŋgǒŋ Sàmarìyà ce e m ce dù à mbèp anà foŋ à vʉ a bʉʉ a yě ndù, a ka' yɛ àmbò e nòŋ, nse yi koo ye. 34E du a su'si vi mnfur nè mrù', a fa mcɛ̀p mbo, a kur. A ka' kur, a ko'si ye mbe yì jàaki', a lor a du àgho mbe hòtɛ̂l, a ke'ni ye. 35Tʉ̀' à ka' raa, e fʉr mbàa baa, a fa nè ŋwɛ̀ ce e m ce fà' mbo, a laa nè ye enɛ̂, ‘Kè'ni ye bòŋboŋ, ka' ba enɛ mbàa ca yi sɛ̀, wɛ̀ kyesè mbàa mo', banɛ m be kʉti tɛ m kʉʉsi yi nè wɛ̀.’ 36Banɛ ŋwɛ̀ efa bèe a mntaar ca ce à ce kwà'shi enɛ e m ba nfʉr nè ŋwɛ̀ ce e m gwè mbe mmbo byɛ̀ɛ nà à m ba nda?” 37Ŋwɛ̀ ryɛ'ni mncir ca à beesì enɛ̂, “Yu ŋwɛ̀ ce e m koosimnse nè ye nà.” Jisòs à laa nè ye enɛ̂, “Dù gee wa' foŋ.”

38Jisòs ba yi ŋgǎa yɛ'ni yì buu a ka' nàti ce dù, e du a ba' à rla' mo', njeŋwɛ̀ mò' ce a m ce too enɛ Maatà à konì ye, a niŋ a ye mbe ndàp. 39E m tʉr nfʉr yì mò' a ce too enɛ Mɛ̀ɛri. Mɛ̀ɛri ca à cu njeptii Tata Jisòs a ce yu'shi buu ce e m ce làa. 40Maatà à m lɛ̀ ntee ba à rfɛ̀r byee. E vʉ a laa nè Jisòs enɛ̂, “Tatâ, nfʉrà à mà'shi mfà' wɛɛwɛ ba mbe mɛ̌ mmbò, wɛ̀ ke' ce lòr à yuu ka' a? Làa nè ye enɛ e vʉ ja' mɛ̀.” 41Tata à beesì a laa nè ye enɛ̂, “Maatà, Maatà, mlù mi ce koo wɛ̀ à buu magòr, 42geewa'a, yuu mo' yi yu ce ŋwɛ̀ à ba tʉr. Mɛ̀ɛri à ce yuu bòŋboŋ ce a be kèr koo ese ye ka'.”

Currently Selected:

Ñwaè' Luêk 10: LNT

Highlight

Copy