Ñwaè' Joân 14

1“Wèe fa mà'shi tɛ wee mntee vi ce fa wèe ŋgɛ' ka', wèe byemi nè Nyʉ̀, ker byemi nè mɛ̀ foŋ. 2Bdì' vi yu mbe ndàp yà Ta gòr sê. Yi ka' tɛ bà ba wa' ka', mɛ̀ m ba suŋ wèe. M ce dù à rkupshi dì' nè wèe. 3M ka' du kupshi dì' nè wèe, m kʉtì vʉ lor wèe tɛ sèe dû, tɛ wèe bo ba foŋ fàdì' ce m yu. 4Wèe rìŋ nduunjǐ fàdì' ce m ce dù anà.”

5Tomas à laa nè ye enɛ̂, “Tatâ, wèr rìŋ fàdì' ce à ce dù ka', banɛ àde' wèr riŋ nduunjì anà à njɛ̌ɛ kɛ?” 6Jisòs à beesì enɛ̂, “A mɛ̀ nduunjì, a mɛ̀ mini, a mɛ̀ ryòŋ. Àde' ŋwɛ̀ mò' du yɛ yà Tâ, ce e buu efa rcàa njì enjep mɛ̀ ka'. 7Wèe à ba riŋ mɛ̀, wèe à ba rìŋ yà Ta foŋ. Kɛ' e sè'ni na, wèe à rìŋ ye, a ker yɛ ye foŋ.” 8Felep à laa nè ye enɛ̂, “Tatâ, dùŋshi wèr yò Ta tɛ yi bo ghɛɛte wèr.” 9Jisòs à laa nè ye enɛ̂, “Felêp, sèe à cu tètè wa'a, wɛ̀ ke' riŋ mɛ̀ ka' lɛ? Ŋwɛ̀ ce e ka' yɛ mɛ̀, banɛ e yɛ yà Tâ. Wɛ̀ ka' ker ce làa enɛ m duŋshi wɛ̀ yà Ta njokɛ? 10Wɛ̀ byemi enɛ m yu njep yà Tâ, yà Ta à ba njep mɛ̀ a? Blàa ce m ce làa nè wèe na, m ce làa ba à ŋger ya ka'. Yà Ta ce e yu njep mɛ̀ a ŋwɛ̀ ce e ce gèe li rfà'. 11Byemi nè yuu ce mɛ̀ suŋ wèe enɛ m yu njep yà Tâ, yà Ta à ba njep mɛ̀ nà. Wèe à ka' tɛ byemi njo' blàa ca ka', wèe à ba byemi njobè' mfà' ce mɛ̀ gèe na.

12“M ce suŋ wèe nè mini-ŋwɛ̀ enɛ ŋwɛ̀ ce e ka' byemi nè mɛ̀, banɛ e be gèe buu ce m ce gèe, kèr gèe buu ce vi càa vi ce m ce gèe njobè' m ce dù à rcu wèr Tàr. 13Wèe à ka' loo ka' njɛ̀ɛ kɛ à mɛ̌ rlii, m be gèe yuu anà, tɛ bèe a bo kù'si Tàr njo' Muu yì. 14Wèe à ka' loo ka' njɛ̀ɛ kɛ à mɛ̌ rlii, m be gèe yi.

15“Wèe à ka' koŋ mɛ̀, wèe yu' wa blàa. 16M be loo nè Tàr tɛ e tuusi wèe Ŋwɛ̀ Rjà' mò' tɛ e bo cu wèe wowèe nfesè. 17Ŋwɛ̀ Rjà' ca yu Yʉ' ce yi ke suŋ bèe yuu mini. Àde' bèe enjep ŋgòŋ a konì Ŋwɛ̀ Rjà' anà ka', njobè' àde' wowèe a yɛ ye kɛ̀ riŋ ye ka'. Bèe ce a rìŋ ye yu wèe njobè' e be cu wèe wowèe, ba njep wěe mntee. 18M be mà'shi wèe nè ye tu ka'. M be dù kʉti vʉ̀ yɛ wèe. 19Ku bɛti nfè' mʉcàr tɛ bèe enjep ŋgòŋ na a ker yɛ mɛ̀ ka'. Geewa'a, wèe be yɛ mɛ̀. À ka' ba njobè' m cu ntèe, banɛ wèe be cu btèe foŋ. 20Nòŋ anà yi be ghɛɛ tɛ wèe riŋ enɛ m yu njep yà Tâ, wèe à ba njep mɛ̀, mɛ mɛ̀ à ba njep wèe. 21Ŋwɛ̀ ce e ka' yu' wa blàa, lɛ̂, banɛ a ŋwɛ̀ ce e kòŋ mɛ̀. Ŋwɛ̀ à ka' koŋ mɛ̀ banɛ yà Ta be kòŋ ŋgàŋ foŋ. M be kòŋ ŋwɛ̀ anà foŋ, dùŋshi yà nyor nè ye.”

22Judàs ce à m ba Judas Ìskarìyòt ka', à laa nè ye enɛ̂, “Tatâ, à be dùŋshi yò nyor nè wèr tɛ wèr yɛ wɛ̀ tɛ bèe enjep ŋgòŋ a yɛ wɛ̀ ka' à njɛ̌ɛ kɛ?” 23Jisòs à beesì enɛ̂, “Ŋwɛ̀ à ka' koŋ mɛ̀ banɛ ŋgàŋ be yu' wa blàa. Yà Ta be kòŋ ye. Wèr yà Ta be vʉ̀ cu wèr ŋwɛ̀ anà wèe. 24Ŋwɛ̀ ce e kòŋ mɛ̀ ka', a ŋwɛ̀ ce e ce yu' wa blàa ka'. Blàa ce wèe ce yu' na, yu wa ka', yu blàa yà Ta ce e m tuu mɛ̀.

25“M ce suŋ wèe buu ca a ku bii fa wěe mʉ. 26Ŋwɛ̀ Rjà' ce yu Yʉ' Rara ce Tàr be tuu a mɛ̌ rlii, yu ŋwɛ̀ ce e be vʉ̀ yɛ'ni wèe buu wɛɛwɛ, gèe tɛ wèe kuushi buu ce mɛ̀ suŋ wèe wɛɛwɛ.

27“Mɛ̀ lɛ̀ cumʉnyaŋ nè wèe, m ce fa yà cumʉnyaŋ nè wèe. M ce fa ba àmbò bèe enjep ŋgòŋ na a ke fa ka'. Wèe fa mà'shi tɛ wee mntee vi ce fa wèe ŋgɛ' ka'. Wèe fa wɛp buu ka'. 28Wèe à m yu' àmbò mɛ̀ m suŋ wèe mɛnɛ m ce dù kʉti yɛ wèe. Wèe à ba koŋ mɛ̀, wèe à ba lu'shi enɛ m ce dù à ryɛ Tàr, njobè' e kù' a caa mɛ̀. 29Mɛ̀ suŋ wèe buu ca sè'ni tɛ vi ka' koni, vi lò koni nà, tɛ wèe bo byemi nè mɛ̀. 30M be kèr suŋ buu wèe sèe wèe gòr ka' njobè' ŋwɛ̀ ce e ce sa' ŋgòŋ ca ce vʉ̀. E tʉr ŋger mbe mɛ̌ ndù ka'. 31M ku ce gèe ba àmbò Tàr à suŋ mɛ̀ enɛ m gêe, tɛ ŋgòŋ yi bo rìŋ enɛ mɛ̀ kòŋ ye. Nàti nè tɛ sèe du à dǐ' jɛɛ.”

Currently Selected:

Ñwaè' Joân 14: LNT

Highlight

Copy