Ñwaè' Mfaè' Ñgaâa Ntuu Jisoès 27
27
1A ka' sèesi enɛ wèr Pol wèe be niŋ mbe keŋ ŋgòr dù à to' Italè, a lor Pol ba ŋgǎa shaŋ mo' a fa nè tu nè bsoogɛ̀ rjèe efa bkʉr bsoogɛ̀ ŋkwe Rûm. A m ce too ŋwɛ̀ ca enɛ Julìyòs. 2Wèr à m niŋ mbe keŋ ŋgòr ce à m ba yǐ à dì' ce a m ce too enɛ Àdamitùm. Keŋ anà à m tɛɛ à rco'ti dù, ce tɛɛtɛ à mla' mǒ' àwǎa rò à ŋgǒŋ Ɛshà. Wèr à niŋ mbo a ce dù. Àristakòs ce à m ba ŋwɛ̌ à rla' Tɛ̀sàlonikǎ à ŋgǒŋ Mɛ̀sɛ̀donìyà à m ba wèr wowèe. 3Tʉ̀' à ka' raa, wèr à ba' à rla' Sidòn. Julìyòs à gee ŋgěe bòŋboŋ nè Pôl. E m mà'shi ye e du a yɛ bkar vi tɛ wowèe a bo kè' à ye. 4Wèr à lǒ àfo a niŋ mbe keŋ a ce dù, fu' yi ka' ce vʉ̌ à mbèp ce keŋ à m ce dù, wèr à lɛ' à mbèp mǒ' à ŋgǒŋ Saipròs ce fu' yi m ce càa ka'. 5Wèr à ka' tuu rǒ à ŋgǒŋ Sìlesìyà ba à ŋgǒŋ Pàmfilìyà a du a ba' à rla' Mirà à ŋgǒŋ Lishà. 6Wèr à ka' bà' àfo, tu nè bsoogɛ̀ rjèe yi yɛ keŋ yǐ à rla' Àlɛ̀ksandà ce e m ce dù à to' Italè, a fa wèr mbo.
7Wèr à m ce dù mʉwɛ̀ɛ-mʉwɛ̀ɛ, a lor mnòŋ àŋgoo, a yɛ ŋgɛ' sê, a ka' ba' àtʉtʉ rla' Kidòm. Fu' yi m mà'shi enɛ wèr ba' à rla' anà ka', wèr à lɛ' a du à mbèp mǒ' àgee to' Krět ce fu' yi m ce càa ka'. Rla' Sàlmonè li ba yi nje yɛɛ. 8Keŋ à ce dii àwǎa rò, wèr à yɛ ŋgɛ' sê, a ka' ba' à dì' ce a m ce too enɛ Fɛɛ Hɛvɛ̀n àgee rla' Lisìyà.
9Wèr à m càasi nfè' à nduunjì gòr sê. Rjɛ̀r li m ba nè mlù-ŋwɛ̀ sê, njobè' nòŋ ce a ke taŋshi taŋshǐ gòr yi m càa, à m ba à cùu saa. 10Yi ka' ba wa'a, Pol à bɛɛ wowèe a laa enɛ̂, “Bèe câ, mɛ̀ yɛ mɛnɛ lisèe rjɛ̀r ca li be ba yɛɛnì ka'. Sèe ka' lǒ àfa banɛ yìsèe buu be bep, tɛ keŋ bep, tɛ bèe a kweŋger foŋ.” 11Geewa'a, tu nè bsoogɛ̀ rjèe yi m byemi ba yuu ce ŋwɛ̀ ce e m ce dòo keŋ ker ba ŋwɛ̀ ce e m tʉr keŋ anà a m làa. 12Dì' ce wowèe a m vʉ̀ tɛɛ àfo anà à m ba dǐ' bòŋboŋ à rcu à saa ka'. Bèe magòr a fa ntaŋ enɛ a gheter yɛ enɛ a be bà' à rla' Fenìs cu ba àfo lɛ. Fenìs à m ba dì' mǒ' à to' Krět ce bkeŋ vi m ce vʉ̀ ce tɛɛ, ka' ker ce co'ti ce dù. À m ba dì' ce wɛ̀ m ka' ba tɛɛ ce kè' mbà mbùuntii, à ku yɛ rdip à yo bo ŋkòp ba yo bo mà'.
13Mʉ fu' mo' yi ce vʉ̀ embà mbùuŋgòŋ, wowèe a kwa'shì enɛ a koni yuu ce a ce ròo. Wowèe a sʉŋ ma co' ce keŋ à m tɛɛ àgho a lɛ mbe keŋ a co'ti a ce dù àwǎa rǒ à to' Krêt. 14Wowèe a m dù njìsàp ka', ma ntèendʉŋ mò' à sǔu à to' Krêt, à ba yì ce a too enɛ̂, Yǐ à bke'. 15Ntèendʉŋ anà à koo à keŋ, keŋ à moo à rdù làr, wèr à boŋlàr a ma'shî, e lor keŋ a ce dù àgho. 16Wèr à caa a du à ŋgʉ̀' mǒ' à rla' Kàwudà ce fu' yi m ce càa ka', a gheter sê, tɛ keŋ ŋkɛ' ce a m cʉʉ mbà mbùu yǐ ŋgòr anà ka' bep ka'. 17A m sʉ̀ŋ a niŋ àgho mbe mʉ̀ yǐ ŋgòr, a fyɛɛ bkʉ̀ a kur keŋ ŋgòr àgho fà dì' e sa'ŋger ka'. Wowèe a ka' ce wɛp enɛ keŋ be bà' Sitì, niŋ njep mʉ̀ nsaruŋ tɛɛ, wowèe a suusì ma co' ce keŋ à m ce tɛɛ àgho nà njep mʉ̀ rò tɛ keŋ bo tɛɛ, keŋ à ku ce dù nè yi bo. 18Ntèendʉŋ ca à ku ce càa, a ce fa wèr ŋgɛ' sê. Tʉ̀' à ka' raa, wowèe a kɛ' a ce fʉshi buu embe keŋ a ce mà'ri njep rò. 19Mnòŋ vi ka' bǎ' btaar, wowèe a lor buu mfà' embe keŋ nè map mmbo, a ma'ri njep rò. 20Mnòŋ vi m càa àŋgoo sê, wèr à be yɛ rlir nyʉ̀ kɛ̀ mkàŋsì ka', ntèendʉŋ à ku ce càa tatap sê. Wèr à riŋ enɛ àde' wèr luŋ efa gho ka'.
21Bèe ca a ka' cu tètè sê, ye yuu ka', Pol à natì a tɛɛ a wǎp mʉ a laa enɛ̂, “Bèe câ, wèe à mʉ yu' yuu ce mɛ̀ mʉ laa nè wèe à to' Krět nà, cu àfo, yìsèe buu à ba kèr bep, bʉ à cicì ka'. 22M ce làa nè wèe sè'ni na enɛ wèe kur ntee. Mò' efa wèe be kwe ka'. Yuu ce yi be bep, sà'ŋger, ku ba keŋ cà'cà'. 23À ba nètʉ', Nyʉ̀ ce e tʉr mɛ̀, ce mɛ̌ ke loo nè ye, à tuusì yì ncìndap, e vʉ a tɛɛ a mɛ̌ geŋ, 24a laa enɛ̂, ‘Pôl, fa wɛp ka'. À be kù tɛɛ à bsii Sisà. Nyʉ̀ à tʉr wɛ̀ à ntee bòŋboŋ, a ja' myǒŋ bèe ce wèe wowèe yu mbe keŋ na njo' wɛ̀.’ 25Bèe câ, banɛ wèe kur ntee njobè' mɛ̀ byemi mɛnɛ yi be kù ba àmbò Nyʉ̀ à làa nè mɛ̀. 26Geewa'a, keŋ be niŋ nje mʉ̀ nsaruŋ, tàŋte, tɛɛ àwǎa rla' mo'.”
27À ka' ba nètʉ' ce mnòŋ vi bà' war ncòp-kyèe-à-rrʉ̀ʉ, ntèendʉŋ à ku ce dà' nè wèr à rdip ce a m ce too enɛ Ànduyà. À ba àmbò nè ntee tʉ' wa'a, bèe ce a m ce dòo keŋ a yu' enjep blɛɛ enɛ wowèe a ce bà' àwǎa rò. 28Wowèe a lor kʉ̀, a cʉʉ yuu rìr rir à cùu efa gho, a suusi njep rò a yɛ enɛ rcoomì efa rdip anà li yu àmbò mkoo mbaa. A ka' kèr dù mʉ ntàm mò', a ker suusi kʉ̀ anà njo a yɛ enɛ rcoomì efa gho li yu mkoo ncòp-ta-à-rrʉ̀ʉ. 29Wowèe a wɛp enɛ keŋ be kùu nyor à blùr njep mʉ̀ rò, a lor bco' ce keŋ e ke tɛɛ àgho njep mʉ̀ rò nà embà mbùu keŋ vi kyèe, a fa njep rò, a loo enɛ tʉ̀' raa cɛrcɛr. 30Bèe ce a m ce dòo keŋ ca a ghetèr enɛ a ba caŋ fʉʉ embo, a lor keŋ ŋkɛ' a suusi njep rò, a bo'shi enɛ wowèe a ce dù kù cǔu keŋ tɛ a bo kèr fʉr bco' mo' ce keŋ e ke tɛɛ àgho njep rò nà. 31Pol à laa nè tu nè bsoogɛ̀ rjèe ba bsoogɛ̀ enɛ̂, “Bèe ca a ka' tɛ kù cu mbe keŋ na ka', wèe luŋ ka'.” 32Bsoogɛ̀ a ceeshì bkʉ̀ efa keŋ ŋkɛ', e ce dù mbà rò.
33Tʉ̀' à ka' kɛ̀' ce raa, Pol à bu' mmbo nè wowèe wɛɛwɛ enɛ wowèe a ye yuu. E m làa nè wowèe enɛ̂, “Wèe à yɛ mlù, a cu nè njè à mnòŋ ncòp-kyèe-à-rrʉ̀ʉ, a joo yuu kù cùu ka'. 34Banɛ m ce bu' mmbo nè wèe enɛ wèe ye yuu. Wèe à ka' tɛ ye yuu ka', wèe luŋ ka'. Mbʉ̀ nyʉ̀'tu embe tu ŋwɛ̀ mò' efa wěe mʉ be dù à yuu ka'.” 35Pol à ka' làa buu ca nè wowèe mìsi, a lor brɛ̂d, a loo a yoŋshi Nyʉ̀ à wǎp bsii, a bɛ' a kɛ' a ce ye. 36Ca yi m fa wowèe ŋger, wowèe a wasè, a ye yuu. 37Wèr à m ba mbe keŋ anà wɛɛwɛ bèe mjěe mbaa nè ncòp-ntuunfu-à-mnsàambâ. 38Wowèe a ka' ye byee yu' bòŋboŋ, a fʉshi msaŋ ce mi m ba mbe keŋ a ma' njep rò tɛ keŋ bo fɛp.
39Tʉ̀' à ka' raa, wowèe a yɛ nje waa ŋkʉ̀, a riŋ fàdì' ce wowèe a m ba anà ka', a ka' ce fyɛ', a yɛ dì' mo' ce rdip li tuŋ a bɛrsî, nsaruŋ à ba àwǎa rò anà sê. Wowèe a kwa'shi enɛ yi ka' ba àtɛ̀r wowèe a doo keŋ anà du àgho mbe dì' anà, tɛ e bo niŋ njep mʉ̀ nsaruŋ tɛɛ. 40Wowèe a ceeshì bco' ce keŋ e ke tɛɛ àgho njep mʉ̀ rò, vi suu njep rò, a ker ba'shi bkʉ̀ ce a ke kur yuu ce a ke dòo keŋ àgho. Wowèe a ka' gèe wa' mìsi, a naa ma cɛ̌' bɛ̀bɛr ce yi m ba kù cǔu keŋ tɛ fu' yi bo koo njo, dòo keŋ dù àgho. 41Geewa'a, keŋ à niŋ njep mʉ̀ nsaruŋ yì embe dì' ce mdip mi m ce tarte a mmo', a tɛɛ. Cǔu keŋ yi niŋ njep mʉ̀ nsaruŋ anà bòŋboŋ sê, a taŋte njo. Mdip ce mi m ce baŋti ce vʉ̀ nè ŋger-ŋwɛ̀ se nà, mi sa'sì mbùu keŋ. 42Bsoogɛ̀ a fa ntaŋ enɛ a be yʉshi ŋgǎa shaŋ ce a m ba mbe keŋ anà wɛɛwɛ fà dì' mò' efa wowèe bo coo njep rò bu' rdip, fʉʉ nje waa ŋkʉ̀ caŋ ka'. 43Tu nè bsoogɛ̀ rjèe yi m ce kòŋ à rjà' Pol efa rkwe, a kani wowèe efa ryʉshi ŋgǎa shaŋ. E m làa enɛ bèe ce a rìŋ à rbu' rdip a nyɛɛ coo njep rò entombì bu' rdip, du nje waa ŋkʉ̀. 44Yi m ba enɛ bɛr bèe mo' a ba'ni plâŋ, tɛ bɛr mo' a ba'ni bbàbàr keŋ ce e m sà'ŋger nà. A m gèe wa'a, wèr wowèe wɛɛwɛ à du a ba' nje waa ŋkʉ̀, yuu mo' yi joo ŋwɛ̀ mò' ka'.
Currently Selected:
Ñwaè' Mfaè' Ñgaâa Ntuu Jisoès 27: LNT
Highlight
Share
Copy

Want to have your highlights saved across all your devices? Sign up or sign in
Limbum New Testament © Bible Society of Cameroon, 2003.