Ñwaè' Mfaè' Ñgaâa Ntuu Jisoès 25

1Mnòŋ vi ka' cǎa btaar, kɛ' embe nfè' ce Fɛstòs à m koo nta', Fɛstòs à natǐ à rla' Sisàriyà a du à rla' Jɛ̀rusalɛ̀m. 2E ka' bà', běe bgòrgòr efa mʉ̀ ŋgǎa taŋshi taŋshì ba btu efa mʉ̀ Jus a vʉ̂, a yɛ ye a suŋ ye buu ce Pol à m gèe. Wowèe a m làa nè ye tatap 3enɛ e gee yuu ce nyor boŋ wowèe, laa tɛ Pol vʉ à rla' Jɛ̀rusalɛ̀m. Wowèe a m làa wa'a njobè' wowèe a m cu mncʉ̀ enɛ Pol à ka' ce vʉ̀, banɛ wowèe a be tɛ' à nduunjì, koo yʉ. 4Fɛstòs à beesì nè wowèe enɛ Pol yu à rla' Sisàriyà, bèe a ce kè'ni ye àfo, banɛ e be cu ba mnòŋ mʉcàr, kʉti à rla' anà. 5E m làa nè wowèe enɛ a ma'shi tɛ a btu efa wǎp mʉ a du à rla' Sisàriyà, ka' ba enɛ e gèe yuu mo' bebep, tɛ wowèe a bo làa yuu ce a tʉr à rlàa kuu ye.

6E ka' cu a wowèe àmbò mnòŋ waami kɛ̀ mnòŋ rʉʉ wa'a, a nati a du à rla' Sisàriyà. Tʉ̀' à ka' raa, e niŋ mbe kor à rsa' mnsa', a laa enɛ a vʉ nè Pôl. 7Pol à ka' vʉ̀, Jus ce a m vʉ̌ à rla' Jɛ̀rusalɛ̀m nà a vʉ a tɛɛte, a sir ye a fa mbetar, a suŋ ku' buu ce e m gèe. Geewa'a yuu mo' yi m ba ce yi m ce dùŋshi enɛ buu anà à m ba mini ka'. 8Pol à kanì, a laa enɛ̂, “Mɛ̀ gèe fàa mò' kuu mncir Jûs, ba Ndap Nyʉ̀ ka', a gee fàa mò' nè ŋkʉʉ à to' Rum ka'.” 9Fɛstòs à ka' ce kòŋ à rgèe tɛ nyor boŋ Jûs, e laa nè Pol enɛ̂, “Wɛ̀ kòŋ à rdù à rla' Jɛ̀rusalɛ̀m tɛ m sa' wo mnsa' ca ba àfo a?” 10Pol à beesì enɛ̂, “M tɛɛ sè'ni ba mbe kor ŋkwe Rûm, à ba mbe dì' ce a be sa' wa mnsa'. Mɛ̀ gèe fàa mò' nè Jus ka', wɛ wɛ̀ foŋ rìŋ wa'a. 11Ka' ba enɛ mɛ̀ bʉ' ncir a gee yuu mo' ce a ba yʉ mɛ̀, m kanì efa rkwe ka'. Ka' ba enɛ buu ce Jus a làa àmbò mɛ̀ na vi yu mini ka', ŋwɛ̀ mò' tʉr ŋger à rkoo mɛ̀ fa nè wowèe ka'. M ce kòŋ mɛnɛ a sa' wa mnsa' ba njeptii ŋkwe Rûm.” 12Fɛstòs à du a de' a yì bèe ce a m ce cep ye, a laa enɛ̂, “Wɛ̀ làa wɛnɛ ŋkwe Rum be sa' wo mnsa', banɛ a be dù yɛ ba ye.”

13Mnòŋ mo' vi ka' càa, ŋkʉʉ Agripà ba Bɛ̀nis a du à rla' Sisàriyà à rcà'ni Fɛstòs. 14Wowèe a ka' cu àfo à mʉ mnòŋ mo', Fɛstòs à suŋ mnsa' Pol nè ŋkʉʉ. E m suŋ ye enɛ̂, “Ŋwɛ̀ mò' yu àfa ce Fɛlìs à m ce dù, a lɛ àfa à ŋwɛ̀ shaŋ. 15Mɛ̀ ka' dù à rla' Jɛ̀rusalɛ̀m, běe bgòrgòr efa mʉ̀ ŋgǎa taŋshi taŋshì ba bleebèe efa mʉ̀ Jus a suŋ buu ce e gèe, a laa enɛ m laa mɛnɛ e gwè mnsa'. 16Mɛ̀ suŋ wowèe enɛ ndèe Rum yu enɛ a ka' vʉ nè ŋwɛ̀ ce e gèe fàa, banɛ bèe ce a làa enɛ e gèe fàa nà, a be vʉ̀, tɛ ye ye laa yuu kuu fàa ce a làa enɛ e gèe, tɛ a ka' teni mnsa'. 17Wèr wowèe à ka' vʉ̀ àfa, mɛ̀ caasì nfè' ka'. Tʉ̀' à ka' raa, mɛ̀ niŋ mbe kor à rsa' mnsa', a laa mɛnɛ a vʉ nè ŋwɛ̀ anà. 18Bèe ce a m làa enɛ e gèe fàa nà a tɛɛ mbe kôr, a laa yuu mo' efa buu bbebep ce mɛ̀ m ce kwà'shi enɛ wowèe a be làa àmbò ye ka'. 19Yuu ce wowèe a m làa yi m ku ba ba àmbò mnsɛr ce a wowèe a m ce sɛr àmbò njɛ̀ɛ njì ce a wowèe a ke loo nè Nyʉ̀, ker ba foŋ àmbò ŋwɛ̀ mò' ce e m kwe, ce a m ce too enɛ Jisòs ce Pol à m ce làa enɛ e cu ntèe nà. 20Mɛ̀ riŋ yuu ce àde' mɛ̀ m ba gee kuu yuu ce a m ce sɛr mnsɛr àtu mo nà ka'. Yi ka' ba wa'a, mɛ̀ laa nè ye mɛnɛ e be kòŋ à rdù à rla' Jɛ̀rusalɛ̀m dù sa' vi mnsa' àfo lɛ? 21Pol à laa enɛ a caasi vi mnsa' tɛ du teni ba Tàr Maŋgòŋ, mɛ̀ laa mɛnɛ a ku ce ke'ni ye caar tɛ nfè' ce m be tuusi ye nè ŋkwe Rum ka' ghɛɛ.” 22Agripà à laa nè Fɛstòs enɛ̂, “M be kòŋ foŋ à ryu' yuu ce ŋwɛ̀ anà be làa.” Fɛstòs à beesì enɛ̂, “À be yu' yuu ce e be làa ba àyàŋsè.”

23Tʉ̀' à ka' raa, Agripà ba Bɛ̀nis a vʉ nè fòo-ŋwɛ̀, a niŋ mbe ndàp rcutè. A m niŋ mbo a bèe ce a m ba btu nè bsoogɛ̀, ba běe bgòrgǒr à rla' ca. Fɛstòs à lâa, a vʉ nè Pôl. 24A ka' vʉ̀ nè ye, e laa enɛ̂, “Ŋkʉʉ Agripà ker ba bèe wɛɛwɛ ce wèr wowèe yu tǎa, yɛ nè ŋwɛ̀ ce Jus wɛɛwɛ a m tuu bèe enɛ a vʉ yɛ mɛ̀, suŋ buu ce e gèe. Wowèe a vʉ a yɛ mɛ̀ à rla' Jɛ̀rusalɛ̀m, ker ba àfa, a ce waani, a ce làa enɛ e yu ŋwɛ̀ ce e ba kèr cu ntèe ka'. 25Mɛ̀ m fyɛ' a yɛ mɛnɛ e bʉ' ncir ka', a gee yuu mo' bebep ce àde' a m ba yʉ ye yʉ ka', à ka' ba njobè' e m kòŋ enɛ Tàr Maŋgòŋ sa' vi mnsa', mɛ̀ laa mɛnɛ m be tuusi ye nè ye. 26Ka' yi yu wa'a, mɛ̀ yɛ yuu mo' ce e gèe ce mɛ̀ ba saŋ suŋ Tata ka'. A mbùu ce mɛ̀ vʉ̀ nè ye njep wěe tìi, laŋlaŋ njeptii wɛ̀ ce ŋkʉʉ Agripà, tɛ sěe ce fyɛ' nje mʉ̀ mnsa' ca tɛ m bo tʉr yuu ce m saŋ. 27Yi yu yɛɛnì enɛ m tuusi ŋwɛ̀ shaŋ ce mɛ̀ buu efa rsaŋ, suŋ yuu ce e gèe ka'.”

Currently Selected:

Ñwaè' Mfaè' Ñgaâa Ntuu Jisoès 25: LNT

Highlight

Copy