DIEMA 29
29
Diema tša Salomo
1Palabalai o tlo tšhoga a robega, go se be le moreku.
2Baloki ge ba ata, ke mo setšhaba se thabago; ge go buša ba babe, se tšhaba se a fegelwa.
3Monna moratabohlale, o thabiša tatagwe; wa go gwerana le diotswa, o tšitlanya thoto.
4Kgoši e ladiša naga ka moahlolelo; monna molopametšhelo o a e onatša.
5Mogokeletšawagabo o mo rea nao ka molaba.
6Dikarogo tša e mobe ke moreo; moloki o tlo hlalala a thaba.
7Moloki o tseba taba ya babotlana; yo mobe ga e lemoge, ga e tsebe.
8Batho ba lonya ba tšhuma motse; ba bohlale ba tima bogale.
9Yo bohlale ge a sekišana le lešilo, le tlo roga, le tlo sega, taba e se fele.
10Banna ba madi ba beka moilabosodi; ba go kwana nae ke baloki.
11Setlatla se tšholla tšohle tša pelong ya sona; mohlale o di bolokela la ka moso.
12Mmuši wa go theeletša taba tša maaka, bahlanka ba gagwe ka moka ke ba ba babe.
13Modiidi le morui ba fela ba hlakana; mahlo a go bona ba a filwe bohle ke Morena.
14Kgoši ge e buša babotlana ka therešo, bogoši bja yona bo dula bo tiile.
15Kgati le tsholo di a hlalefiša; mošemanamoipuši o leša mmagwe dihlong.
16Ge ba babe ba ata, go ata le dikarogo; baloki bona ba tlo ba ba ba bona ba ewa.
17Sola ngwana wa gago, a tle a go agiše, a kwiše pelo yago bose.
18Ge go hlokwa ponokgethwa, setšhaba ga se bušege; fela, wa lehlogonolo ke moyakamolao.
19Molata ga solege ka mantšu; le ge a ka kwešeša ga a eleletšege.
20Ge o bona motho moakgofagobolela, o phalwa ke setlatla ka go holofetša.
21Mohlanka wa go ekelelwa go tšwa byaneng, o tlo ba a re: Le bohwa ke a ja.
22Motho wa sebefedi o tsoša diphapang; setlalwakepelo se senya gantši.
23Boikgogomošo bo tlo kokobetša mong wa byona; wa pelo e ipoetšago o tlo godišwa.
24Moabelana le mahodu o itlhoile; o tlo kwa kahlolo a ikhomolela.
25Go boifa batho go wetša moreong; go phologa e a botago Morena.
26Ba bantši ba nyaka mahlo a mašweu a babuši; mme kahlolo, batho ba e tšwelwa go Morena.
27Monna yo kgopo o nyenywa ke ba bolo; mme yo mobe o nyenya molokaletsela.
Currently Selected:
DIEMA 29: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
