MATEO 5

THUTO THABENG: Mahlogonolo; tlhathollo ya Molao

1Eitše ge a bona mašaba, a rotogela thabeng a dula, mme barutiwa ba gagwe ba batamela. 2A ahlama a ba ruta a re: 3Ba lehlogonolo ke ba ba humanegilego mo moyeng, gobane bonabao mmušo wa magodimo ke wa bona. 4Ba lehlogonolo ke ba ba nyamilego, gobane bonabao ba tlo homotšwa. 5Ba lehlogonolo ke ba boleta, gobane bonabao ba tlo tšea lefase ya ba kabelo ya bona. 6Ba lehlogonolo ke ba tlala ya gore ba loke, ba ba nyoretšwego gona, gobane bonabao ba tlo horišwa. 7Ba lehlogonolo ke bagaugedi, gobane bonabao ba tlo gaugelwa. 8Ba lehlogonolo ke ba pelotshekegi, gobane bonabao ba tlo bona Modimo. 9Ba lehlogonolo ke badirakhutšo, gobane bonabao ba tlo bitšwa bana ba Modimo. 10Ba lehlogonolo ke ba ba tlaišetšwago toko, gobane mmušo wa magodimo ke wa bonabao.

11Ba lehlogonolo ke bolena, ge ba le roga, ba le tlaiša, ba le phara ka bobe ka moka ka maaka ka baka la ka. 12Thabang le hlalale, gobane moputso wa lena ke o mogolo magodimong. Hleng le baporofeta ba le etilego pele, ba ba tlaišitše ka mokgwa woo.

13Lena le letswai la lefase. Bjale ge letswai le tapa le sa tlo nokwa kang? Ga le sa hola selo, ge e se go lahlwa la gatwa ke batho.

14Lena le seetša sa lefase. Motse wa thabeng ga o kgone go utama. 15Le gona motho ga a gotetše lebone a le ribegetša ka seroto. Lebone ba le hloma sehlomong sa lona, la tsebo bonegela bohle ba ngwakong. 16Le sa lena seetša a se bonegele batho ka mokgwa woo, gore ba bone mediro e mebotse ya lena, ba tumiše Tata weno wa magodimong.

17Le se ke la eleletša la re ke tlile go fediša molao le baropofeta. Ga nka ka tla go fediša, ke tlile go tlatša. 18Ruri, ke a le botša, legodimo le lefase di tlo šutha, go sešo gwa šutha le “i” e tee, le ge e le mothalwana o tee wa molao di sešo tša phethega tsohle. 19Ke gona, e a kago fediša e nngwe ya ditaelo le ge e ka ba e nyenyane, mme a ruta batho a realo, o tlo thwe ke e monyenyane mmušong wa magodimo. -- Fela, e a di phethago a di ruta o tlo thwe ke e mogolo mmušong wa magodimo. 20Gobane ke a le botša ge toko ya lena e sa phadiše kgole toko ya ba mangwalo le ya bafarisei le ka se ke la tsena mmušong wa magodimo.

21Le kwele ge ba bogologolo ba boditšwe gwa thwe: O se ke wa bolaya! Mme e a bolayago o tlo swanelwa ke kahlolo. 22Ge e le nna ke le botša ke re: Mang le mang e a befelelwago ngwanabo ka lefela, o tlo swanelwa ke kahlolo. E a rego: Lefela, a era ngwanabo, o swanetšwe ke tsheko ya lekgotla. E a rego: Setlaela, a era ngwanabo, o swanetšwe ke molete wa mollo. 23Ke gona, ge o tliša neo ya gago aletareng, mme o le gonafao wa elelwa gore ngwaneno o na le taba le wena, 24gona tlogela neo ya gago moo aletareng, o thome go yo boelana le ngwaneno, o tsebo tliša neo ya gago.

25O tsome ka pele go kwana le e a sekišanago le wena o sa le tseleng le yena; mosekišananago a se tlo go gafela moahlodi, moahlodi a go gafela mohlanka, mme wa kgoromeletšwa kgolegong. 26Ruri, ke a go botša, moo o ka se ke wa ba wa tšwa, o sešo wa lefa le yona tšheletana ya kgoreletšo.

27Le kwele ba bogologolo ba boditšwe gwa thwe: O se ke wa otswa! 28Ge e le nna ke le botša ke re: Mang le mang e a lebelelago mosadi a mo kganyoga, o šetše a otswitše pelong ya gagwe. 29Ke gonagee ge o kgopišwa ke leihlo la gago la le letona, le gonye o le lahle; gobane se se tlo go go hola, ke ge se sengwe sa ditho tša gago se senyega, gore mmele wa gago ka moka o se tlo lahlelwa moleteng wa mollo. 30Ge o kgopišwa ke seatla sa gago sa le letona, se ripe o se lahle kgole, gobane se tlo go go hola ke ge se sengwe sa ditho tša gago se senyega, gore mmele wa gago ka moka o se tlo lahlelwa moleteng wa mollo.

31Le gona go kile gwa thwe: E a hlalago mosadi wa gagwe, a a mo fe lengwalo la tlhalo. 32Ge e le Nna ke botša lena ke re: E a hlalago mosadi wa gagwe, ge e se ka baka la bootswa, o a mo otswiša; gomme e a tšeago mohlalwa, o a otswa.

33Le gona le kwele ge go boditšwe ba bogologolo gwa thwe: O se ke wa ena maaka; mme o phethe tše o di enetšego Modimo. 34Ge e le nna ke botša lena ke re: Le se ke la ba la ena, le ge e le ka legodimo, ka gobane ke sedulo sa Modimo, 35le ge e le ka lefase, ka gobane ke bogato bja nao tša gagwe: le ge e le ka Jerusalema, ka gobane ke motse wa yena Kgoši e kgolo, 36le ge e le ka hlogo ya gago, ka gobane le ntsha e tee ya moriri wa gago ga o kgone go e šweufatša goba go e fifatša. 37Mo go ya lena polelo “E” e be “E”, “Aowa” e be “Aowa”; se se eketšwago se tšwa bobeng.

38Le kwele ge go thwe: Leihlo le lefya ka leihlo; leino le lefya ka leino. 39Ge e le nna ke botša lena ke re: Le se ke la ganela bobe. Ge motho a go phasola thama ya go le letona, o mo sekegele le e nngwe. 40E a ratago go go sekiša le go go amoga kobjana, mo tlogelele le yona kobo. 41E a go gapeletšago go sepela sekgala se tee, sepela nae o fetše tše pedi. 42E a go kgopelago o mo nee; o se gerule e a rego: Nkadime. 43Le kwele ge go thwe: Rata wa geno, o hloye lenaba la gago. 44Ge e le nna ke botša lena ke re: Ratang manaba a lena; ba ba le rogago le ba šegofatše; ba ba le hloyago le ba setše, ba ba le pharago le ba le hlomarago le ba rapelele. 45Ke gona ge le tlo ba bana ba Tataweno wa magodimong; gobane yena, letšatši la gagwe o le hlabišetša ba babe le ba bolo; le pula ya gagwe o e nešetša baloki le bakgopo. 46Ka gobane ge le rata ba ba le ratago, le tlo bona moputso wang? A ba lekgetho ga ba dire bjalo le bona? 47Gomme ge le dumedišana le bana beno fela, a ke mo le phalago ba bangwe? A ba lekgetho ga ba dire bjalo le bona? 48Bjalo bang babolokatlalo, bjalo ka Tataweno wa magodimong e le Yobolokatlalo.

Currently Selected:

MATEO 5: NSO51

Highlight

Copy