LUKA 19

Sakeo. Diponto tša mafišwa. Jesu o tsena Jerusalema

1A tsena a tšwa ka gare ga motse wa Jeriko. 2Gona moo go be go na le monna e mongwe, leina la gagwe ke Sakeo; e be e le yena letona la ba lekgetho, le gona e le mohumi. 3Yena yo o be a phegelela go bona Jesu, a re: Ke ofe? Fela, a širetšwa ke lešaba, gobane e be e le motho e mokopana. 4A kganyelela kua pele, a namela sehlare sa mogo, gore a tle a mmone, gobane Jesu o be a tlo feta ka gona fao. 5Jesu ge a fihla moo, a iša mahlo godimo, a mmona, a re: Sakeo, akgofa o fologe; gobane lehono ke swanetše go dula ngwakong wa gago.

6Ke mo Sakeo, a akgofilego a fologa, a mo iša ga gagwe a thabile. 7Gomme bohle ba ba di bonego ba tsota ba re: O gorogetše ga monna wa modiradibe.

8Sakeo yena a ema, a bolela le Morena a re: Morena, o ko bone; maruo a ka ke a arolela bahloki ka bogare gomme ge ke forile motho, ke mo lefela gane.

9Jesu a bolela le Sakeo a re: Lehono ngwako wo o tletšwe ke phološo, gobane le yena ke ngwana wa Aborahama. 10Gobane Morwamotho o tlile go nyaka le go phološa se se timetšego.

11Ya re ba sa theeditše, a iša pele ka go bolela ka seswantšho, gobane ba be ba le kgauswi le motse wa Jerusalema, mme ba be ba re Mmušo wa Modimo o tlo tloga o bonala bjale. 12A re: Motho e mongwe wa kgoši a na a ya nageng ya kgole, gore a itšeele bogoši, a boe. 13A bitša bahlanka ba gagwe ba lesome, a ba nea diponto tše lesome, a re: Dirang ka tšona; ke tlo boa. 14Fela, batho ba motse wa gagwe ba be ba mo hloile. Ba roma batseta mehlaleng ya gagwe, ba re: Ga re rate go bušwa ke yena.

15Mohla a boago a tšere bogoši, a laela a re bahlanka bao a ba neilego ditšhelete ba bitšwe, gore a tsebe se ba se dirilego ka tšona. 16Gwa fihla wa pele a re: Morena, ponto ya gago e tswetše tše lesome. 17Kgoši ya re: Ke mo go botše! O mohlanka yo bolo, ka gobane o mpotegetše ka tše nyane. O tlo buša metse e lesome. 18Wa bobedi a tla a re: Morena, ponto ya gago e tswetše tše tlhano. 19Kgoši ya re: Le wena o tlo buša metse e mehlano.

20Gwa tla e mongwe a re: Morena, ponto ya gago še. Ke be ke e bolokile e phuthetšwe ka lešela. 21Gobane ke be ke go boifa, ka ge o le monna yo šoro. O tšea mo o sa kago wa bea; o buna mo o sa kago wa bjala. 22Kgoši ya re: O mohlanka e mobe. Ke tlo ahlola ke eya le molomo wa gago. O tsebile ge ke le motho yo šoro, ke tšeago mo ke sa kago ka bea, ke bunago mo ke sa kago ka bjala. 23Ge go le bjalo, o šitišitšwe ke eng go iša tšhelete ya ka go baadimi? Gona go boeng gaka nka be ke e latile le kokeletšo ya yona.

24Kgoši ya laela ba ba emego moo, ya re: Mo amogeng ponto yeo, le e nee yola wa diponto tše lesome. 25Bona ba re: Morena! Hleng o na tše lesome! 26Nna ke re, e a nago natšo o tlo fiwa; e a se nago natšo o tlo amogiwa le se a nago le sona. 27Gomme manaba a ka a go re: Ga re rate go bušwa ke wena, a tlišeng fa le a bolaye pele ga ka.

28Jesu ge a feditše go bolela, a ba eta pele ge ba rotogela Jerusalema. 29Eitše ge ba batamela Betefage le Bethania mo thabeng ye ba rego ke ya Mehlware, a roma ba babedi ba barutiwa ba gagwe. 30A re: Yang motsaneng wo re lebanego nawo; e tlo re ge le tsena, le tlo hwetša pokolwana e kgokilwe, e sešogo ya namelwa ke motho; Le e hunolle le tle nayo. 31Gomme ge motho a ka le botšiša a re: Le e hunollelang? Le tlo re: Morena o a e hloka.

32Ba ba romilwego ba ya, ba hwetša go le bjalo ka ge a ba boditše. 33Ge ba sa hunolla pokolwana yeo, beng ba yona ba tla ba re: Le e hunollelang?

34Bona ba re: Morena o a e hloka. 35Ba e tliša go Jesu, ba bea dikobo tša bona godimo ga yona, ba tsebo mo nametša. 36Ge ba eya, batho ba ala dikobo tša bona tseleng.

37Ge ba etla motheogeng wa thaba ya Mehlware, bontši ka moka bja barutiwa ba thoma go tumiša Modimo, ba hlaboša mantšu ba thabile, ba mo reta ka mehlolo ka moka ye ba e bonego. 38Ba re: A go retwe Kgoši e tlago ka leina la Morena; legodimong go be le khutšo; magodimodimong go ye tumišo.

39Bafarisei ba bangwe ba le gare ga lešaba, ba tla ba re: Moruti, kgalema barutiwa ba gago.

40Jesu a fetola a re: Ke a le botša, ge bao ba ka homola, go tlo goa maswika.

41Ya re ge a batamela mme a bona motse, a o llela, 42a re: O ka be o re ka lona tšatši le la gago wa lemoga tše di go išago khutšong; fela, bjale di utagetše mahlo a gago. 43Gobane o tlo tlelwa ke matšatši ao manaba a gago a tlogo epa lengope a go dikologa a go rakelela, a go tlaletše thoko tšohle. 44Ba tlo go digela fase le bana ba gago ba go wene; ba ka se ke ba tlogela leswika le sa hlatlagane le lengwe; ka gobane o sa ka wa lemoga lebaka le o etetšwego ka lona.

45Ge a tsena Ntlongkgethwa a thoma go leleka ba ba bego ba bapatša ba reka mo go yona. 46A bolela le bona a re: Go ngwadilwe gwa thwe: Ngwako wa ka ke ngwako wa thapelo; mme lena le o dirile legolo la bahlakodi.

47A fela a ruta Ntlongkgethwa ka mehla, mola baperisita ba bagolo le bamangwalo ba phegelela go ka mmolaya, ba na le bagolo ba setšhaba. 48Fela, ba se ke ba kgona selo, gobane batho ka moka ba be ba mo gomaretše, ba mo theetša.

Currently Selected:

LUKA 19: NSO51

Highlight

Copy