LUKA 16

Molaki yo bohlale. Thuto le tsholo. Mohumi le modiidi

1A bolela a na le barutiwa ba gagwe a re: Monna e mongwe wa mohumi o be a na le molaki wa gagwe. A sebelwa gore molaki o gašanya lehumo la gagwe. 2Mohumi a mmitša a mmotšisa a re: Ke eng tšeo ke kwago ba go bolela? Ntaodišetše tša bolaki bja gago, gobane o ka se ke wa hlwa o eba molaki wa ka. 3Molaki ka pelong ya gagwe a re: Ke tlo dirang ge mong wa ka a nkamoga bolaki? Go lema ke a šitwa; go kgopela go ka nteša dihlong. 4Se ke tlogo se dira ke a tseba, gore ge ke lelekilwe bolaking ba tle ba nkamogele nywakong ya bona.

5A bitša ba ba tšerego molato go mong wa gagwe, ba tla ka o tee. Wa pele a bolela nae a re: Molato wo o o tšerego go mong wa ka ke o mokae? 6Eo a re: Ke meeta e lekgolo ya makhura. Molaki a re: Tšea lengwalo la gago la molato, o dule o akgofe o ngwale masome a fetšago seatla. 7A bolela le e mongwe a re: Wene wa gago molato ke o mokae? Eo a re: Ke mekotla e lekgolo ya mabele. Molaki a re: Tšea lengwalo la gago o ngwale masome a seswai.

8Gomme mong wa gagwe a mo reta, molaki eo a sa lokago, a re o dirile ka maano; gobane bana ba lefase leno, ka maano a ba diranago seng sa bona ka ona, ba phala bana ba seetša.

9Le nna ke le botša ke re: Itireleng bagwera ka mamona o sa lokago, gore mohla le felelwago, ba le amogele meagong e lego ya neng le neng. 10Mmotegidinyaneng, le ka tše kgolo o a botega. Moselokedinyaneng, le ka tše kgolo ga a loke. 11Bjale ge ešita le ka tša mamona o sa lokago le sa botege, ke mang e a tlo le bota ka tša makgonthe? 12Ge ka tša e mongwe le sa ka la botega, ke mang e a tlogo le nea tše e tlogo ba tša lena?

13Ga go mohlanka e a kago kgona go direla marena a mabedi; gobane o tlo hloya e mongwe, a rate e mongwe, goba a gomarele e mongwe, a nyatše e mongwe. Le ka se kgone go direla Modimo, mme la direla le mamona.

14Tšohle tše, le bafarisei ba di kwa, bona ba go bušwa ke megabaru; mme ba mo kwera. 15Jesu a bolela le bona a re: Ke lena le ipeilego baloki pele ga batho; mme Modimo o tseba dipelo tša lena. Gobane se batho ba se semago se segolo, Modimo o bona e le se makgapha.

16Melao le Baporofeta ba goma ka Johane. Go tloga moo mmušo wa Modimo o bolelwa ka Ebangedi; mme bohle ba phegelela go tsena go wona. 17Fela, legodimo le lefase di ka felela, gomme mo go Molao go ka se ke gwa ba gwa timela le mothalana o tee.

18Mang le mang e a hlalago mosadi wa gagwe a nyala e mongwe, o dira bootswa; le mang le mang e a nyalago mohlalwa, o dira bootswa.

19Go be go na le monna wa mohumi wa go apara tša matsaka le mašela a mabotse, a nyakalala botšheping ka mehla. 20Gomme mojakong wa gagwe go be go na le modiidi, yo leina la gagwe e lego Latsaro, e a lahletšwego moo a tletše dibabo, 21A rata go ka hora ka maratha a wago fase a etšwa megopong ya mohumi. Mme dimpša tša tla tša mo latswa dibabo.

22Ya re ge modiitšana a ehwa, a rwalwa ke barongwa, a išwa difarong tša Aborahama. 23Le mohumi a hwa, a išwa lebitleng. Gomme ge a le bodulabahu, a dutše bohlokong, a lelala a bona Aborahama kgole, le Latsaro a le difarong tša gagwe. 24A goelela a re: Aborahama tata! Nkgaugele! Roma Latsaro a ine ntlha ya monwana meetseng, a tle a ntime leleme; gobane ke kwa bohloko mo kgabong ye.

25Aborahama a fetola a re: Ngwanaka! Gopola tše botse tše o di tšerego bophelong bja gago, mola Latsaro a le go tše mpe. Yena bjale o a homotšwa a le fa; mme wena o kwa bohloko. 26Le gona se se šitišago ke legaga le legolo le, le le thekgilwego makgatheng a rena le lena, le le thibelago ba mono, ge ba ka rata go tla moo go lena, le ge e le ba go lena, ge ba ka rata go tla mo go rena. 27Bjale a re: Gona tata, ke a go rapela, mo rome a ye ngwakong wa tate; 28gobane ke na le bana bešo ba bahlano, a yo ba hlatsela, gore ba se ke ba tla le bona madulong a a bohloko.

29Aborahama a re: Ba na le Moshe le baporofeta; a ba kwe bona. 30Yena a re: Aowa-hle, tata, Aborahama. E ka re ge e mongwe wa ba ba hwilego a eya go bona ba ka sokologa. 31Aborahama a re: Ge ba sa kwe Moshe le baporofeta, ba ka se ke ba kgolwa le ge go ka tsoga e a tšwago bahung.

Currently Selected:

LUKA 16: NSO51

Highlight

Copy