JOSHUA 23
23
Pitšo e kgolo ya Joshua
1Ya re ge go šetše go fetile matšatši a mantši, Morena a šetše a khutšišitše Baisiraele manaba a bona ka moka a mo thoko tšohle, Joshua a ba a šetše a tšofetše a atetšwe ke matšatsi, 2a bitša Baisiraele ka moka, bagolo ba bona, le balaodi ba bona, le baahlodi ba bona, a ba rera a re: Nna ke tšofetše, ke atetšwe ke matšatši. 3Lena le bone tšohle tše Morena a di dirilego ditšhaba tše ka moka ge lena le fihla; ka gobane ke yena Morena Modimo wa lena a bego a le hlabanela. 4Bjale le tsebe gore ditšhaba tšeo di sa šaletšego ke di gafetše lena gotee le ditšhaba ka moka tše ke di fedišitšego, gore naga ye e be ya lena le ya meloko ya geno go tloga ka noka ya Jorodane le go goma ka lewatle le legolo la kua bodikela. 5Morena Modimo wa lena ke yena e a tlogo di raka ge le tla, o tlo di faladisa, gore le tšee naga ya bona ka mo Morena Modimo wa lena a le boditšego ka gona. 6Bjale tiišang maatla ka kudu, gore le hlokomele mme le dire tše di ngwadilwego mo pukung ya melao ya Moshe; le se ke la e tlogela la ya go le letona goba go la ntsogošo, 7gore le se hlakahlakane le ditšhaba tše di šetšego fa go lena, gore le se ke la rerelela maina a medimo ya bona, le se ke la ena ka ona, le se ke la e hlankela la e khunamela. 8Ka gobane sa lena ke go gomarela Morena Modimo wa lena ka mokgwa wo le dirilego ka wona go fihla bjale. 9Morena o rakile ditšhaba tše dikgolo ge le fihla, ditšhaba tše maatla; le bjale ga go sa na le o tee e a kgonago go ema ge le fihla. 10Monna o tee wa geno o rakediša ba sekete, ka gobane e a le hlabanelago ke yena Morena Modimo wa lena, ka mo a le boditšego ka gona. 11Bjale le hlokomele ruri gore dipelo tša lena di rate Morena Modimo wa lena. 12Fela, ge le ka hlanoga la kgomarelana le mašaledi a ditšhaba tše di šaletšego mo go lena, la tšeišana le bona, la tswakana le bona, 13gona ka kgonthe le tsebe gore Morena Modimo wa lena a ka se ke a hlwa a raka ditšhaba tšeo ge le tla; di tlo le fetogela mereo le melaba le kgati ya go le itia mahlakore, le meetlwa mo mahlong a lena, la ba la senyegela fa nageng e botse ye Morena Modimo wa lena a le neilego yona.
14Bonang, ga e le nna bjale ke tloga ka tsela ya bohle ba lefase; gomme lena a nke le lemogeng ka pelo ka moka le ka moya ka moka, ge go sa ka gwa hlaela le setee sa tše botse tše Morena Modimo wa lena a le boletšego ka tšona; ka moka di tšweletše; ga go na le setee se se hlokegilego. 15Gomme ka mokgwa wo le tletšwego ke tše botse tše a le boletšego ka tšona, ka mokgwa o bjalo Morena o tlo le tlela le ka tše mpe ka moka, a be a le fediše mo nageng e botse ye a le neilego yona. 16Ge le ka senya kgwerano ya Morena Modimo wa lena, ye a le laetšego yona, mme la ya la direla medimo e šele la e khunamela, gona le tlo tukelwa ke bogale bja Modimo, la fedišwa ka pela gona mo nageng e botse ye a le neilego yona.
Currently Selected:
JOSHUA 23: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
