JEREMIA 43
43
Mašalela a falalela Egipita
1Ya re ge Jeremia a feditše go botša batho bao bohle mantšu ao ka moka a Morena Modimo wa bona a mo rometšego go bona ka ona, ona ao ka moka, 2gwa bolela Asaria morwa wa Hosanya, le Johanane morwa wa Karea, le banna ba ba bego ba ngangana le Jeremia, ba re: O bolela maaka! Ga wa rongwa ke Morena Modimo wa rena, ge o re: Le se ke la ya Egipita la yo diilela gona. 3O hlohleletšwa ke Baruke morwa wa Neriya, wa re beka, wa re re gafelwe matsogong a Bakaladea, gore ba re bolaye, ba re thope ba re iše Babele. 4Ke mo Johanane morwa wa Karea, le balaodi ba dira bohle, le batho ka moka, ba gana go kwa se Morena a se boletšego, a re ba dule nageng ya Juda. 5Johanane morwa wa Karea, le balaodi bohle ba madira, ba botha mašalela ka moka a Juda, a tšogo boa ditšhabeng ka moka, tše ba bego ba tšhabetše go tšona mme ba boela go dula nageng ya Juda. 6Ba botha basadi le bana, le barwedi ba kgoši, le bohle ba bego ba tlogetšwe ke Nebusaradani molaodi wa dira tša mošate, ba gafelwa Gedalia morwa wa Ahikama morwa wa Safani; ba tloga le Jeremia moporofeta, le Baruke morwa wa Neriya, 7Ba falalela nageng ya Egipita, ba gana go kwa se Morena a se boletšego; ba ya ba fihla Thagapanese.
8Ba le gona moo Thagapanese, lentšu la Morena le tletše Jeremia la re: 9Tšea maswika a magolo ka diatla tša gago, o a lokele lerageng la sebešong sa makokoto sa matsenong a ngwako wa Farao gonamo Thagapanese; o dire o bonwa ke banna ba Juda. 10O bolele le bona o re: Morena wa mašaba Modimo wa Isiraele o re: Tsebang gore mohlanka wa ka Nebukadinetsara kgoši ya Babele ke tlo mmitša ka mo tliša fa; ka bea sedulo sa gagwe sa bogoši godimo ga maswika a, a tlo ala legogwa la gagwe godimo ga ona. 11O tlo tla a otla naga ya Egipita; wa lehu a tlo hwa; wa go thopša a thopša; wa go bolawa a bolawa ka lerumo. 12Nywakong ya Modimo ya Egipita ke tlo gotetša mollo. Nebukadinetsara o tlo e tšhuma a e thopa; o tlo apara naga ya Egipita bjalo ka modiši ge a apara kobo yagwe, a ikela a thabile. 13Diswantšho tša mo ntlong ya modimo wa letšatši, modimo wa Egipita, o tlo di pšhatlaganya, a tšhuma nywako ya medimo ya Egipita ka mollo.
Currently Selected:
JEREMIA 43: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
