JEREMIA 39
39
Motse wa Jerusalema o a thopiwa
1Ka nyawaga wa senyane wa pušo ya Tsedekia kgoši ya Juda, ka kgwedi ya lesome, gwa tla Nebukadinetsara kgoši ya Babele a na le dira tša gagwe ka moka; a tla a rakelela motse wa Jerusalema. 2Ka ngwaga wa lesome la motšo o tee wa pušo ya Tsedekia, ka kgwedi ya bone, ka la senyane la kgwedi yeo, ba šwahlela ka motseng.
3Ditona ka moka tša kgoši, ya Babele tša tsena, tša ema kgorong ya ka gare. E be e le Neregala-Saretsere, le Samagaranebu, le Saresekima mogolo wa dikala, le Neregala-Saretsere mogolo wa ba bohlale, le ditona tše dingwe tša kgoši ya Babele.
4Tsedekia kgoši ya Juda, le bahlabani ka moka, ge ba bona go le bjalo, ba thoba ba tšwa motseng e le bošego ka tsela ya tšhemong ya kgoši, ba tšwa ka kgoro ya mo gare ga merako e mebedi, ba tloga ka tsela e yago molaleng wa Jorodane. 5Fela, ba hlomarelwa ke dira tša Bakaladea, tša swara Tsedekia a le molaleng wa Jeriko. Ba mo tšea ba mo iša go Nebukadinetsara kgoši ya Babele motseng wa Ribilathe nageng ya Hamathi. Nebukadinetsara a mo sekiša moo. 6Kgoši ya Babele a bolaya bana ba Tsedekia gona moo Ribilathe pele ga mahlo a gagwe; le bagolo ka moka ba Juda ba bolawa ke kgoši ya Babele. 7Yena Tsedekia a gonywa mahlo, a tlengwa ka diketane, a išwa Babele. 8Ngwako wa kgoši, le nywako ya batho, Bakaladea ba e tšhumile ka mollo, ba phušola merako ya Jerusalema. 9Mašalela a batho ba ba šetšego motseng, ba ba bego ba lobile, Nebusaradani letona la dira tša mošate o ba thopile a ba iša Babele. 10Ge e le batho ba babotlana, ba ba se nago sa bona, Nebusaradani letona la dira tša mošate o ba tlogetše nageng, a ba nea dirapa tša merara le mašemo mehleng yeo.
11Ge e le Jeremia, Nebukadinetsara kgoši ya Babele, o be a mo laeletše letona la dira tša mošate a re: 12Mo tšee o mo lote; o se ke wa mo dira bošula le ganyane. O mo dire tše a tlogo go botša tšona. 13Nebusaradani tona ya dira tša mošate, le Nebusasabani molaki wa mošate, le Neregala-Saretsere mogolo wa ba bohlale, le matona ka moka a kgoši ya Babele. 14Ba roma bahlanka ba yo ntšha Jeremia lapeng la kgolego, ba mo gafela Gedalia morwa wa Ahikama morwa wa Sefane gore a mo iše ngwakong wa gagwe; a ya a dula le batho ba bangwe.
15Jeremia mola a sa le lapeng la kgolego, o be a tletšwe ke lentšu la Morena la re: 16Yaa o botše Ebede-Meleke monna ela e moso, o re: Morena wa mašaba Modimo wa Isiraele o re: Tseba gore ke tlo tšweletša bošula bjo ke bo boletšego ke era motse wo; ga ke tliše tše botse. O tlo di bona mehla yeno. 17Ge e le wena, ke tlo go hlakodiša mohla woo! O realo Morena. O ka se ke wa gafelwa diatleng tša bao o ba boifago. 18Ke tlo go lesa wa phologela ruri; o ka se bolawe ke lerumo. O tlo phonyokga o ithopetše bophelo bja gago, ka gobane o botile nna. O realo Morena.
Currently Selected:
JEREMIA 39: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
