JEREMIA 37
37
Jeremia o a itiwa, a lahlelwa moleteng
1Tsedekia morwa wa Josia a ba kgoši legatong la Jekonya morwa wa Joyakima. Ke yena Tsedekia yo Nebukadinetsara kgoši ya Babele a mo dirilego kgoši nageng ya Juda. 2Yena le bahlanka ba gagwe le setšhaba sa naga ya gagwe ga ba ka ba kwa tše Morena a di bolelago ka moporofeta Jeremia.
3Yena kgoši Tsedekia o kile a roma Jukale morwa wa Selemia, le Tsefanya morwa wa Maaseya moperisita, ba tla ba re: A ko re rapelele go Morena Modimo wa rena. 4Ke mola Jeremia a sešo a išwa kgolegong, a sa fela a sepela mo gare ga batho; 5Gomme madira a Farao a be a tšwele Egipita. Bakaladea ba ba bego ba rakeletše motse wa Jerusalema, ge ba sebelwa dira tšeo, ba gomela motse wa Jerusalema.
6Ke mo lentšu la Morena la nago la tlela Jeremia moporofeta la re: 7Morena Modimo wa Isiraele o re: Botšang kgoši ya Juda e le romilego la mpotšiša, le re: Tseba gore dira tša Farao tše di tšwetšego go le namolela, di tlo boela Egipita ga gabotšona. 8Bakaladea ba tlo boa ba lwa le motse wo; ba tlo o thopa ba o tšhuma ka mollo. 9Morena o re: Le se ke la fora dipelo tša lena ka go re: Bakaladea ba tlo re tlogelela ruri! Ba ka se ke ba ba ba tloga. 10Le ge le ka bolaya madira ka moka a Bakaladea ba ba lwago le lena, gwa šala banna ba dikgobetša, bona bao ba tlo tsoga mešašeng ya bona, ba tla ba tšhuma motse wo.
11Mehleng yeo, dira tša Bakaladea di gometše motse wa Jerusalema, go etla dira tša Farao, 12Jeremia a tšwa motseng wa Jerusalema, a re ke ye nageng ya Benyamini, ke yo amogela dibego tše di tšwago go ba gabo, 13A re a sa tla kgorong ya Benyamini, mohlapetši wa gonafao, Jeriya morwa wa Selemia morwa wa Hananya, a mo swara, a re: O yo loba Bakaladea!
14Jeremia a re: Ke maaka; go loba Bakaladea go nna ga dio! Jeriya a se dumele, a swara Jeremia, a mo iša go bagolo. 15Bagolo ba galefela Jeremia, ba mo itia, ba mo iša kgolegong ngwakong wa Jonathane mongwadi wo ba bego ba o dirile wa kgolego. 16Jeremia a tsenywa ngwakong woo o bego o na le molete wa mokoti; a dula moo matšatši a mantši.
17Kgoši Tsedekia a roma motseta a mo ntšha, a mmotšiša ka thopeng ba le ngwakong wa mošate, a re: A go na le lentšu le lengwe la Morena?
Jeremia a re: E, le gona; le re: O tlo gafelwa matsogong a kgoši ya Babele. 18Jeremia a botšiša kgoši Tsedekia a re: Ke go sentše kang? Le bahlanka ba gago le setšhaba se, ke ba sentše kang ge ba nkiša ngwakong wa kgolego? 19Ba kae baporofeta ba lena ba ba le porofetetšego ba re. Kgoši ya Babele a ka se ke a tla a lwa le lena le naga ye? 20Gomme bjale kgoši mong wa ka! A ko kwe se ke se kgopelago, ge ke re: Se mpušetše ngwakong wa Jonathane mongwadi, ke se tlo hwela gona.
21Kgoši Tsedekia a laela a re: Jeremia a išwe lapeng la kgolego; a re ka tšatši le lengwe le lengwe a newe senkgwa se se tšwago mokgobeng wa baapei ba dinkgwa; ba realo ka mehla dijo di sa le gona motseng. Jeremia a dula lapeng la kgolego ka mokgwa o bjalo.
Currently Selected:
JEREMIA 37: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
