JEREMIA 31

Lerato le legolo la Modimo le tlo phološa. Kgwerano e mpsha

1Mehleng yeo, Modimo wa meloko yohle ya Isiraele e tlo ba nna, o realo Morena, mme bona e tlo ba setšhaba sa ka. 2Morena o re: Setšhaba sešadišwa ke lerumo, se hweditše kgaugelo lešokeng; Isiraele o ile, ya ba gona go ladišwa. 3Morena o ikutollotše ka mmona kgole; a re: Ke go ratile ka lerato le le sa felego; ke ka baka leo ke go gogelago go nna ka botho. 4Ke sa tlo go agiša wa agiwa, wene ngwanana wa Isiraele! O tlo buša o itlhama ka meropa yago, wa tšwela dikošeng tša ba binago, o tlo buša o lema rapa tša merara dithabeng tša Samaria; balemi ba tlo lema, ba ba ba tlo fula. 5Gobane go tlo tla matšatši a ge bahlapetši ba dithaba tša Efuraimi ba tlo goeletša ba re: Nanogang, re rotogele kua Tsione, re ye go Morena Modimo wa rena.

6Gobane Morena o re: Hlalalelang Jakobo, e be lethabo la go goloka hlogo ya ditšhaba. Hlagišang sefela le re: Morena, phološa setšhaba sa gago, mašalela a Isiraele! 7Ke nna e! Ke ba tliša ba etšwa šokeng la kua leboa; ke ba botha thoko tšohle tša lefase. Mo go bona go na le difofu le digole, go na le baima le mathari; ba boela mono e le šaba le legolo. 8Ba tla ba lla; ke ba etetša ke ba fepeletša, ke ba iša nokaneng tša meetse, le ka tsela ya go loka, ba se tlo kgopša ba le mo go yona; gobane ke nna tatago Isiraele, morwa wa ka e mogolo ke Efuraimi.

9Hee lena ditšhaba, kwang se Morena a se bolelago, le goelele le kua kgole dihlakehlakeng, le re: Yena ela wa go gašanya Isiraele o a ba kgobela, o ba lotola bjalo ka modiši wa mohlape. 10Gobane Morena o rekolotše Isiraele, o ba namoletše matsogong a ba bego ba ba phala ka maatla. 11Ba tlo tla mmotong wa Tsione ka mekgolokwane ba tšhologela tšhegofatšo tša Morena tša mabele le morara le makhura, tša dinku le tša dikgomo; mme dipelo tša bona di tlo etša tšhemo ya monola; ba ka se sa notlega. 12Gona banenyana ba tlo ipshina ka dipina gotee le masogana le bagolo; ke tlo fetola nyamo ya bona ya ba lethabo, ka ba homotša, ka ba thabiša ba etšwa mahlomoleng. 13Dipelo tša bompha Modimo ke tlo di khoša ka makhura; mme tšhaba sa ka se tlo hora tšhegofatšo tša ka. O realo Morena. 14Morena o re: Theetša, kua Rama go kwala sello, dikolomelo tša ba llago gabohloko. Rahele o llela bana ba gagwe; o gana go homotšwa; gobane ga ba sa le gona. 15Morena o re: Thibela ntšu la gago, iletša mahlo ago go lla ka megokgo; go sa na le moputšo wa ditiro tšago. O realo Morena. Ba tlo boa ba etšwa nageng ya lenaba. 16Ka gobane go sa holofelwa tše di tlogo go tlela, o realo Morena, ge bana bago ba boela magaeng a bona. 17Go kwa ke kwele ge Efuraimi a lla a re: O nkotlile, ka otlwa wa pholwana ye e sa thapego. Ntshokolle, ke sokologe; gobane Morena Modimo wa ka ke wene. 18Gobane ke itše go sokologa ka itshola; ke itše go hlalefa ka ikotla. Ke lewa ke dihlong; ke inyatša ke rwele kgobogo ya mola ke sa le e mofsa. 19A ga ke re: Efuraimi ke morwamoratwa wa ka, ke ngwana e a nthabišago? Gobane ge ke mo kgalema, ke ka gobane ke sa mo lebale; ke ka baka leo ke mo hlomogelago pelo, ke mo gaogela. O realo Morena. 20Ipeele dika, mme o swaye tsela ye o tšwago ka yona, o kgone go tlo boa, wena ngwananyana wa Isiraele; o kgone go boela metseng yeno ya geno. 21Wena ngwananyanamohlanogi, o tia le naga wa feletša kae? Gobane Morena o hlola tše mpsha faseng: Mosadi o tiela monna gare.

22Morena wa mašaba, Modimo wa Isiraele, o re: E tlo re ge ke gomišitše mathopša a bona, gona nageng ye ya Juda le metseng ya gona, go sa tlo bolelwa gwa thwe: Morena a go šegofatše, wena legae la toko, wena thabakgethwa! 23Ba ba tlogo dula moo ke ba Juda le ba metse ya gona, gotee le balemi, le ba tšwago le mehlape. 24Gobane ke tlo lapološa dipelo tše di lapilego; le dipelo tšohle tše di nyamilego ke tlo di homotša. 25Ke mo ke phafogilego, ka lebaleba, ka kwa boroko bo ntsefetše.

26Morena o re: Tsebang go tlo tla matšatši a ge ke bjala peu tša batho le tša dikgomo mo go ba moloko wa Isiraele le wa Juda. 27Mme boka ke ba phafogetše go tomola le go rutla le go thosanya le go fediša, -- ke tlo phafogela go tlo ba agiša le go hloma. O realo Morena. 28Mehleng yeo go ka se hlwe go thwe: Botate ba lle matata, meno gwa šia a bana. 29Gobane e a hwago o tlo hwela bokgopo bja gagwe; meno go tlo šia a moji wa matata.

30Tsebang! Go tlo tla letšatši le ke tlogo dira kgwerano e mpsha le ba leloko la Isiraele le la Juda. O realo Morena. 31E ka se be kgwernano e kakago yela ke e dirilego le borrabo mola ke ba swara ka seatla ka ba ntšha Egipita. Kgwerano yeo ba e sentše, mola ke le Mong wa bona. O realo Morena. 32Gobane kgwerano ye ke tlogo e dira le bona ge go fetile mehla yeno, Morena o re, še: Ke tlo bea melao ya ka matswalong a bona, ke tlo e tloka dipelong tša bona. Ke tlo ba Modimo wa bona; mme bona e tlo ba setšhaba sa ka. 33Motho a ka se hlwe a ruta wa gabo le ge e le ngwanabo a re: Tseba Morena! Ka gobane ka moka ga bona ba tlo ntseba, ba ba nyenyane le ba bagolo. O realo Morena. Gobane ke tlo ba lebalela molato wa bona, ke se hlwe ke gopola sebe sa bona.

34Morena o re: Mmei wa letšatši ya ba seetša mosegare, Mmei wa melao e bušago kgwedi le dinaledi ya ba dietša tša bošego, mohuduwawatle maphoto a lona a duma, yo ina lagwe e lego Morena wa mašaba, o re: 35Ge melao yeo e ka kgaotša pele ga ka, ke mo bana ba Isiraele ba tlogo kgona go kgaotša go ba setšhaba sa ka pele ga ka ka mehla yohle. 36Morena o re: Ge magodimo kua godimo, le metheo ya lefase kua fase, di ka elwa ke motho, -- gona le nna nka hlala peu ya Isiraele ka baka la tšohle tše ba di dirilego. O realo Morena.

37Tsebang! Go tlo tla matšatši, o realo Morena, a ge motse wo o tlogo agelwa Morena go tloga ka sebong sa Hananiele go fihla kgorong ya sekhutlo. 38Lenti la motheo le tlo išwa pele la lebišwa mmoto wa Gareba, le tlo rarela le Goatha. 39Le moedi wohle wa ditoto le wa dithobolo, le molala wohle wa nokeng ya Kidirone go iša sekhutlong sa kgoro ya dipitsi thoko ya bohlabela, e tlo ba felo go kgethetšwego Morena; go ka se ke gwa thubja neng le neng.

Currently Selected:

JEREMIA 31: NSO51

Highlight

Copy