BAAHLODI 4
4
Debora le Baraka ba fenya Jabini le Sisera
1Ehudi ge a hwile, Baisiraele ba boetše medirong ya go befela Morena. 2Morena a ba lahlela diatleng tša Jabini kgoši ya Bakanana e a bego a buša Hatsora. Molaodi wa dira tša gagwe e be e le Sisera e a bego a agile Harosethe-Gojima. 3Baisiraele ba hlabela Morena mokgoši, ka gobane Jabini o be a na le dikoloi tše makgolo a selelago tša tshipi; a fetša nywaga e masome a mabedi a hlakiša Baisiraele.
4Mehleng yeo Baisiraele ba be ba ahlolelwa ke Debora moporofeta wa mosadi mogatša wa Lapidothe. 5O be a agile mohlareng wa molala wa ga Debora, mo gare ga Rama le Bethele, dithabeng tša Efuraimi; Baisiraele ba tla go yena ba ahlolewa. 6Debora a roma motho a yo bitša Baraka morwa wa Abinoama wa Kedese-Nafutali, a mo rera a re: A ga ke re Morena Modimo wa Isiraele o go laetše a re: Sepela o ye thabeng ya Thabora, o ye o na le banna ba dikete tše lesome ba Banafutali le ba Basebulone! 7O re: Kua nokeng ya Kisoni ke tlo tliša Sisera molaodi wa dira tša Jabini; o tlo tla go wene a na le dikoloi tša gagwe le madira a gagwe; mme ke tlo mo gafela diatleng tša gago.
8Baraka a re: Ge o ka sepela le nna, gona ke tlo ya; fela, ge o sa sepele le nna, gona nka se ke ka ya.
9Debora a re: Go sepela ke tlo sepela le wena; fela, direto tše di tlogo reta tsela ye o tlogo e swara, di ka se ke tša reta wena; ka gobane Sisera, Morena o tlo mo gafela seatleng sa mosadi. Gomme Debora a tsoga a tšwa le Baraka, ba ya Kedese. 10Baraka a rapa Banafutali le Basebulone, ba bokana Kedese, a rotoga ka dinao a na le ba dikete tše lesome; Debora a rotoga le yena.
11Gona moo kgauswi le motse wa Kedese go be go agile Hebere Mokeni wa go tšwa go Bakeni, bana bala ba Hobaba molangwa wa Moshe, mešaša ya gagwe e le moruleng wa Tsaanaima.
12Sisera a botšwa gore Baraka morwa wa Abinoama o rotogetše thabeng ya Thabora. 13Sisera a kgobokanya dikoloi tša gagwe ka moka tša tshipi tše makgolo a senyane, le madira a gagwe ka moka a a bego a na le yena, a tšwa Harosethe-Gojima, a tla nokaneng ya Kisoni.
14Ke mo Debora a botšitšego Baraka a re: Tsoga, lehono Morena o gafela Sisera diatleng tša gago. A ga ke re ke yena Morena a tšwilego go go eta pele! Ya ba gona Baraka a fologago thabeng ya Thabora, a latelwa ke banna ba dikete tše lesome. 15Ya re ge ba ba šwahlela ka bogale bja lerumo la Baraka, Morena a raranya Sisera le dikoloi tša gagwe ka moka le madira a gagwe ka moka; Sisera a ba a tlogela koloi ya gagwe, a tšhaba ka dinao. 16Baraka a rakediša makoloi ao le madira ao a a fihliša Harosethe-Gojima; makoko ka moka a Sisera a fela ka bogale bja marumo, gwa se šale le o tee.
17Ga e le Sisera a tšhaba ka dinao a tla mokutwaneng wa Jaele mosadi wa Hebere Mokeni yola, gobane ba leloko Hebere Mokeni ba be ba sa lwe le Jabini kgoši ya Hatsora. 18Jaele a tšwa a dumediša Sisera, a mo rera a re: Fapogela mono, Mong wa ka! Fapogela go nna; o se boife! Sisera a fapogela mokutwaneng wa gagwe; mme Jaele a mo apeša ka kobo. 19Sisera a mo rera a re: Anke o nnoše meetsana gobane ke nyorilwe. Jaele a khurumola sebjana sa maswi a mo noša; a buša a mo apeša. 20Sisera a mmotša a re: Ema mojako wa mokutwana; e re ge motho a etla a re: A go motho ka mo? O fetole o re: Aowa!
21Bjalo Jaele mosadi wa Hebere a tšea lemapolo la mokutwana, a swara noto ka seatla sa gagwe, a hwetša Sisera a robetše boroko ka malapi, a nanya a tsena, a mo kokotela lemapolo tlhokeng, la ba la phololetša la tsena fase; ya ba go hwa. 22Ya ba gona go fihlago Baraka a hlomarela Sisera; Jaele a tšwa a mo dumediša, a mo rera a re: Tlaa, ke go bontšhe monna yo o mo tsomago. Baraka a tsena, a hwetša Sisera a rapaletše fase a hwile, lemapolo le le tlhokeng ya gagwe.
23Ke wona mokgwa wo Morena a Kokobeditšego Jabini kgoši ya Bakanana ka wona ge go fihla Baisiraele. 24Gomme letsogo la Baisiraele la fela le thatafalela Jabini kgoši ya Bakanana ba ba ba mo fediša, yena Jabini kgoši ya Bakanana.
Currently Selected:
BAAHLODI 4: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
