BAAHLODI 1
1
Dintwa tša Bajuda. Mašalela a Bakanana
1Ya re ge Joshua a hwile, Baisiraele ba botšiša Morena ba re: Ke mang mo go rena e a tlogo tšwela Bakanana dira?
2Morena a re: A go tšwe Juda; naga ye ke e gafetše diatleng tša gagwe.
3Ba Juda ba bolela le bana babo ba Simeone ba re: Tšwang le rena dira fa nageng ya gešo, re hlabane le Bakanana; ke mo le rena re tlogo tšwa le lena nageng yeno. Ba Simeone ba tšwa nabo. 4Ya re ge ba Juda ba tšwile, Morena a gafela Bakanana le Bapheresi diatleng tša bona; ba bolaya banna ba dikete tše lesome kua Beseka. 5Ba hweditše Adoni-Beseka a le gona mo Beseka, ba lwa le yena, ba bolaya Bakanana bao le Bapheresi. 6Yena Adoni-Beseka a tšhaba, ba mo hlomarela, ba mo swara, ba mo kgaola monwana o mogolo wa mo diatleng le dinaong tša gagwe. 7Adoni-Beseka a re: Modimo o mpušetša ka mo ke dirilego ka gona. Go na le dikgoši tše masome a šupago tše ke di pomilego menwana e megolo ya diatla le ya maoto, ka di topiša maratha a dijo tša ka. Ba mo iša Jerusalema, a hwela ntshe.
8Ba Juda ba be ba lwile le motse wa Jerusalema ba o thopa, ba o fediša ka bogale bja marumo, ba o tšhuma ka mollo. 9Ka morago Bajuda ba tšwetše go hlabana le Bakanana ba ba bego ba dutše dithabeng le kua thoko ya borwa le melaleng. 10Ba tšwela Bakanana ba ba bego ba agile Heburone. Leina la motse woo kgaleng e be e le Kiryathe-Araba; gona moo ba bolaya Sesai le Ahimane le Thalamai.
11Ba tloga moo ba tšwela ba ba bego ba agile Debiri; leina la Debiri kgaleng e be e le Kiryathe-Sefere. 12Ke mo Kalebe a boletšego a re: E a fenyago motse wa Kiryathe-Sefere ke tlo mo nea Akisa morwedi wa ka ya ba mosadi wa gagwe. 13Othiniele morwa wa Kenasi monnago Kalebe a o hula; Kalebe a mo nea Akisa morwedi wa gagwe a ba mosadi wa gagwe. 14Ya re ge a mmeka, Akisa a mo otelela a re a kgopele tšhemo go tatagwe; a fologa pokolo ye a bego a e nametše mme Kalebe a mmotšiša a re: O hloma bjang? 15Akisa a re: A nke o nkatle hle; ge o ntšeišitše mo nageng ya lesehla, gona a nke o mphe le didiba tša meetse. Kalebe a mo nea didiba tša tletlolo le tša tlase.
16Bana ba Keni molangwa wa Moshe (Num. 10:29), ba rotoga ba etšwa motseng wa melala ba na le Bajuda, ba ya lešokeng la Juda la ka thoko ya borwa ya Arada, ba khuduga ba aga setšhabeng sa gona fao. 17Bajuda ba tšwa le bana babo ba Simeone, ba fenya Bakanana ba ba bego ba agile Tsefata, ba o dira segafiwamoka, ba o rea leina la Horoma. 18Ba hula le motse wa Gasa le naga ya gona, le wa Asikaloni le naga ya gona, le wa Ekirone le naga ya gona. 19Morena o be e ema le Juda, ba tšea dithaba; fela ba ba bego ba agile melaleng ga ba ka ba ba raka, ka gobane ba be ba na le dikoloi tša tshipi. 20Kalebe o neilwe motse wa Heburone ka mo Moshe a bego a boletše; gona moo a raka Baenaki. 21Babenyamini bona ba lesitše go raka Bajebusi; Bajebusi le bjale ba sa dutse Jerusalema gotee le Babenyamini.
22Bajosefa le bona ba rotoga ba tla Bethele. Morena a ema le bona. 23Ba leloko la Josefa ba hlola motse wa Bethele. Kgaleng leina la wona e be e le Lusi. 24Dihlodi tša bona tša bona monna a etšwa motseng; tša mo rera tša re: Re bontšhe difata tša motse, re go lese o phele. 25Monna eo a ba bontšha difata tša motse, ba o fediša ka bogale bja marumo; gomme monna eo ba mo lesa a phela le ba moloko wa gagwe ka moka. 26A khudugela nageng ya Bahethe, a aga motse, a o rea leina la Lusi; le bjale e sa le lona la Lusi.
27Bamanase ba lesitše go raka ba Bethe-Seana le ba metsana ya gona le ba Doro le ba metsana ya gona, le ba Jibileama le ba metsana ya gona, le ba Megido le ba metsana ya gona; Bakanana ba kgona go dula mo nageng yeo. 28Fela, mehleng ya ge Baisiraele ba tiile, ba dirile Bakanana bai bahlanka, ba lesa go ba raka.
29Baefuraimi ga ba ka ba raka Bakanana ba ba bego ba agile Gesere Bakanana ba šala gona moo gare ga bona motseng wa Gasere.
30Basebulone ba lesa go raka ba Kitironi le ba Nahalole; mme Bakanana ba šala ba dutše gona moo gare ga bona, ya ba bahlanka ba bona.
31Baasere ba lesa go raka ba Ako le ba Sidoni le ba Ahalabe le ba Akasibe le ba Heleba le ba Afike le ba Rehobo; 32Gomme Baasere ba agišana le Bakanana beng ba naga yeo, ka gobane ba lesitše go ba raka.
33Banafutali ba lesitše go raka ba Bethe-Semese le ba Bethe-Anathe, ba agišana le beng ba naga yeo; fela, ba Bethe-Semese e be e le bahlanka ba bona.
34Badani ke bona ba ba bego ba pitlaganyetšwa dithabeng ke Baamoro, ba sa ba dumelele go fologela molaleng. 35Baamoro ba ba ba kgona go aga dithabeng tša Herese, le kua Ajaloni le Saalabima; fela, moo seatla sa Bajosefa sa ba imela, ya ba bahlanka.
36Ge e le mollwane wa Baamoro o be o tloga mokonyeng wa Diphepheng, wa tla Sela o eya tletlolo.
Currently Selected:
BAAHLODI 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.
