DANIELE 3
3
Sadirake, Mesake, Abedinego
1Kgoši Nebukadinetsara o kile a dira seswantšho sa gauta; botelele bja sona sa ema sa dira meelo e masome a selelago; bophara ya ba meelo ye e selelago; a se emiša moeding wa Dura nageng ya Babele. 2Kgoši Nebukadinetsara a roma batseta ba phutha babušiši ba dilete, le bakgoma, le balaodi ba madira, le baahlodi, le balaki ba mahumo, le batsebi ba melao, le dikala, le matona a mošate, gore ba tle ba kgakole seswantšho seo kgoši Nebukadinetsara a se tsemilego. 3Ke moka gwa kgobokana babušiši ba dilete, le bakgoma, le balaodi ba madira, le baahlodi, le balaki ba mahumo, le batsebi ba melao, le dikala, le matona a mošate, ba tla go kgakola seswantšho seo kgoši Nebukadinetsara a se tsemilego; ba tla ba ema pele ga sona. 4Segoeledi sa goelela sa re: Hee lena ba ditšhaba le merafo le maleme, le laelwa gore, 5Ge le ekwa moletšo wa dinaka le maparapatla le diphalafala le phatolwa le makope le diletšo tša mehutahuta, le khuname ka matolo le rapele swantšho seo sa gauta se kgoši Nebukadinetsara a se tsemilego. 6E a sa khunamego ka matolo a rapela, o tlo lahlelwa leubeng la mollo o tukago! 7Ya re ge go lla dinaka le maparapatla le diphalafala le phatolwa le makope le diletšo tša mehutahuta, ba ditšhaba le merafo le maleme bohle ba khunamela swantšho seo sa gauta se kgoši Nebukadinetsara a se tsemilego.
8Ba re ba sa dira tšeo, gwa tla banna ba Bakaladea, ba batamela ba bega Bajuda. 9Ba bolela le kgoši Nebukadinetsara ba re: A kgoši e phele go ya go ile! 10Ba re: Kgoši, o beile molao wa re: Ge go kwala moletšo wa dinaka le maparapatla le diphalafala le phatolwa le makope le diletšo tša mehutahuta, mang le mang a khuname a lotšhe seswantšho seo sa gauta. 11Wa re: E a sa khunamego a se lotšha, a lahlelwe leubeng la mollo. 12Bjale go na le banna ba Bajuda, bao o ba beilego ba buša dilete tša Babele; ke Sadirake le Mesake le Abedinego. Kgoši banna bao ga ba go seme selo, ga ba rapele medimo ya gago le seswantšho seo sa gauta se o se tsemilego, ga ba se khunamele.
13Nebukadinetsara a tuka bogale, a re Sadirake le Mesake le Abedinego ba tlišwe. Mme banna bao ba tlišwa pele ga gagwe. 14Nebukadinetsara a ba botšiša a re: Lena Sadirake le Mesake le Abedinego, a ke ka boomo ge le sa hlankele medimo ya ka, le sa lotšhe seswantšho seo sa gauta se ke se tsemilego? 15Bjale a e re ge go kwala moletšo wa dinaka le maparapatla le diphalafala le phatolwa le makope le diletšo tša mehutahuta, le khuname le lotšhe seswantšho se ke se dirilego; gona go tlo loka. Fela, ge le sa se khunamele, le tlo lahlelwa leubeng la mollo ka lona lebaka le. Re tlo bona ge go ka ba le modimo e a tlogo le namolela diatleng tša ka.
16Sadirake le Mesake le Abedinego ba fetola ba re: Ga se mo re ka hlwago re fetola selo tabeng ye. 17Ge go ka dirwa ka mokgwa woo, gona Modimo wa rena o na le maatla a go re phološa leubeng la mollo o tukago, le go re namolela seatleng sa gago. 18Le ge a ka lesa go re namolela, gona wena kgoši o fele o tseba gore medimo ya gago ga re e hlankele; seswantšho seo o se tsemilego, ga re se khunamele.
19Ya ba gona Nebukadinetsara a tlalwago ke pelo; Sadirake le Mesake le Abedinego ba bona a ba kgatholetše mahlo; a laela a re leuba le ubelwe le hubale, le fete la mehla e mengwe gašupa. 20A laela banna ba dikokoto mo go bahlabani, a re ba tleme Sadirake le Mesake le Abedinego, ba ba lahlele leubeng la mollo o tukago. 21Banna bao ba tlengwa ba le ka dikobo tša bona le diaparo ka moka tša bona, ba lahlelwa leubeng la mollo o tukago. 22Bjale, ka gobane taelo ya kgoši e le e thata, ba goteditše mollo leubeng gagolo, kgabo ya mollo ya bolaya banna bao ba lahlelago Sadirake le Mesake le Abedinego leubeng. 23Bona, boraro bja bona, Sadirake le Mesake le Abedinego, ba wela mollong wa leuba ba tlemilwe.
24Gomme kgoši Nebukadinetsara a napa a tšhoga, a tsoga ka pela, a botšiša matona a gagwe a re: A ga ke re ba re ba lahletšego mollong ba tlemilwe, e be e le banna ba bararo?
Ba fetola ba re: Kgoši, go bjalo.
25Kgoši ya re: Hleng ke bona banna ba bane ba itshepelela mollong ba sa tlengwa, mollo o sa ba dire selo! Mme wa bone yena e ke ke morwa wa medimo.
26Nebukadinetsara a batamela molomo wa leuba la mollo, a re: Hee Sadirake le Mesake le Abedinego, lena bahlanka ba Modimo yo godimodimo, tšwang moo, le tle mono! Sadirake le Mesake le Abedinego ba tšwa moo mollong. 27Babušiši le bakgoma le matona le dikala ba kgobokana, ba bona banna bao, ba hwetša mollo o sa ka wa ba dira selo mebeleng ya bona, le meriri ya dihlogo tša bona e sa tlaboga, le diaparo tša bona di sa diloga, le monkgo wa mollo o sa kwale go bona.
28Nebukadinetsara a bolela a re: A go retwe Modimo wa Sadirake le Mesake le Abedinego! O romile motseta wa gagwe a phološa bahlanka ba gagwe ba ba botilego yena, ba gana go hlankela modimo o šele le go o khunamela, ge e se Modimo wa bona.
29Bjale molao wa ka šo; Ditšhabeng ka moka, le merafong ka moka, le malemeng ka moka, e a kago nyatša Modimo wa Sadirake le Mesake le Abedinego, o tlo kgabetlwa, ngwako wa gagwe wa dirwa sethobolo, ka gobane ga go modimo o mongwe o kgonago go phološa, ge e se yena.
30Ge e le Sadirake le Mesake le Abedinego kgoši Nebukadinetsara o ba dirile ba bagolo mo dileteng tša Babele.
Currently Selected:
DANIELE 3: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.