Matiu 19

Arave atane'zamofo naneke

(Mak 10:1-12)

1Jisasi ana naneke zmasmi vgareteno, Galili kumara atreno, Judia kaziga, Joda tina agatereno vu'ne. 2Tusi'a vahe krerfamo avaririza nevazageno, anantega zmazeri so'e huzmante'ne.

3Anante mago'a Farisi vahe'mo'za rehe'za kenaku Agrite e'za, mago'azama hanigeno'a amne nenarona ahenatigahie huno kasegemo'a hu'nefi? hu'za antahige'naze. 4Jisasi'a ke nona huno, tamagra hampritma onke'nazo, ese agafare'ma Anumzamo'ma vene, a'enema tro huneznanteno, 5amanage hu'ne, ama kegafare vemo'a nerera afana atreno, nenaro'ene hagerfino, ana tarega'moke eri mago hune, magoke znavufa manigaha'e. (Jen-Agf 2:24) 6Hanige'ne, mago'ane tare vahe omnigaha'e. Hagi magoke znavufa manigaha'e. E'ina hu'negu na'ano Anumzamo'ma eri hagerfima ante'nesia zana, mago ne'mo'a ovakanegahie. 7Hige'za Farisi vahe'mo'za Agriku anage hu'naze. Na'a higeno Mosese'a tagrikura huno, a'ma hunte avona kretma nemita hunteho hu'ne? 8Jisasi anage zamagriku hu'ne, Mose'a tmasmino a'netmia atregahaze hu'neana, na'ankure tmagri'ma tamarimpamo usasi ki'negu hu'ne. Hianagi Anumzamo pusanteti'ma agafa hu'neana amanahu kana omne'ne. 9Hagi menina tmagrikura amanage nehue, Aza'o nenaro'ma savri monko avu'ava #19:9 Adultry osu'nesigeno netreno ru a' erisimo'a, monko avu'ava hugahie. 10Agri amage nentaza disaipol nagamo'za anage hu'naze, amana ke'mo'ma arave hu'nea vene a'enenku'ma hu'nesiana, arave osuta amane manisnunkeno'a knare hugahie. 11Jisasi'a anage zamagriku hu'ne. Amama huntoa kea, hakaremo'a e'origahie. Hagi azano Anumzamo'ma ami'nenimo anara hugahie. 12Na'ankure kse zmantetegati zmufamo knare huozmante'nesamo'za arave osugahaze. Hagi mago'amo'za zmagonkna'za hari'naza vahe'mo'za arave avu'ava zana osugahaze, mago'amo'za arave osu'za mona kumaku nentahize. Inamo'ma ama rempima humiazama erisimofona atregeno erino.

Jisasi'a mofavre'zga asomu huzmante'nea naneke

(Mak 10:13-16, Luk 18:15-17)

13Anante neonse mofavre zimi zmavare'za aza anteno nunamu huzmantehogu Jisasinte e'naze. Hianagi Jisasi amage nentaza disaipol nagamo'za ke zmasu'za i'o huzmante'naze. 14Hianagi Jisasi'a huno, zmahe onatita zmatrenke'za ne'onse mofavre zga Nagrite eho, mona kumara e'ina hu vahe'mokizmi kumare, 15nehuno azana zmanunte anteteno zmatreno vu'ne.

Afufenone nehazave ne'mofo naneke

16Anante mago ne'mo Agrite eno amanage hu'ne, Rempi hurami ne'moka, inaknahu knare navunava hutena mani'vava nasimura erigahue? 17Jisasi anage huno ana ne'ku hu'ne, Na higenka na'amo knare hune hunka Nagrira eme nantahinegane? Agra magoketfamo knarera hu'ne. Hianagi kasimu erinaku'ma hanunka, tra ke amage'anto, 18higeno ina su'ane? Huno antahi'gegeno, Jisasi ke'nona huno, vahera ahe ofrio, monko zana osuo, kumzafa oso, havi nanekea osuo, 19antaka nfaka'mofo ra agi amio. Hagi kagra kvufa avesi antana'kna hunka tava'onkare nemanisimofona avesinto. 20Ana nehazave ne'mo, anage hu'ne, nagra nagu'areti ana miko tra kea amage'nentoe, hagi inaza nagra nosue? 21Jisasi agriku anage hu'ne, Kagrama fatgo hugahuema hanunka, vunka zgore afufenonka'a ome atrenka, ana zgoa erinka zmunte omne vahe ome nezminka, hagi kagra monafinka feno eri santi haregahane. Hutenka Nagrira eme namage anto. 22Hianagi ana nehza'moma ananke nentahino'a, tusi'a asuzampi vu'ne. Na'ankure agra tusi'a afufeno ante'negu anara hu'ne.

23Jisasi'a amage'ma nentea disaipol nagara anage huno zmasamine, Tamage hu'na neramasmue, afufeno ne'mo mona kumate vunaku haniana, tusi amuho huntegahie. 24Mago'ene Nagra nehue, kemolimofona amuho huontenkeno nekzamofo kampintira frenkro huramigahie. Hagi feno ne'mo'ma Anumzamofo kumapi vuku'ma haniana, tusi'a amuho huntegahie. 25Amage nentaza disaipol nagamo'za, ana kema nentahiza, tusi antri hu'za zmagogogu nehu'za anage hu'naze. Hagi aza knare huno agura vazisigeno manigahie hu'naze. 26Hzageno Jisasi'a ana mokizmi nezmageno amanage hu'ne, Vahe'mo'a osugahie, hagi Anumzamo'a mika'zana amne hugahie.

27Pita'a amanage agriku hu'ne, hagi kmago. Hakare zanti atreta Kagri kamage nentone! Tagra naza erigahune? Higeno, 28Jisasi amanage huno zmasmi'ne, Tamage hu'na neramasmue. Miko zama azeri ksefa'ma hania knarera, Vahe'mofo mofavremo'ma, Agri'a msanentake tra'are umnisigenka, tamagra ma namage'ma nentamotma tamagra nena 12fu'a kini trate umani'neta, 12fu'a Israeli naga nofira refako huzmantegahaze. 29Hagi azago, nonka'o, kafuhe'mofono, ksarahehe mofono, negafano, negrerano, mofavre'kao, hoza'ka'ama Nagri'kuma hunka atresamoka, 100ti'a rugaterenka ama knafina enerinka, henka esia knafina manivava kasimu erigahane. 30Hu'neanagi hakare ugagota huna'mo'za ehenka hanageno, ehenka hu'namo'za vugagota hugahaze.

Currently Selected:

Matiu 19: kbq

Highlight

Copy