Joni 8

Vere a'mo ru vene vase'nea naneke

1Hianagi Jisasi'a Olivi Agonare vu'ne. 2Nanterame otino Agra ra mono kumapi eteno ege'za, maka vahe'mo'za Agrite ageno, Agra tamumnino agafa huno rempi huzami'ne. 3Kasegere ugagota hu'naza vahe'mo'zane, Farisi vahe'mo'za ru vene monko'za hu'nea a' avare'za, ana nomofo amu'nompi eme azeri oti'za, 4zamagra anage hu'za Jisasina asmi'naze, Hurami ne'moka, ama a'mo'a monko'za nehigeta keta eri fore hu'none. 5Mosese kasegemo'a huramino, monko'za hu'nesia a'nea, have knonu ahe friho hu'ne. Hagi Kagra na'ane hunka hugahane? 6Zamagra anagema hu'nazana Jisasi revatga hu'za naneke huntenaku, kema huntesaza agafa'a keza eri fore hunaku hu'naze. Hianagi Jisasi kepri huno azankonu mopare avon kre'ne. 7Hianagi zamagra kazigzi hu'za antahi'negageno, Jisasi otino amanage huno zamagrira zamasmi'ne, aza'o amu'nontamifi'ma kumi'a omne'nenimo, pusantera havea erino aheno. 8Ete pri huno mago'ane azankonu mopare avon kre'ne. 9Ana naneke zamagra nentahi'za, esera ranra vahe atirami'za nevzageno, ana amage'a magoke magoke'mo'za atirami'za vutere hu'za vuhna hzageno, Jisasi'ene ana a' ene znagrake anampina mani'na'e. 10Jisasi'a otino anage huno ana ara asmi'ne, kaheku'ma haza vahera iga vaze? Magora iza ke naneke hugantegahie? 11Ana a'mo anage hu'ne, Ramoka mago'mo nanekea hunonante, anante Jisasi'a huno nagranena nanekea huogantegahue. Kagra nevunka, menintetira agafa hunka mago'ene kumira osuo.]

Jisasi'a mopafi vahe'mokizmi msa'zimi mani'nea naneke

12Anante Jisasi'a mago'ene anage huno zamasmi'ne, Nagra'ni'a ama mopamofo Msa mani'noe, aza'o namge'ma esimo'a hanimpina vano osugahie. Hianagi asimu eri Msa erigahie. 13Nehigeno Farisi vahe'mo'za anage hu'za asmi'naze, Kagrama kema nehanana, Kagra kagenke huama nehane, Kagrama huama nehanana tamagea nosane. 14Jisasi'a anankemofo nona'a amanage huno zamasmi'ne, e'ima Nagrama ke huama Nagragu'ma nehuana, Nagri nanekemo'a tamage, na'ankure Nagra igati e'na, ete'na iga vugahuo, Nagra antahi'noe, hianagi Nagra igati e'na, iga Nagra vugahuo tamagra ontahi'naze. 15Amega zamuzmate tamagra vahera refko nehaze, Nagra mago vahera menina refko nosue. 16Hianagi Nagrama mago'mofo refko huntegahue hanuana, Nagrama troma hanua antahi'zamo'a fatgo hugahie, na'ankure Nagrakera refko nosue, hianagi Nagrane hunantege'na e'noa Nenfa ene refko nehu'e. 17Tamagri kasegefina anage huno krente'ne, tare vahe tremoke ke'ne'na'a zankuma (witnes) hana'ana tamage. (Diu-Kas 17:6, 19:15) 18Nagra tamage ke huama Nagrani'agu nehugeno, hunantegena e'noa Nenfa'a Nagriku tamage huno huama nehie. 19Zamagra amanage hu'za asmi'naze, Negfa'a iga mani'ne? Jisasi'a kenona'a zamasmi'ne, Nagri'ma onage nesnutma Nenfana antahita keta osugahaze, hagi tamagra ma Nagri'ma nage'anke resuta, anahu kna hutma Nenfana kegahaze. 20Ama nanekema hu'neana ra mono nompi zgoma nentazare mani'neno, Jisasi'a rempi hunezmige'za mago'mo'a aze'ori'ne, na'ankure Agri kna'a ome'ne.

Vahe'mo'za Jisasima vanirega ovugahaze hu'nea naneke

21Anante ete mago'ene anage huno zamasmi'ne, Nagra tmatre'na vnugeta Nagrikura hakregahaze, tamagra kumi tmifi frigahaze, Nagrama vnurega tamagra ovugosaze. 22Jiu kva vahe'mo'za anage hu'naze, agrazante ahe fri'naku nehifi, Agra huno Nagrama vanurega, tamagra ovugahaze hunoma nehiana? 23Jisasi anage huno zamasmi'ne, tamagra amafinti vahe mani'naze, Nagra anagamutire, tamagra ama mopafi vahe mani'naze, Nagra ama mopafi vahera omni'noe. 24E'ina hu'negu, kumi'tamifi tamagra frigahaze hu'na Nagra neramasmue, na'ankure tamagra ma ama kema nehia Nera ama'ne, hutma tamentintima osnazana, tamagra kumi tamifi frigahaze. (Ekso-Uti 3:14, Jon 8:28, 8:58, 13:19, 18:5-8) 25Zamagra anage hu'za Jisasina asmi'naze, Kagra izage? Jisasi'a anage huno zamasmi'ne, na'ane hu'na ese agafarera Nagra tmasami'noe? 26Nagra rama'a zanku keaga nehu'na tamagrira refko hurmante'naku nehue. Hianagi hunantege'na e'nomo'a tamage Nere, Agripinti antahi'noa ke, Nagra ama mopafi vahera nezmasmue. 27Nefanku Agra nehige'za zamagra antahi ama osu'naze. 28Jisasi'a anage hu'ne, tamagrama Vahe'mofo Mofavrema azeri sgama hanutma, tamagra antahi ankeretma Agra ama ana Nere hugahaze, Nagra'ni'a nagesafintira nosuanki, Nenfa'ma rempi hunami'nea ke'age nehue. 29Anumzamo hunantege'na e'nomo, Nagrane nemnie, Agra natrege'na Nagrakera nomanue. Na'ankure Nagrama, Agri avesizama huvava huazankura, Agra muse nehie. 30Anagema nehige'za rama'a vahe'mo'za Agrite zamentinti hu'naze.

Abrahamu mofavre zgane, Sata mofavremokizmi naneke

31Jisasi'a, Jiu vahe zamentinti hu'namokizmia amanage huno zamasmi'ne, Nanekeni'a miko knama erizafa huvava hanuta, tamagra Nagri namage ante disaipol naga manigahaze. 32Ana nehutma tamagra tamage naneke antahisnageno, ana tamage nanekemo katufe tmantegahie. 33Zamagra kenona'a anage hu'naze, tagra Abrahamu agehete, magore huta mago netera kazokzo eri'zana e'ori'none, Kagra nahigenka katufe tmantesageta amne vugahaze hunka nehane?

34Jisasi'a anage huno zamasmi'ne, tamagerafa hu'na tamagrira nermasmue, maka kumi'ma nehza vahe'mo'za kumi'mofo kazokzo vahe mani'naze. 35Kazokzo vahe'mo'a nompina manivava nosie, hanki mofavremoke nompina manivava nehie. 36E'inahigu Nemofo'ma katufe tmantena knare hutma mani so'e hugahaze. 37Nagra antahi'noe, tamagra Abrahamu ageheta mani'nazanagi' Nagri nahe frinaku kanku nehakaze, na'ankure Nagri nanekemo'a tamagri tamagu'afina omne'ne. 38Nagrama kema nehuana, Nenfa'ene mani'nena ke'noa zanku neramasmue, tamagrama nehazana neramafampinti'ma antahinazaza nehaze.

39Zamagra kenona'a Jisasina anage hu'za asmi'naze, Abrahamu'a tagri nerfa'e, Jisasi'a anage huno zamasmi'ne, a'o, tamagra ma Abrahamu mofavrema mani'nenutma Abrahamu hu'nesia avu'ava hugahaze. 40Nagra tamage naneke Anumza'mofompinti antahi'noa ke neramasmue, hianagi Nagrira nahe'za nehaze. Abrahamu'a e'inahura osu'neaza tamagra hunaku nehaze. 41Tamagra neramafa avesiza nehaze. Zamagra kenona'a anage hu'naze, tagra savri avu'avatetira fore osu'none, tagrira magoke Nerfa, Anumzana Agrake mani'ne. 42Jisasi'a anage huno zamagrira zamasmi'ne, Anumzamo'ma tmagri nerfa'ma mani'neasiana, tamagra Nagrira navesi nantasine, na'ankure Nagra efore hu'noana, Anumzamo hunantege'na e'noe. Nagrani'a navesitera ome'noe, hagi Anumzamo hunantege'na e'noe. 43Nahigeta kema hua nanekea antahi amara nosaze? Na'ankure Nagrama hua nanekea antahi ama nosazagu, ana nehaze. 44Tamagra Sata mofavre naga mani'naze, ana hunetma nermafa'ma avenesia avu'avaza nehaze. Ese agafare vahe ahe fri'nea ne' mani'neno, tamage nanekemofona amage nonte. Na'ankure tamage kea agripina omne'ne. Kema hifina, havigege nehie, agra avu'ava zanku kea nehie. Na'ankure havige ne' mani'neno, havigemofo nefa'e. 45Hianagi na'ankure Nagra tamage nehugetma, tamagra nanekeni'arera tamentintia nosaze. 46Amama, mani'nafitira izaga Nagrikura kumi hu'ne hunka nanekea hunantegahane? Nagrama tamage nehusugetma, nahnigetma tamentintia osugahaze? 47Aza'o Anumzamofo naga mani'nenimo'a, Anumzamofo naneke nentahie, ama'na agafare tamagra nontahize. Na'ankure tamagra Anumzamofo nagara omni'naze.

48Jiu vahe'mo'za anage hu'za kenona'a asmi'naze, hufatgo huta negasmune, Kagra Sameria vahe mani'nankeno hankromo kagu'afi fre'nefi? 49Jisasi'a anage huno kenona hu'ne, Nagrira nagu'afina hankrora omni'ne, hianagi Nagra Nenfa ra agi nemugetma, tamagra Nagrira nazeri fenka nenatra'ze. 50Nagra ra nagi erinakura nosuanki, Anumzamo Nagri nagi'a eri ra nehuno, naneketi refko hurantegahie. 51Tamagerfa hu'na neramasmue, Keni'a nentahimo'a, agra ofrigahie. 52Jiu vahe'mo'za Jisasinku anage hu'za asami'naze, menina tagra antahi'none, hankromo kagu'afi mani'ne. Abrahamu'a fri'negeno, kasnampa vahe'mo'zanena anazanke hu'za fri'nazagenka, Kagra anage nehane, iza'o nanekeni'a avariri simo'a, agra ofrigahie hunka nehane. 53Abrahamu nerfa'a ko fri'neanki, Kagra agtere'nano? Kasnampa vahera ko fri'nazanki! Kagra kagesa antahinana aza'ne hunka nehane? 54Jisasi'a anage huno zamasmine, Nagra nagi erira hanuana, ana Nagimo'a amnezasegahie. Hianagi Nenfa'a Nagri nagi erira nehigeta, Agrikura tamagra hutma, Agra, tagri Anumzane nehaze. 55Tamagra Agrira antahinomize, hianagi Nagra antahi'na ke'na Agrira hu'noe, hankina Nagrama hu'na, Agrira antahi'na kena osu'noe hanuana, havige hu'na tmagrikna hugahue, hianagi Nagra Anumzamofona antahina kena hu'nena, ke'a erizafa nehue. 56Neramafa Abrahamu'a Nagri kna kenaku muse nehuno, keteno tusi'a muse hu'ne. 57Jiu vahe'mo'za Jisasinku anage hu'naze, Kagra 50'a kafuzge osu'nane, Kagra Abrahamuna ke'nano? 58Jisasi'a anage huno zamasmi'ne, tamagerafa hu'na neramasmue, korapa Abrahamuna kse onte'nage'na, Nagra mani'noane. 59E'inagema hiazanku have eri'za mate vuza ahe'za hu'naze. Hianagi Jisasi'a ra mono nompinti (tempol) oku'a atiramino fegi'a vu'ne.

Currently Selected:

Joni 8: kbq

Highlight

Copy