Madiu 9
9
Yesu tovefela gisiveyawana.
Maki 2:1-12; Luke 5:17-26
1Tu Yesu wakeya giyage tobu yuwa fafaline giyewana, ada Tauna yana melala againe giyemu. 2#Lu 7:48-49Mededei kaliva sa'eyana walogina gi'a'uwana-ma gimiyami. Kaliva tufoidi bana kaliva ana iviya gidauda-ma Yesu againe hi'aliyena. Ada Yesu yadi vetumagana gi'ita-yo tovefela againe gigahe gigayo, “Natuku, keke unamatauta, au ya koyona ahe gayawelidi.”
3Hidedemi gigahe-yo au Mosese yana vehimeya ana tovehawala tufoidi nuwahinagediya higahegahe higayo, “Hida hima kaliva Yaubada gihawatagona. Yaubada anakaibe koyona adi to'aiyawela.”
4Tu Yesu yadi nuwanuwa a gihalamanena fa'ina gigahedi gigayo, “Gavadi-yo hidedemi nuwanuwa koyona ase'asemiya gidadauda? 5Gavaimi tovefela againe ganagahe-yo ginalakayemu? Ka'i ganagayo, Ya koyona ahe gayawelidi, o ka'i ganagayo, Umidi be unaudadana. Hadema vehimeya vita-mo'ena? Me kaliva ana siveyawa vaita vita-mo'ena, fa'ina ka'i ganavehimeya tu keke ginayamumu, au taumiyao amifaiweya wana'itahalamanena kaliva adi siveyawa keke akufaiweya. 6#Yo 17:2, 5:8Tu hida kaliva ganasiveyawana be wana'itani-yo Iya fa'ikuya wanagahe wanagayo, Velemodi. Bana Tohobu'ela ana wavehimeya be babiya kaliva yadi koyona adi aiyawela ana tagalowalowa.” Ada au tovefela againe gigahe gigayo, “Umidi, a ivi uwahi be una ya manuweya.” 7Au tovefela gimidi be gina yana manuweya. 8Ada yo'o hi'ita-yo himatamatauta tu Yaubada ana egana hikilakahina higayo, “Taumadi! Yaubada hida abavehimeya lakahina, higa koyona ana aba'aiyawela, tomiyababi giveledi.”
Yesu Madiu gikovana be Bana againe ginavetomuliya.
Maki 2:13-17; Luke 5:27-32
9Tu Yesu gilowoga ada ginauna tu takesi ana toyaudi sa'eyana gi'itana, ana egana Madiu. Bana takesi ana abayaudi againe gihiyoto. Ada gi'ita-yo gigahena gigayo, “Unamuliyeku.” Au bana Madiu gimidi be gimuliyena.
10Muliya Madiu yana manuweya Yesu giluku be gina'a. Ada tolameya gi'au'a tu takesi ana toyaudi moya'aidi kadu tokoyona velugadiyao hi'ela, ada Yesu kadu ana tomuliya buye hi'enolukekela tu hi'au'a. 11#Lu 15:2, 19:7Tu tonagona tafatafalolodiyao adi egana Falisi tufoidi hi'itadi-yo au ana tomuliya agaidiya higahe higayo, “Gavai'ona-yo yami tovehawala wama kaliva koyodiyao takesi ana toyaudi kadu tokoyona velugadiyao buye hi'a'au'a?”
12Bana Yesu yadi gahe ginogalina ada yadi dewa fa'ina gigahedi gigayo, “Badi yadi aulolo keke ma keke doketa againe hinana tu to'aulolo ma nuwanuwadi doketa yana leme. 13#Md 12:7; 1Ti 1:15Tu omi'iyao ma wanana Yaubada bonana sa'eyana ana nuwanuwa wanalelena be wanahalamanena higa gigayo, Keke nuwanuwaku kevakeva wanamunudi-yo abaveyao wanafaisewani, keke. Au Iya nuwanuwaku kaliva wanahinekalikaliyedi. Au hidemi Yaubada bonana. Ada toyamumu keke doketa yana leme hinaleleni amine, meda anafaiweya Iya gahobu'ela be keke toyamumu vehimeya hi'ita'itave'avina-ma ganakovadi. Au gahobu'ela tokoyona ganakovadi be yaku leme againe hinahagaviladi fa'ina.”
Labewaviyo fa'ina Yesu hitoliluveluvena.
Maki 2:18-20; Luke 5:33-35
14 #
Lu 18:11-12
Himiyami tu Yoni Tobafitaiso ana tomuliya Yesu againe hi'ela hitoliluvaluva higayo, “Gavana fa'ina ime'eyao kadu badi Falisi alabelabewaviyo be anave'o'ola fa'ina tu a tomuliya keke tamo tova hidalabelabewaviyo?”
15 #
Yo 3:29
Yesu gigahedi gigayo, “Nagi ana avemwamwala againe tonagi ana yo'o keke hinamiya-kawowo, au a'a hina'au'a, fa'ina bana tonagi aimo badi buye himimiyami. Tu aimo tonagi hinanauwena lauveya ana toveya, au medema tovai-nadi ana yo'o hinamiya-kawowo, a'a keke hina'ani. Meda anafaiweya Iya yaku kaliva buye amimiyami fa'ina keke hidalabelabewaviyo.” Au hidedemi Yesu gigahedi.
Dewa tuwaina kadu dewa ivaguna keke gidalubodada be kanave'atutamo'aini.
Maki 2:21-22; Luke 5:36-39
16 #
1Ko 10:21; 2Ko 6:16 Kadu Yesu gigayo, “Keke tamo hakwadi aikeva tuwaina kaleko ivaguna aimo keke gufeya gidakola-yo gidakabi'o-ma againe ginabwadini. Ka'i hidede amine ginabwadina, aikeva ana bwadi gina'akaninina, ada au kaliva ana aikeva ginakoyo-mo'a. 17Kadu anafaiweya keke tamo hakwadi oine ivaguna manugose kwafilidi tuwaina agaidiya ginahiwani. Ka'i hidede amine gidahiwana digo, oine ivaguna gidatubuga be kwafilidi tuwaina ahe gikwakwana-ma gida'afolena, ada au oine babiya gidamadu-'owoga kadu kwafilidi gidakoyo. Au oine ivaguna kwafilidi ivaguna agaidiya hihiwana, ada au oine ginadauda yamumuna kadu kwafilidi keke ginakoyo.” Au hidedemi Yesu gigahetalahobuhobu.
Tonagona natuna kwamayoku kahihina kadu kwamayoku
Yesu ana kaleko bwatana gikibwa'ena-ma kahihina.
Maki 5:21-43; Luke 8:40-56
18Yesu aimo gilulukahihi tu tonagona sa'eyana gi'ela Bana agene tugana give'etodonena ada gigahena gigayo, “Adamoya natuku kwamayoku yawaina a gihavaina, tu uda'ela nima bana againe udasena be yawaina gidatune-havagilena.” 19Au Yesu gitowamidi be givebwa'uliyena, ada ana tomuliya buye hina.
20 #
Md 14:36
Tu ginauna tu kwamayoku sa'eyana Yesu muline gi'ela digo ana kaleko bwatana gikibwa'ena. Bana yana vaikohi be dayagina tova moya'aina gimadu-vagata. Tuwaina givebutu gi'u'aulolo ada ginunauwena malamala tuwelo. 21Au bana gi'ela gikibwa'ena fa'ina nuwahinagene gigahe gigayo, “Ka'i ana kaleko bwatana ganakibwa'ena amine o ganayamumu.” 22#Mk 10:52; Lu 17:19Gikibwa'eni-yo Yesu gihagavilana be gi'itana ada gigahena gigayo, “Natuku keke unamatauta. Uvetumaganeku fa'ina ubwaina.” Ada auhe'ama kwamayoku giyamumu.
23Kadu ginauna tu tonagona yana manuweya giyemu-yo, alika ana butubutu ginogalina, yo'o hive'alulaukuhi kadu tovekulele kwamana ali'alikana ana aitauna fa'ina yadi kulele hiyuveyuvena. 24#Yo 11:11Ada Yesu gi'itadi-yo gigahedi gigayo, “Moya'aimi wana. Kwamana keke gida'alika, au gi'enonuwaulu.” Tu badi hivelaigena. 25Au Yesu yo'o giwavidi be hihobu tu Bana giluku vetawaneya, kwamana nimane gi'abina ada au gimidi. 26Ada kwamana yana mididi-havagi valeyana medema fafali matatabuna againe ginauna.
Yesu tomatakoyo adi'iselu gisiveyawadi.
27 #
Md 1:1
Tu Yesu gilowoga ada ginauna tu tomatakoyo adi'iselu hivebutu himuliyena, ada hikova'awafatafata higayo, “Devida bwanenena O Yaubada yana Tovegida, unahinekalikaliyema.”
28Ada Yesu manuwa hinagene giluku-yo tomatakoyo adi'iselu Bana againe hi'ela, ada gitoliluveluvedi gigayo, “Iya akufaiweya ganasiveyawami ma ka'i velemo'ena wavetumaganena?”
Ada badi higayo, “Ika Kauveya.”
29 #
Md 8:13, 15:28 Au Yesu matadi gikibwa'ena gigahedi gigayo, “Omi wavetumaganeku amine, yami yamumu wananuhagana.” 30Yesu gigahe-yo matadi gi'aleleyena. Ada gigahedonedi gigayo, “Yami yamumu inubana keke tamo hakwadi againe wanalukahihiyeni.” 31Tu badi adi'iselu hilowoga ada kaliva moya'aidi agaidiya hilukahihiyena, ada au Yesu valeyana medema fafali againe ginauna.
Yesu kaliva awana gi'abodana-ma gikiveyamumuna.
32 #
Md 12:22
Badi kaliva adi'iselu hinauna tu kaliva sa'eyana Yesu againe hi'aliyena. Bana yafune giluvaiyena fa'ina, awana gi'abodana. 33Ada Yesu yafune giwavi-yo kaliva awana gila'ana be givebutu gilukahihi. Au moya'aidi hiyaulowoga higayo, “Keke tamo gavadi hidede amine boi hidedei Isileli againe gidalakayemu.”
34 #
Md 12:24; Mk 3:22 Tu badi Falisi higayo, “Bana yafune yadi tovehimeya faiwala givelena be anafaiweya yafune ginawavidi.”
Yesu kaliva vevine moya'aidi gihinekalikaliyedi.
35Tu Yesu melala lakahidi kadu kabi'odi moya'aidi agaidiya ginuwaliliuga, ada yadi manuwa-abavehawala ana egana sinagogi agaidiya givehavehawala, Venuwa'ata Yamumuna Yaubada yana yo'o ana luku fa'ina gilulumamalena, kadu to'aulolo moya'aidi yadi aulolo tulina tulina ma gisisiveyawadi. 36#Md 14:14; Mk 6:34Ada yo'o gi'itadi againe gihinekalikaliyedi, fa'ina sifi adi to'itave'avina keke amanadi yadi nuwanuwa amine, meda badi yadi nuwanuwa gifani kadu higakowakowa. 37#Lu 10:2; Yo 4:35Hidedemi gi'itadi fa'ina ana tomuliya gigahedi gigayo, “A'a moya'aina faha againe giboyalina, higa kaliva nuwadi ahe giludigadigaga be hinavetumaganeku, tu toyaudi higa tolaumamala keke moya'aidi. 38Hidema fa'ina faha ana Tovehimeya againe wanave'o'ola be yana tolaumamala gina'iveninisedi ada kibababala ana eda hinavehawaledi.”
Currently Selected:
Madiu 9: viv
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.