Madiu 28

Yesu gimididi-havagi.

Maki 16:1-8; Luke 24:1-12; Yoni 20:1-10

1Tu sabati higa Satadei a hihegena mala givebutu gilaulauna tafalolo, Meli vineMagidala wagakoyona buye hina be tomohuyahuya hina'itana. 2Ada auhe'ama babi gili'uli'u lakahina, au Kaiwabu yana tovenuwa'ata lobameya gihobu'ela kabala give'awawana be tabone gihiyoto. 3Ana ita'ita vaita nama amine, ana vaigau kwayakwaya-mo'ena vaita howahowa amine. 4Tolugaviya tomohuyahuya hi'ita'itave'avina-ma tovenuwa'ata fa'ina himatautave'ine hivetatava au hibe'u vaita hida'alika.

5Tu lobama ana tovenuwa'ata vevine agaidiya gigahe gigayo, “Keke wanamatauta. A gahalamanena Yesu hikivekelosena-ma walelelena. 6#Md 16:21Bana keke hidedei gidamiyami, au gimididi-havagi boi gigaheyena amine. Wa'ela be abaga gidauda-ma wa'ita. 7#Md 26:32Wana'itani-yo wanamaduna ana tomuliya wanagahedi wanagayo, Yesu alikeya ahe gimididi-havagi ada Galili againe wai ginagona, yuwadedei wana'itana. Wanogali, ahe gavenuwa'atami.”

8Au tomohuyehuyeya himadulowoga yadi wamatauta tu kadu yadi wavemwamwala keke kabisona. Himadu be Yesu ana tomuliya hinagahedi. 9Hinauna tu auhe'ama Yesu gimaduhagadi be gilusiuleyedi. Au Bana againe hi'ela hi'ibo'ula-mo'a, agena hi'abina be hidavadavana. 10#Hi 2:11Tu Yesu gigayo, “Keke wanamatauta. Wanana be tobohiyakweyao wanagahedi hinana Galili againe hina'itaku.”

Tolugaviya abaveyao ana tofaisewa kikaiwabudiyao

hivenuwa'atadi.

11Badi vevine hinauna tu tolugaviya tomohuyahuya hi'ita'itave'avina-ma tufoidi hilowoga melala-mo'ena againe hiluku be gaitoma moya'aina gilakayemu-ma abaveyao ana tofaisewa kikaiwabudiyao agaidiya hilukahihiyena. 12Au abaveyao ana tofaisewa kikaiwabudiyao kadu kaliva lakahidiyao buye hivaga'auta be hivevai. Buye hive'anuwanuwa-yo mani lakahina tolugaviya hiveledi be higa awadi hinave'ibodana. 13#Md 27:64Higayo, “Kaliva wanagahedi vaita ana tomuliya bogi againe hida'ela wowona hidaki'afuni aimo omi wadauda-tu. 14Tu ka'i tovehimeya kwanaLoma hidedemi ginanogalina be ginanuwakoyoyemi, ime nuwana ana'iveyamumuna be keke vita ginalakayemu agaimiya.” 15Au tolugaviya mani hivaina ada hivehimeyedi amine hihuluva. Ada au Yesu wowona ana kai'afu kahihi-nadi miYuda hivebutu hilukahihiyena be hinunauwena tova adamoya.

Yesu vehawala ana vehimeya ana tomuliya giveledi.

Maki 16:14-18; Luke 24:36-49; Yoni 20:19-23; Afositolo 1:6-8

16Tu tomuliya ileveni Galili againe hina oyai-nadi boi Yesu giyakahina-ma againe hilaka. 17Hiyemu tu Yesu hi'itana againe hi'ibo'ula-mo'a be hidavadavana tu tufoidi ase'asedi gi'amalakibo. 18#Md 11:27; Yo 13:3; Ef 1:21-22Au Yesu lilidiya gi'ela gigahedi gigayo, “Abavehimeya moya'aina lobameya kadu babiya Kamaku givele-'owoku. 19#Af 1:8Abavehimeya hidede amine giveleku fa'ina, wanana yo'o fafali moya'aina agaidiya wanavehawaledi be hinavetomuliya. Wanakivebafitaisoyedi Tamada ana eganeya Natuna ana eganeya Alu'aluwa Mahalina ana eganeya. 20#Yo 14:23; Hi 13:8Wanavehavehawaledi be vehimeya moya'aina gavelemi-ma hina'itave'avina. Ada wanogali! Tova moya'aina Iya omi buye kanamiyami tova ana lauyabu maka.” Hidede amine Yesu ana tomuliya givenuwa'atadi.

Currently Selected:

Madiu 28: viv

Highlight

Copy