Yoni 15

Yesu ai veguveguwana velemo'ena.

1Kadu Yesu gilukahihi gigayo, “Iya'eku ai veguveguwaku velemo'ena, ada Bana Kamaku ai ana to'itave'avina. 2Kaliva hivetuvetumaganeku-ma badi laganiku. Hai kaliva keke yaku nuwanuwa amine hinahuluva, medema vaita laganiku keke gidayoyo, ada au medema Kamaku ginakuyadi be ginahegedi. Tu hai kaliva yaku nuwanuwa amine hihuluhuluva, medema vaita laganiku yoyoyona, ada au Kamaku yogo badi agaidiya ginavaihegena be hinayoyo guwadi moya'aina. 3Tu omi'iyao ma bonaku galumamalena-ma ahe wavetumaganena fa'ina, ahe wayegayega yogomi keke. 4Au Iya agaikuya wanamiyamiyave'avina, kadu omi agaimiya ganamiyave'avina. Ka'i aiguwa laganina keke ai-mo'ena againe ginamiyave'avina digo, keke anafaiweya ginayoyo. Meda anafaiweya omi'iyao, ka'i keke Iya agaikuya wanamiyave'avina, kadu keke amifaiweya yaku nuwanuwa amine wanahuluva.

5 # Yo 15:16 E, Iya'eku ai veguveguwaku tu omi'iyao laganiku. Hakwadi o Iya agaikuya umiyamiyave'avina kadu againiya Iya ganamiyave'avina, au unayoyoyo lakahina. Ka'i o akaibe tu keke Iya o'eni buye, kadu keke tamo huluva hagihagina afaiweya. 6Ka'i hakwadi o Iya agaikuya keke unamiyave'avina, aiguwa laganina koyona hihegena be gibou amine, meda Kamaku o ginahege. Ada au laganina koyona hihegena tu tamo hakwadi yana ai fa'ina gikwakwana ada gi'alahina. 7#Yo 14:13Tu ka'i omi Iya agaikuya wanamiyave'avina ada bonaku ase'asemiya ginadauda tova moya'aina amine o, gavadi fa'ina nuwanuwami wanave'o'ola, au wanave'o'ola be velemo'ena wananuhagana. 8#Md 5:16Ka'i wanayoyo lakahina higa Yaubada yana nuwanuwa amine wanahuluhuluva tova moya'aina, au kaliva Kamaku ana egana hinakilakahina kadu hina'itami hinagayo, Wa'ita, wona velemona badi'iyao Yesu ana tomuliya.

Yesu vehimeya gisena taudeyao agaideya

kanave'ahawahawahega.

9Tu Kamaku nuwanuwana Iya'eku amine, meda Iya nuwanuwaku omi'iyao. Iya agaikuya wanamiyamiyave'avina be yaku nuwanuwa omi agaimiya gaseusena-ma wana'aya'ayaunena tova moya'aina. 10#1Yn 2:5Kamaku yana vehimeya gadibudibumuhigena, ada au yana nuwanuwa Iya agaikuya ga'aya'ayaunena tova moya'aina. Meda anafaiweya ka'i yaku vehimeya omi wanadibudibumuhigena amine o, yaku nuwanuwa omi agaimiya wana'aya'ayaunena tova moya'aina. 11#Yo 17:13Au hidede amine gagahemi be Iya gavemwamwala amine, meda omi wanavemwamwala, higa wanavemwamwala-mo'a. 12#Yo 13:34Ada Iya omi fa'imiya gahawahegeku amine, kadu omi taumiyao agaimiya wanave'ahawahawahega. Au hidede amine Iya gavehimeyemi. 13#1Yn 3:16Ka'i kaliva tobohiyaneyao fa'idiya yawaina tauna ginanuhegena digo, bana velemo'ena nuwanuwana badi'iyao, au yana hawahega lakahi-mo'ena. 14Ada omi'iyao ma ka'i yaku vehimeya wanadibudibumuhigena digo, omi Iya tobohiyakweyao. 15Au wa'ita, bana agetoga gavaimi yana tovehimeya ginuwanuwa ma keke gidahalamaneni, fa'ina bana againe keke gidahawavemogataleni. Boi gavewagami agetoga tu tova adamoya gahawavetobohiyanemi, fa'ina nuwanuwa moya'aina Kamaku againe ganogalina-ma omi agaimiya gahawavemogatalena. 16#Yo 15:5, 16:23Omi keke wadavenuwadadaneku, keke. Au Iya gavenuwadadanemi gavegidemi be wanana wanayoyo be guwami ginaduva-vagata. Ada au gavadi aku eganeya Kamaku wanave'o'olena, medema ginavelemi. 17Gavehimeyemi hidede amine. Omi taumiyao agaimiya wanave'ahawahawahega.

Tomuliya agaidiya kaliva yadi venibaina Yesu gilukahihiyena.

18 # 1Yn 3:13 Tu ka'i badi kaliva Yaubada hikilowena-ma omi agaimiya hinavenibaina amine, au Iya wananuwa-nunauyeku wanagayo, Yada Kaiwabu babiya gimiyami ana toveya, badi Bana'e himidivenibainena. 19#Yo 17:14Ka'i omi tokilowa yadi yo'o kalivai-dina digo, badi taudiyao hive'anuwakabubu amine, kadu omi hidanuwakabubuyemi. Tu Iya gavenuwadadanemi be yaku yo'o agaidiya waluku fa'ina, omi keke badi tokilowa yadi yo'o kalivai-dina. Ada tokilowa hivenibainemi, fa'ina keke yadi yo'o agaidiya wadamiyami. 20#Yo 13:16Yaku gahe wananuwa-nunauyena gagayo, Agetoga yana tovehimeya keke gidakaiwabuhegeni. Iya yami tovehimeya hivekwageyeku fa'ina, kadu omi aku agetoga hinavekwageyemi. Ka'i yaku laumamala hidadibumuhigena digo, kadu yami laumamala hidadibumuhigena. 21#Yo 16:2-3Tu omi aku egana wavetumaganena fa'ina, hinakivekoyomi Iya galukahihiyena amine. Bana'e gi'iveniniseku-ma keke hidahalamaneni fa'ina, au hidedemi hinahuluvimi. 22Ka'i Iya keke gadahobu'ela tokilowa gadakivetuvetunudi digo, keke vita hidawahini. Au ahe gakivetuvetunudi tu bonaku keke hida'abini fa'ina adi wavita, keke adifaiweya hinagahe vaita badi fanifanidiyao. 23#Lu 10:16Gava kaliva Iya givenibaineku, medema kadu Kamaku givenibainena. 24Gugai fifiwaladi boi keke tamo hakwadi gidafaisewani-ma Iya badi matadiya gafaisewadi. Ka'i keke gugai-dina gadafaisewadi digo, kadu keke vita hidawahini, tu yaku gugai ahe hi'itana nonogana Iya hivenibaineku Kamaku buye'i, fa'ina badi adi wavita. 25#Sam 69:4Au hidede amine hivenibaineku be gahe sa'eyana yadi buki-vehimeya againe tuwaina gidadauda-ma velemo'ena ginalakayemu fa'ina gigayo,

Keke tamo yaku ihi tu hivenibaineku.

26 # Yo 14:26 Tu Bana Toveluga Kamaku againe gimimiyami-ma gana'iveninisena be ginahobu'ela, higa Alu'aluwa Mahalina ada Bana'e nuwanuwa velemo'ena inubana. Au Kamaku againe ginatauya ginahobu'ela be Iya fa'ikuya gina'awatalatalaina. 27#Af 5:30-32Kadu omi'iyao ma Iya fa'ikuya wana'awatalatalaina, fa'ina yaku faisewa ana abave'inuba againe buye kamimiyami be kanunauwena tova adamoya.” Au hidemi Yesu gigahe.

Currently Selected:

Yoni 15: viv

Highlight

Copy