Luke 3
3
Vujangi Non John Tamlohi Paptijo
(Mt 3.1-12; Mk 1.1-8; Jn 1.19-28)
1Na sangavulu r̃omana mo lima tauni, Tiberias Caesar, Supe nona mara Rome mo lo tauri na suiha, ale Pontius Pilate mo lo aulu hin Judea. Herod Antipas mo lo aulu hin Galilee, ale tasina Philip, mo lo kilau Ituraea peresi Trachonitis, ale Lisanias mo lo aulu hin Abilene, 2ale tataholo hin rani atu Annas peresi Caiaphas la lo pr̃is aulu, God mo sile na retisohai matea isan John natun Zechariah hin rani atu mo lo toho na jara tano koru. 3Ale John mo hahau r̃alihi na jara tari Jordan, ale mo vano mo lo retivujavujangi isana tamlohi vara la lavi na paptijo mata posi na hehe matan vara Moli i r̃omira. 4Sohen pr̃ovet Isaiah mo ulia mara,
‘Na jara hasetoho leon matea mo lo ulo mara:
Ha vasahi na malelen Moli God!
Ha tano na malelena i tataholo.
5God i pa tavuni na vakoa tari,
ale i pa mavalolohi na vutivuti tari la mai la tataholo i r̃uhu,
ale kolekole la pa tataholo,
ale malele morumoruha la pa tataholo,
6ale tamlohi tari la pa hite malele sei God i pa juri na tamlohi hinia.’ Isa 40.3-5
7Vao tamlohi la lo mai mata paptijo isan John, ale mo lo verea isara mara, “Kamim mata sasati! Hare mo retir̃oar̃oahai kamim vara ha rovo na talai lolokoru non God mata hehe sei mo lo mai? 8Ha namaha usuri na nomim posi na hehe. Ha sopo r̃omaulu vara, ‘Kamam kama juri matan tamamam Abraham!’, matan na verea tataholoi kamim hinia vara, God i er̃i vai la vatu nike la mai natun Abraham! 9Matan nakerihi, God mo lo ava na nona rita moiso mata wari. Matan, vipahai tari sei la sopo lavi na vuara r̃uhu, i pa tai jovjovira, ale i pa pulahira la vano na hapu.”
10Ale vao atu la usia isana lara, “Vara mo sohena, kama pa vai na sava?”
11John mo r̃aramira mara, “Vara nom ruru mo rua, o sile te hatea isan haratu mo sopo te nona ruru, ale haratu hana hinau mo matuvana, i vaia sohena.”
12Tamlohi mata lavi na takis sohena, la mai isana mata paptijo, la verea isana lara, “Tija, kamam kama pa vai na sava?”
13Ale mo verea isara mara, “Ha sopo lavi na mania i jeu na sava mo tataholo vara ha lavia.”
14Moiso, tamlohi vuro hai la usia lara, “Ale kamam, kama pa vai na sava?” Ale John mo verea isara mara, “Ha sopo vai na tamlohi la matahu mata lavi te mania isara, ha sopo tuvai na tamlohi na halu mata mania, ha avulahi na volimim.”
15Ale matan tamlohi la lo kilau moiso mata rani pala non nora Kr̃isto, enira mo isoiso la lo r̃omr̃omia na mapura lara korong, John enia pa Kr̃isto atu.
16Pani John mo r̃aramira mara, “Enau na lo paptijo hin kamim na wai purongo, pani tamlohi matea mo aulu jea hiniau mo lo mai, enau na sopo tataholo vara a uli nar̃ihi na asi eve palona. Enia i pa paptijo hin kamim na Tanume Tapu peresi na hapu. 17Mo lo tauri na nona foko tavera na limana vara i vasahi na nona jara ase na piri wit, ale matan vara i takonahi piri wit atu na nona pea, pani i pa suli na pahapaha piri wit na hapu sei tea i sopo er̃i vunia hin te rani.” 18Ale hin na reti tinatinapua matuvana John mo retir̃oar̃oahai na tamlohi, ale mo retivujavujangi na Retir̃uhu isara hinira.
19Ale hin pongi atu John mo retihoro Herod tamlohi aulu non Judea, mata nona vaivaileu peresi Herodias, naroun tasina, ale mata hina sasati tinatinapua tari sei Herod mo lo vaira, 20ale aulu hin la hina sati atu mo lo vaira, Herod mo tau John na ima r̃ilangi.
John Mo Paptijo Hin Iesu
(Mt 3.13-17; Mk 1.9-11)
21Pani hin pongi atu John mo sopo lo toho na ima r̃ilangi, tamlohi tari la lavi na paptijo, ale John mo paptijo hin Iesu. Ale Iesu mo pa lo usiusi, tuka mo maroi, 22ale Tanume Tapu mo sinai atano sohena vomahe matea, ale mo tau hinia; ale leon matea mo tai na tuka mara, “Engko Natuku r̃uhur̃uhu jea, enau na avulahi tavera jea hiniho.”
Pina Iesu Tuai
(Mt 1.1-17)
23Taunin Iesu mar̃iviti i ngavulu tolu (30) moiso mo pa tapulo na nona vavahinau.
Iesu la verea vara enia natun Joseph,
Joseph, enia natun Heli,
24Heli, enia natun Matthat,
Matthat, enia natun Levi,
Levi, enia natun Melchi,
Melchi, enia natun Jannai,
Jannai, enia natun Joseph,
25Joseph, enia natun Mattathias,
Mattathias, enia natun Amos,
Amos, enia natun Nahum,
Nahum, enia natun Esli,
Esli, enia natun Naggai,
26Naggai, enia natun Maath,
Maath, enia natun Mattathias,
Mattathias, enia natun Semein,
Semein, enia natun Josech,
Josech, enia natun Joda,
27Joda, enia natun Joanan,
Joanan, enia natun Rhesa,
Rhesa, enia natun Zerabbabel,
Zerabbabel, enia natun Shealtiel,
Shealtiel, enia natun Neri,
28Neri, enia natun Melchi,
Melchi, enia natun Addi,
Addi, enia natun Cosam,
Cosam, enia natun Elmadam,
Elmadam, enia natun Er,
29Er, enia natun Joshua,
Joshua, enia natun Eliezer,
Eliezer, enia natun Jorim,
Jorim, enia natun Matthat,
Matthat, enia natun Levi,
30Levi, enia natun Simeon,
Simeon, enia natun Judah,
Judah, enia natun Joseph,
Joseph, enia natun Jonam,
Jonam, enia natun Eliakim,
31Eliakim, enia natun Melea,
Melea, enia natun Menna,
Menna, enia natun Mattatha,
Mattatha, enia natun Nathan,
Nathan, enia natun David,
32David, enia natun Jesse,
Jesse, enia natun Obed,
Obed, enia natun Boaz,
Boaz, enia natun Sala,
Sala, enia natun Nahshon,
33Nahshon, enia natun Amminadab,
Amminadab, enia natun Admin,
Admin, enia natun Arni,
Arni, enia natun Hezron,
Hezron, enia natun Perez,
Perez, enia natun Judah,
34Judah, enia natun Jacob,
Jacob, enia natun Isaac,
Isaac, enia natun Abraham,
Abraham, enia natun Terah,
Terah, enia natun Nahor,
35Nahor, enia natun Serug,
Serug, enia natun Reu,
Reu, enia natun Peleg,
Peleg, enia natun Eber,
Eber, enia natun Shelah,
36Shelah, enia natun Cainan,
Cainan, enia natun Arphaxad,
Arphaxad, enia natun Shem,
Shem, enia natun Noah,
Noah, enia natun Lamech,
37Lamech, enia natun Methuselah,
Methuselah, enia natun Enoch,
Enoch, enia natun Jared,
Jared, enia natun Mahalaleel,
Mahalaleel, enia natun Cainan,
38Cainan, enia natun Enos,
Enos, enia natun Seth,
Seth, enia natun Adam,
Adam, enia natun God.
Currently Selected:
Luke 3: tgp
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
